ქობულეთში, სასტუმრო Georgia Palace Hotel&Spa დამსვენებელს 8 ივნისიდან მიიღებს. ამის შესახებ „კომერსანტს„ სასტუმროს დამფუნებელმა, ბიზნესმენმა თემურ ჭყონიამ განუცხადა. მისი ინფორმაციით,სასტუმრო მთავრობის მიერ დაწესებული ყველა რეგულაციის დაცვით გაიხსნება.

„აჭარა მწვანე ზონად გამოცხადდა, მაგრამ აქ ჩვენი სასტუმრო ყველაზე მწვანე ზონაა, რადგან ტერიტორია ასეთი შემოღობილი და დაცული მხოლოდ ჩვენ გვაქვს. ეს კი დამსვენებლებისთვის შემთხვევით პირებთან კონტაქტს სრულად გამორიცხავს. ჩვენ შევქმნით არა დისტანციურ, არამედ კომფორტულ მომსახურეობას, სადაც გათვალისწინებული იქნება კორონავირუსთან დაკავშირებული ყველა რეგულაცია“-აცხადებს ჭყონია.

ბიზნესმენი „კომერსანტთან“ სატარიფო პოლიტიკაზეც საუბრობს და განმარატვს, რომ მიმდინარე ზაფხულის სეზონიდან ფასები დაკორექტირდება. სასტუმროს ლიალურ კლიენტებზე კი ინდივიდულაური მიდგომა იქნება.

„საერთოდ, არ შეიძლება ერთი და იგივე ფასი წლების განმავლობაში არსებობდეს. ცხოვრების განვითარებასთან ერთად ფასები იზრდება და პირიქით.საბჭოური შეხედულებაა ის, რომ ფასი უნდა იყოს იაფი და სტაბილური,ასეთი ეკონომიკა მსოფლიოში არ არსებობს. მსოფლიოში ფულიც ძვირდება და იაფდება. ცხოვრებაში ყველა მოთხოვნილებას აქვს სხვადასხვა ღირებულება და სხვადასხვა შეფასება. აქედან გამომდინარე, ჩვენ დამსვენებელს უნდა შევთავაზოთ კომფორტი და ხარისხი შესაბამის ფასად. თუ ადამიანს უნდა მაღალი დონის კომფორტი და მომსახურება, ეს ყველაფერი არის განსხვავებული, ინდივიდუალური მიდგომით.

სასტუმრომ წლების განმავლობაში შეიძინა ის ხალხი, ვისაც პატივს ვცემთ. ჩვენს პერსონალს მათთან ძალიან დადებითი ურთიერთობები აქვა, სახელები და გვარებიც კი ზეპირად ვიცით. მათთან ხანდახან გადახდის პირობებიც კი სხვა არის“-აცხადებს ჭყონია.

ქობულეთში Georgia Palace Hotel & Spa 2008 წლის ზაფხულში გაიხსნა და შავიზღვისპირეთში პირველი ხუთვარსკვლავიანი სასტუმრო იყო. სასტუმრო ბიზნესმენ თემურ ჭყონიას დაფინანსებით, ქართულმა კომპანიამ ააშენა. სასტუმროში 155 ნომერია, მათ შორის 5 ლუქსი. სასტუმროს მომსახურე პერსონალი მთლიანად ქართველებისგანაა დაკომპლექტებული.

სოფო ქსოვრელი