ქართველი არქიტექტორები დედაქალაქის მერს კახა კალაძეს ძველი ოპოდრომის განახლების პროექტთნ დაკავშირებით განცხადებით მიმართავენ, საქმე ეხება ცენტრალური პარკის პროექტის უცხოური კომპანიის მიერ განხორციელებას, რაც ქართველი არქიტექტორების თქმით, ადგილობრივ ქალაქმგეგმარებლებსა და დიზაინერებს საქართველოში დარჩენისა და ქვეყნის სამსახურში ყოფნის მოტივაციას უკარგავს.
„კომერსანტი“ ქართველი არქიტექტორების განცხადებას უცვლელად გთავაზობთ:
ქ. თბილისის მერს. ძველ იპიდრომთან დაკავშირებით. ქართველ არქიტექტორთა მეგობრული რჩევა
ბატონო კახა,
კონკურსი, როგორც იდეა, საუკუნეების მანძილზე საუკეთესო არქიტექტურული თუ ქალაქგეგმარებითი ნაწარმოებების, ნიჭიერი ავტორების (მეტწილად ახალბედების) წარმოჩენის საუკეთესო, ეფექტურ საშუალებას წარმოადგენდა. სამწუხაროდ, ამ აღიარებული ჭეშმარიტების სრულ იგნორირებას ვახდენთ, უკვე დიდი ხანია. ხოლო განცხადება, რომელიც ა.წ. 4 ოქტომბერს თქვენგან მოვისმინეთ, ყოველივეს ლოგიკურ გაგრძელებას წარმოადგენს. ირკვევა, რომ თბილისისთვის საოცნებო, (იპოდრომის) უნიკალური პარკის პროექტი ერთმა ნიდერლანდურმა კომპანიამ უნდა შეასრულოს, ჩვენი პროფესიული საზოგადოება კი, როგორც ეს ხშირად ხდება, სტატისტის როლს უნდა დასჯერდეს. თუ ასე გავაგრძელებთ, აღმოჩნდება, რომ საქართველოს უმაღლესი სკოლების მიერ ყოველწლიურად გამოშვებული 500 არქიტექტორი, ქალაქმგეგმარებელი, დიზაინერი დიდ გაუგებრობაში არიან მოხვედრილნი და ამ უკუღმართობას ქალაქის მმართველობაც უწყობს ხელს. სხვა სიტყვებით, ახალგაზრდებს საქართველოში დარჩენის, მის სამსახურში ყოფნის მოტივაციას ვუსპობთ, ეს კი, გვერწმუნეთ, ნამდვილად არ შედის ქვეყნის ინტერესებში. მაღალი კლასის სპეციალისტებად მათი ჩამოყალიბება სხვა ფაქტორებთან ერთად არქიტექტურულ-გეგმარებითი კონკურსების სიმრავლემაც უნდა განაპირობოს. საქმე გამონაკლისს რომ ეხებოდეს, ამგვარ პესიმისტურ პროგნოზს არ გავაკეთებდით. მაგრამ სამწუხაროდ, პროექტირებისადმი ამგვარი დამოკიდებულება დარგის მართვის სისტემის განუყოფელ ნაწილად ვაქციეთ. უკვე დიდი ხანია, მინიმუმ 15 წელიწადი. ჯერ არ არის დაგვიანებული გამოსწორდეს ნებსით თუ უნებლიედ დაშვებული შეცდომა. მიიღეთ ჩვენი რჩევა, გნებავთ საქმიანი წინადადება, შეაჩერეთ ხსენებულ კომპანიასთან დადებული ხელშეკრულება, გამოაცხადეთ ღია კონკურსი პარკის ესკიზურ პროექტზე. მითუმეტეს, რომ ასეთი მასშტაბის და მნიშვნელობის საპროექტო გადაწყვეტები ერთი ობიექტის პრობლემატიკით ვერ შემოიფარგლება. იგი კომპლექსურ, მრავალმხრივ გააზრებულ გეგმარებითი კონტექსტის დამუშავებას მოითხოვს. დაგვიჯერეთ, უპირობოდ მოითხოვს. გამარჯვებული ესკიზის საფუძველზე, ავტორთა მონაწილეობით შესაძლებელი იქნება სრული პროექტი ისევ თქვენს მიერ შერჩეულმა ორგანიზაციამ დაამუშაოს. ამ კომპრომისული ვარიანტის განხორციელება თქვენთვის დიდ სირთულეს არ უნდა წარმოადგენდეს. პროცესი არქიტექტორთა საერთაშორისო კავშირის (UIA) მიერ აღიარებული, შესაბამისი წესების დაცვით წარიმართება, შედეგი კი დედაქალაქს, საზოგადოებას შეუდარებლად მეტ სიკეთეს მოუტანს, დარწმუნებულნი ვართ.
პატივისცემით, არქიტექტორი პავლე ძინძიბაძე, არქიტექტორი ფარნაოზ ზაქარაია, არქიტექტორი თენგიზ გოგოლაშვილი, არქიტექტორი ნუგზარ სვანიძე, ...
თანამოქალაქენო, თუ იზიარებთ წერილის შინაარსს და სურვილი გაქვთ მონაწილეობა მიიღოთ პროცესის სწორი გზით წარმართვაში, გამოხატეთ თანადგომა თქვენი პროფესიის, სახელის და გვარის გამოგზავნით შემდეგ მისამართზე: ecdof@hotmail.com