Sportall.ge-ს ინფორმაციით, გუნდი, რომელსაც მიმდინარე ეროვნული ლიგის ბოლო ტურებში საკმაოდ კარგი შედეგი ჰქონდა, ისევ დაშლის პირასაა - ფეხბურთელებმა საწვრთნელ პროცესზე უარი თქვეს და სახლებში დაბრუნდნენ.
წყაროს ცნობით, ახალი ინვესტორის ფაბიო მანინის კლუბში მოსვლის შემდეგ, უკეთესობისკენ არაფერი შეცვლილა. ახალმა მწვთელმა ფეხბურთელებს ჯერ ხელფასები გაუნახევრა და შემდეგ ამ განახევრებულსაც კი არ უხდიდა სრულად და თავის დროზე.
აღსანიშნავია, რომ იტალიელმა ინვესტორმა გუნდის წევრებს შემცირებულ ხელფასებზე დათანხმება მუქარის თანხლებით აიძულა: თუ არ დათანხმდებით, არც ძველ ხელფასებს გადაგიხდითო...- ამბობს სააგენტოს წყარო.
მოთამაშეებს არასრული ხელფასები კვირების დაგვიანებით ერიცხებოდათ, ფაბიო კი სულ იტყუებოდა: დღეს-ხვალ, დღეს-ხვალ. წყაროს ცნობით, საუბარიც კი არასდროს ყოფილა პრემიების შესახებ - არც მოგებაზე, არც დადებით შედეგზე...
ბოლოს იქამდე მივიდა საქმე, რომ კლუბის ბაზაზე საკვების ფულიც აღარ იყო და ფეხბურთელებმა სახლებში წასვლა გადაწყვიტეს.
როგორც წყარო აცხადებს, მოთამაშეები დავალიანების სრულად დაფარვამდე გუნდში დაბრუნებას არ აპირებენ და ყველა ფეხბურთელი ერთ პოზიციაზეა.
რამდენიმე თვის წინ, „კომერსანტთან“ ექსკლუზიურ ინტერვიუში „ტორპედოს“ ახალი მფლობელი იტალიელი ფაბიო მანინი ქუთაისურ კლუბთან დაკავშირებულ მასშტაბურ გეგმებზე საუბრობდა.
„არ ვეძებდი მცირე და უმნიშვნელო კლუბებს, მინდოდა საუკეთესო. ქუთაისის „ტორპედო“ არაერთი თასის მფლობელი გახდა, ორი წლის წინ ასევე დიდი გამარჯვება მოიპოვა, შესაბამისად ჩავთვალე, რომ ეს საუკეთესო ვარიანტი იყო ჩემთვის“-ამის შესახებ „კომერსანტთან“ ექსკლუზიურ ინტერვიუში ფაბიო მანინიმ ისაუბრა.
მისი განცხადებით, კლუბის შეძენისას მას უნდოდა აქცენტი ახალგაზრდა თაობაზე გაეკეთებინა და საამისოდ „ტორპედო“ საუკეთესო აღმოჩნდა. „როდესაც შეთანხმებას ხელი მოვაწერე, გადავწყვიტე ერთი პუნქტის ჩამატება კონტრაქტში, რომელიც მავალდებულებს, რომ ყოველწლიურად მინიმუმ 400 ახალგაზრდა ქართველ ფეხბურთელს შევუწყო ხელი წარმატებაში“-აცხადებს მანინი.
„ჩვენ გვყავს საქართველოს ბაზრით დაინტერესებული სპონსორი, ვისთან ერთადაც გვინდა საერთაშორისო ბრენდის სახით განვითარდეთ. მეორე საშუალება არის უძრავი ქონება - ყველა კლუბი მსოფლიოს მასშტაბით ავითარებს ტრენინგ-ცენტრებს, სასტუმროებს, აუზებს, სპორტულ დარბაზებს, მაღაზიებს - ეს არის შემოსავლის წყაროები. ქუთაისში არსებული მიწის გამოყენება გვინდა, ეს იქნება ტრენინგ ცენტრები და არა მხოლოდ ფეხბურთთან დაკავშირებული აქტივობები, თუმცა იქნება ბრენდი „ტორპედო ქუთაისი“. სხვა გზას ვერ ვხედავ , გარდა დანაკარგისა,“- განმარტა ბიზნესმენმა ინტერვიუში.
ვრცელი ვიდეოინტერვიუ შეგიძლიათ იხილოთ ლინკზე..
ივნისში „კომერსანტს“ „ტორპედოს“ პრესსამსახურში განუცხადეს, რომ კლუბის გადაფორმება ბოლოს მარტის თვეში უნდა მომხდარიყო, თუმცა პანდემიისა და იურიდიული საკითხების მოუგვარებლობის გამო, პროცესი გადაიდო. ამ დროის მანძილზე კი იტალიელ ინვესტორს კლუბის გეგმების განხორციელება არ შეუწყვეტია და ტორპედოს აკადემიის აშენებას გეგმავს და ამ საკითხზე ეკონომიკის სამინისტროსთან მოლაპარაკების პროცესშია.
მათივე თქმით, 50 მილიონიანი ინვესტიცია ბიუროკრატიული პროცესების გამო ფერხდებოდა.
50 000 კვადრატულ მეტრზე „ტორპედო“- ს ახალ მფლობელს აკადემიის აშენების ვალდებულება აქვს, ასევე გეგმავს ბავშვებისთვის ორი მოედნისა და ხუთ ვარსკვლავიანი სასტუმროს აშენებას.