გლობალურ ბაზრებზე, გარკვეული კორექტირების მიუხედავად, ოქროს ფასი კვლავ მაღალ ნიშნულზეა. რაც შეეხება ქართულ ბაზარს, როგორც ოქროს ბაზრის ექსპერტი, პროფესორი ხათუნა გაჩეჩილაძე აცხადებს, ფასები გლობალური ტენდენციებს ადეკვატურად ვერ ასახავს. ამ ეტაპზე საქორწინო, 958 სინჯის (ბაჯაღლო) ოქროს ბეჭდის ფასი 2000 ლარის ფარგლებშია, თუმცა რამდენიმე თვის წინ მისი ღირებულება 2200 ლარს შეადგენდა.
,,არანაირი ტენდენციით არ ხასიათდება ქართული ბაზარი, ფასებიც და მსყიდველუნარიანობაც დაბალია. ამ დროს გლობალურ ბაზრებზე ოქროს ღირებულება აგაცილებით მაღალია, მაგრამ განვითარებული ქვეყნების ბაზრებთან საქართველოში მოქმედი ფასები თანხვედრაში არ არის.
საქორწინო ბეჭდების ფასი 2000 ლარის ფარგლებშია. ეს არის 958 სინჯის ოქრო, რომელიც ცოტა ადრე 2200 ლარი ღირდა“, - ამბობს ხათუნა გაჩეჩილაძე
ბაზრის ერთ-ერთი მტავარი პრობლემა, მისივე თქმით, ოქროს ხარისხს უკავშირდება, რაც ვერანაირ კრიტიკას ვერ უძლებს.
,,ვერ შევეხები ვერავის, ბიზნესს ლავირებას ვერ ვუკეთებ, მაგრამ ფაქტია, რომ მაღაზიაში ძალიან ხშირად, ნაყიდ ნაკეთობებში სინჯი დაბალია და გასაყიდი პროდუქცია მაღალი სინჯით არის წარმოდგენილი. სასინჯი ზედამხედველობა არ არსებობს და მყიდველიც და გამყიდველიც დაუცველია“, - ამბობს ,,კომერსანტთან“ საუბარში გაჩეჩილაძე.
ყველაზე დიდი პრობლემა, რაზეც ოქროთი მოვაჭრეები საუბრობენ, მყიდველების დეფიციტია. ოქროს დილერის, მარინა ლაბაძის თქმით, საქორწინო ბეჭდის გარდა, ოქროულობა უკვე იშვიათად იყიდება.
,,მომხმარებელი ოქროულობას ყიდულობს მაშინ, როცა გამოუვალ მდგომარეობაშია. მაგალითად, ქორწილის ან ნათლობისათვის, როდესაც ოქროს ყველაზე ახლობელი ადამიანისათვის იმეტებენ. ფასთან დაკავშირებით სრული თავისუფლებაა. მაქსიმალურად ვცდილობთ, რომ მომხმარებელს ოქროს შეძენა გავუადვილოთ და მცირე შეღავათს ყოველთვის ვუწევთ. ხშირად ხდება, რომ მთელი დღის განმავლობაში ვერაფერს ვყიდით, ძალიან რთულ სიტუაციაში ვართ“, - ამბობს მოვაჭრე.
ცნობისთვის, 30 აგვისტოს მონაცემებით, მსოფლიო ბირჟებზე უნცია ოქროს ღირებულება $1,8 ათასიან ნიშნულის დონეზეა. ექსპერტების შეფასებით, ავღანეთში შექმნილი ვითარების ფონზე მოვაჭრეები ოქროს შეძენას კვლავ სიფრთხილით ეკიდებიან.
დეკემბრის ოქროს ფიუჩერსები ბირჟაზე Comex New York 0.38%-ით (6.85 აშშ დოლარით) გაიზარდა და უნციაზე 1,817.31 აშშ დოლარს შეადგენს.
ამასთან, ვერცხლის სექტემბრის ფიუჩერსების ღირებულება უნციაზე 22.77 აშშ დოლარს შეადგენს.
Oanda-ს ანალიტიკოსების შეფასებით, აღსანიშნავია, რომ საგარეო პოლიტიკის რისკები ხელს უწყობს ოქროს ფასების ზრდას. ოქრო, ტრადიციულად, ერთ-ერთ ყველაზე უსაფრთხო აქტივად განიხილება, ამიტომ მასზე მოთხოვნა პოლიტიკური რისკებისა და გაურკვევლობის მატებასთან ერთად იზრდება.
მარი ჩიტაია