ტექნიკური რეგლამენტი, რომელიც ქათმის ხორცში წყლის შემცველობას აკონტროლებდა, გაუქმდა. რეგულაციის თანახმად პროდუქტში  გაყიდული წყლის რაოდენობა 40%-დან 5%-მდე გახდა დასაშვები. გაუქმების შესახებ არგუმენტები აქვთ  სურსათის უვნებლობის სამსახურში, სადაც აცხადებენ, რომ რეგულაციის გაუქმების მთავარი მიზეზი  ბაზარზე პროდუქტის დეფიციტის თავიდან აცილებაა.  რეგულაცია არ გაუქმებულა, თუმცა, გარემო ფაქტორების გათვალისწინებით დროებით შეჩერდა. უწყების განმარტებით, მათი მხრიდან სურსათის შემოწმების ხარისხი ისევ მაღალი იქნება.

რეგულაციის დროებით შეჩერებაზე და მოსალოდნელ შედეგებზე  საუბრობენ როგორც ადგილობრივი მწარმოებლები,ასევე იმპორტიორებიც.„ბიუ-ბიუ“-ს  დამფუძნებელი რევაზ ვაშაკიძე „კომერსანტთან“ საუბრობს, რომ წყლით გაჟღენთილი ხორცის გაყიდვა, მყიდველის მოტყუებაა.

„ვის ინტერესში შედიოდა ამ რეგულაციის გაუქმება არ ვიცი.საქართველოში შემოსულ, იმპორტირებულ, გაყინულ ქათმის ხორცში წყლის შემცველობა მაღალია. ეს კი მომხმარებლის მოტყუებაა. იმპორტიორი ამით წონას ზრდის, მომხმარებელს კი წყალში ფულს ახდევინებს. არა მგონია, მომხმარებლის მოტყუება სახელმწიფო ინტერესებში შედიოდეს, თუმცა, ნამდვილად გასაკვირია რატომ შემოდის ისეთი ქათამი, რომელიც ყველა ქვეყანაში აკრძალულია“-ამბობს რამაზ ვაშაკიძე.

რეგულაციის გაუქმებას საჭიროდ მიიჩნევს იმპორტიორი, კომპანია „დუს“ ხელმძღანელი  დავით გოგიჩაიშვილი  და აცხადებს, რომ ადგილობრივ ბაზარს მეწარმეები ვერ მოამარაგებენ, პროდუქტის სიმცირე კი მასზე ფასის ზრდას გამოიწვევს. “ჯერ დავიწყოთ იქედან, რომ დროებითაა გაუქმებული, სასურსათო კრიზისი რომ არ შექმნილიყო ბაზარზე. შემდგომ ისევ რეგულაციის დარგლებში მოექცევა. თუმცა, ჯერ იმაზე ვისაუბროთ, საერთოდ რატომ შემოიღეს ეს რეგულაცია, ან რატომ აუქმებენ.თავის დროზე ქართველი მეწარმეების მოთხოვნა იყო ეს რეგულაცია, რომ არ შემოსულიყო იმპორტირებული საქონელი და მხოლოდ თავად  თავიანთი პროდუქციის რეალიზაცია მოეხდინათ. საქმე ისაა, რომ ბაზარს ვერ ამარაგებენ, არ აქვთ ამდენის შესაძლებლობა.სწორედ ეს გახდა მიზეზი იმისა, რომ დროებით შეეჩერებინათ რეგულაცია და ბაზარზე ყოფილიყო პროდუქტის არჩევანი“-აცხადებს გოგიჩაიშვილი. 

რაც შეეხება წყლის შემცველობას, მისი განცხადებით, ლაბორატორიები შემცველობაზე ანალიზს  საქართველოში არ აკეთებენ. შესაბამისად,ძალიან რთული პროცესია გასავლელი. გოგიჩაიშვილი აცხადებს, რომ  ამას ვერც რეგულაციის დროს ახერხებდნენ და ვერც ისე მოახერხებდნენ.

„იმპორტრებული პროდუქტის აკრძალვა ადგილობრივ ბაზარზე პროდუქტის დეფიციტს გამოიწვევს, ვერც ადგილობრივი მეწარმეები შეძლებენ მომხმარებლის უზრუნველყოფას, ეს კი არსებულ პროდუქტზე ფასის ზრდას გამოიწვევს.საბოლოო ჯამში კი  გაძვირებულ ხორცს მივიღებთ. თუ ჯანსაღ პროდუქტზე ვსაუბრობთ, ჯერ იმით დავიწყოთ რა საკვები დანამატებით ზრდიან ქათმებს და მერე აკონტროლონ წყლის შემცველობა იმპორტირებულ ხორცში. მომხმარებელი ყველაზე კარგად დაალაგებს ბაზარს, თუ კონკრეტული პროდუქტი მას არ მოეწონება, მეორე ჯერზე არ იყიდის.“-აცხადებს  დავით გოგიჩაიშვილი.

შეგახსენებთ, რომ რეგულაცია, რომელიც მიმდინარე წლის თებერვლიდან ამოქმედდა დროებით შეჩერებულია. ზოგიერთი ქვეყნიდან იმპორტირებულ ქათმის გაყინულ ხორცში წყლის შემცველობა  ბაზრის სუბიქტების განცხადებით, 40%-მდეც აღწევდა და მომხმარებელი ორმაგ ფასს იხდიდა.საუბარია,  ფრინველის ხორცის ტექნიკურ რეგლამენტზე.

ნათია ლომიძე