„ეკონომიკურ გუნდს ევალება, უახლოეს პერიოდში, დღის ბოლომდე შემუშავებული გეგმის სახით წარმოგვიდგინოს ეკონომიკური სტიმულირების კონკრეტული გეგმა, რომელიც ხვალიდან განხორციელდება“, - ამის შესახებ საქართველოს პრემიერ-მინისტრმა გიორგი გახარიამ მთავრობის სხდომაზე განაცხადა.
ამის პარალელურად პრემიერ-მინისტრის მრჩეველმა ბექა ლილუაშვილმა განაცხადა, რომ საბანკო სექტორი მზად არის ემუშაოს ტურისტულ ინდუსტრიას, რათა სესხების გადავადება მოხდეს, იქნება ეს რესტრუქტურიზაციის, თუ სხვა ფორმები. საქართველოს ეროვნული ბანკის პრეზიდენტმა კობა გვენეტაძემ კი კომერციულ ბანკებს მოუწოდა, რომ იმუშაონ თავის კლიენტებთან, რათა სესხების რესტრუქტურიზაცია მოხდეს. სანამ მთავრობა და სებ-ი ტურიზმის დახმარების გეგმაზე ფიქრობს, სექტორის წარმომადგენლები „კომერსანტთან“ ძირითად პრობლემებზე და მათი გადაჭრის გზებზე საუბრობენ.
ჟურნალისტი და პიარ-ტექნოლოგი ლალი მოროშკინა, რომელიც სიღნაღში 2 სასტუმროს (Sighnaghi Art Hotel-ის და Villa Provance) ფლობს, ტურიზმის სექტორის ამ სიტუაციამდე მიყვანას მთავრობის მიერ აგორებულ პანიკას აბრალებს და თვლის, რომ სახელმწიფომ ბანკებთან მორატორიუმს უნდა მოაწეროს ხელი, რომლის საფუძველზეც სესხების გადავადება მოხდება.
„პირველ რიგში, უნდა დასრულდეს ასეთი პანიკა,რომელიც მნიშვნელოვანწილად საფუძველს მოკლებულია,იმიტომ რომ დაავადებულთა გაზრდილი რაოდენობა ფონს არ ცვლის, ამას განსაკუთრებული გავლენა არ მოუხდენია არც თურქეთზე, არც საფრანგეთზე და არც რუსეთზე. იტალიაზე თუ ვისაუბრებთ, იქ იყო კერა და ამიტომ არის ასეთი სიტუაცია, ჩვენთან ეს კერა საბედნიეროდ არ არის.სახელმწიფოს ისტერიულმა ფონმა ტურიზმი აბსოლუტურად გააჩერა, ჯავშნები გაუქმებულია. იმის ნაცვლად, რომ ჩვენ გაგვეკეთებინა პოზიციონირება, როგორც ეს თურქეთმა გააკეთა, როცა ამბობენ ზღვა და მზე კლავს ბაქტერიას და ტურისტებს თავისთან იწვევენ, ჩვენ პირიქით, ეკონომიკური საფუძვლები დავაქციეთ. სახელმწიფოს სხვა გზა აღარ დარჩა იმის გარდა, რომ ბანკებთან მოაწეროს ხელი მორატორიუმს და დაავალოს, ჩვენი იპოთეკური სესხები, რომლებიც სასტუმროებისთვის გვაქვს აღებული, ერთი წლით გადავადდეს. თითქმის ყველა სასტუმროს აქვს სესხი, რომც დაიხუროს ობიექტი ამის გადახდა მაინც გვიწევს, ასევე გვიჭირს ხელფასების გაცემაც. მთავრობამ შექმნა ფონი და ვიცი, რომ ამის საფუძველზე ჩვენ მსოფლიო ბანკის ტრანშებს ველოდებით, მაგრამ ეს ვერ აანაზღაურებს იმ ხარჯებს რაც საქარტველოს ამ პანიკის გამო მიადგა“, - აღნიშნა ლალი მოროშკინამ.
საოჯახო სასტუმრო „თრუსოს“ ხელმძღვანელს ლევან კარიჭაშვილს იმედი აქვს, რომ საბანკო სესხების გარდა, მთავრობა ქონების გადასახადის გადავადებასაც მოახდენს.
„კარგი იქნება თუ საბანკო სესხების გადავადება მოხდება. ჯერ მთელ მსოფლიოში უნდა მოგვარდეს ეს პრობლემა და მერე ალბათ ჩვენთანაც მოგვარდება. მთავრობამ ნაბიჯები თუ გადადგა შედეგი უფრო მალე იქნება,მაგალითად, ქონების გადასახადი გადაგვივადოს და ზოგადად გადასახადები დროებით შეგვიმციროს. წელს დაახლოებით 10%-ით იყო დატვირთული ზამთრის კურორტები, წარმოდგენა არ გვაქვს როგორ უნდა გამოვასწოროთ სიტუაცია“, - განმარტა ლევან კარიჭაშვილმა.
ბაკურიანში საოჯახო სასტუმრო PremierHouse-ს მფლობელი გიორგი გორჯოლაძე მიიჩნევს, რომ თუ მთავრობა ბიზნეს სექტორში ნაკლებად ჩაერევა უფრო უკეთესი იქნება.
„სეზონი ძალიან ცუდი იყო, წყლის და ინფრასტრუქტურის პრობლემებს დაემატა ბაკურიანში უთოვლობა და ბოლოს უკვე კორონავირუსმა ტურიზმის სექტორს საბოლოოდ მოუღო ბოლო. საბანკო სესხების გადავადებას ალბათ ბევრი ისურვებდა, მაგრამ მე აღარ მაქვს, რადგან ასეთ არასტაბილურ სიტუაციაში არ ვაპირებ დამატებითი სესხის აღებას. ზოგადად თუ მთავრობა თავს დაანებებს ბიზნესს, უფრო უკეთესი იქნება, რადგან რასთანაც მივიდნენ ყველაფერი გააფუჭეს“, - განაცხადა გიორგი გორჯოლაძემ.
აღსანიშნავია, რომ 2019 წელს ტურიზმიდან შემოსავალი, წინა წელთან შედარებით, 1.4 პროცენტით გაიზარდა და 3 მილიარდ 268 მილიონ დოლარს მიაღწია. 2018 წელს აღნიშნული მაჩვენებელი 3 მილიარდ 222 მილიონ დოლარს შეადგენდა. ჯამურად საშუალო დანახარჯი კი ერთი ტურისტიდან 1,541 ლარი იყო.
ნინო თამაზაშვილი