ქართველმა ბიზნესმენმა დავით (შმაგი) ქემერტელიძემ ყაზახეთში მორიგი გრანდიოზული პროექტი განახორციელა - ყარაღანდის ოლქში მან ფეროშენადნობთა ქარხანა „Qaz Carbon“ ააშენა. ქარხანა თანამედროვე ტექნოლოგიებითაა აღჭურვილი და ის უმოკლეს ვადაში - 9 თვეში აშენდა.

საწარმო „ყაზახეთის განვითარების ბანკის“ ფინანსური მხარდაჭერით აშენდა, რომელმაც პროექტში 38,8 მლრდ ტენგე ($89 მლნ) დააბანდა, ხოლო 11 მლრდ ტენგე ($25 მლნ) კომპანიამ საკუთარი სახსრებიდან გაიღო.

ქარხნის საწარმოო სიმძლავრე წელიწადში 57 000 ტონა ფეროშენადნობს შეადგენს, რაც 8 ღუმელში გამომუშავდება.

პირველ ეტაპზე ექსპლუატაციაში 4 ღუმელი შევიდა, ხოლო დანარჩენი 4 წლის ბოლომდე ამუშავდება.

პირველი ღუმელი აგვისტოში გაეშვა და 30 ნოემბრისთვის საწარმომ უკვე 3 000 ტონა ფეროშენადნობი გამოუშვა. პროდუქცია ექსპორტზე იაპონიაში, კორეაში, დსთ-ისა და ევროკავშირის ქვეყნებში გავიდა.

ქარხანა მთლიანად ავტომატიზებულია და ღუმელებს ერთი სახეობის შენადნობებიდან მეორეზე გადართვა 3 საათში შეუძლიათ.

„ახალი ქარხანა ყაზახეთში მიმზიდველ საინვესტიციო გარემოზე მიუთითებს. ჩვენ, უცხოელ ინვესტორებს, გვინდა განსაკუთრებული ხაზგასმით აღვნიშნოთ საკანონმდებლო ბაზა და სხვა პირობები, რომლებიც ამ ქვეყანაში სამუშაოდაა შექმნილი“, - აცხადებს ბიზნესმენი დავით ქემერტელიძე.

„Qaz Carbon“-მა 2021 წელს ექსპლუატაციაში გაუშვა ნახშირის გამამდიდრებელი საწარმო, რომლის სიმძლავრე წელიწადში 2 მლნ ტონას შეადგენს. მდინდარე წლის ბოლომდე ამუშავდება ასევე მძლავრი აგლომერაციული ფაბრიკები.