15 ივნისიდან საქართველო ადგილობრივი ტურიზმისთვის გაიხსნა, ხოლო 1-ლი ივლისიდან ქვეყანა მზად იქნება, უცხოელი ტურისტები მიიღოს. გარდა ამისა, საქართველო მსოფლიოში ერთ-ერთი პირველი ქვეყანაა, რომლის მოსახლეობა ზაფხულში საზღვარგარეთ მოგზაურობას შეძლებს. მიუხედავად ამისა, ქართული გამყვანი ტურისტული კომპანიები წლევანდელ სეზონზე ჯავშნების არარსებობაზე საუბრობენ.
ტურისტული სააგენტო Be my guest-ის ხელმძღვანელი ნატა რუხაძე „კომერსანტთან“ საუბრისას ამბობს, რომ მიუხედავად იმისა, რომ უცხოეთის მიმართულებით საგზურები გაიაფდა, ქართველები წელს მოგზაურობისგან თავს იკავებენ და ტურებს მხოლოდ მომავალი წლიდან ჯავშნიან.
„პანდემიამდე ივლისი-აგვისტოს პერიოდზე თურქეთის მიმართულებით ნაადრევი ჯავშნები გვქონდა, მაგრამ ყველამ გააუქმა ან სხვა პერიოდისთვის გადაიტანა. ზოგადად, თუ კორონავირუსზე ტესტი აუცილებელი გახდება, არამგონია გამყვანი ან შემომყვანი დიდი ჯგუფების ტურები შედგეს, რადგან ტესტი 50-60 ევრო ღირს. ბიუჯეტური ავიკომპანიები ცდილობენ მინიმალური ფასების დაწესებას, მაგრამ ყველა მაინც ვითარების გარკვევას ელოდება, მწვანე ზონების შესახებაც არ არის საბოლოო ინფორმაცია ცნობილი. წინა წელთან შედარებით საზღვარგარეთ დაკლებულია საგზურების და სასტუმროების ფასებიც, განსაკუთრებით იტალიის მიმართულებით, სადაც წელს დასვენება 20-25%-ით იაფია. აქვე ვიტყოდი, რომ საქართველოს სასტუმროებმაც დაიწყეს ფასდაკლებები, თუმცა ბათუმმა ვფიქრობ პირიქით, გააძვირა. სამწუხაროდ, ამ ეტაპზე არცერთი ჯავშანი არ არის, ქართველები წელს მოგზაურობას საზღვარგარეთ არ გეგმავენ, ჯავშნები ძირითადად სამომავლოდ კეთდება“, - განაცხადა ნატა რუხაძემ.
ტურისტული სააგენტო Startravel-ის ხელმძღვანელი თათია სუხიტაშვილიც წლევანდელი სეზონის ჩავარდნაზე საუბრობს. მისი თქმით, მიუხედავად იმისა, რომ ქართველების მხრიდან ინტერესი მაღალია, გაურკვეველი ვითარების გამო ჯავშნების გაკეთებისგან თავს იკავებენ.
„ქართველების მხრიდან ზაფხულის პერიოდში საზღვარგარეთ წასვლაზე მოთხოვნა იყო, თუმცა ძალიან მცირე რაოდენობით, მაგრამ დღემდე თავს ვიკავებთ საგზურების გაყიდვებისგან რადგან დაზუსტებით არ ვიცით რეისები შესრულდება თუ არა. როცა დაზუსტებით გვეცოდინება, რომ საზღვრები და რეისები აღდგება, შემდეგ განვაახლებთ გაყიდვებს. შემოდგომაზე გვაქვს ჯავშნები, რომელიც პანდემიამდე იყო გაკეთებული და აქამდე აქტიურია, თუმცა ახალ ჯავშნებს არც მაგ დროისთვის არავინ აღარ აკეთებს. ინტერესი ძალიან მაღალია და მუდმივ რეჟიმში კითხულობენ როდის და როგორ გაიხსნება საზღვრები, რომ ისევ იმოგზაურონ, მაგრამ ეს მოთხოვნა რა თქმა უნდა იმაზე ბევრად დაბალია ვიდრე თუნდაც წინა წლის ანალოგიურ პერიოდში. იმედი გვაქვს, რომ აგვისტოს პერიოდში მცირედი ჯავშნები მაინც იქნება და საზღვარგარეთ ქართველი ტურისტების რაღაც ნაწილი მაინც გაემგზავრება. ამ ეტაპზე სექტემბერ-ოქტომბერში შედარებით თამამად ვაკეთებთ ჯავშნებს, თუმცა მოთხოვნა საკმაოდ დაბალია“, - განაცხადა თათია სუხიტაშვილმა.
აღსანიშნავია, რომ Galt&Taggart-ის ახალ კვლევის - „ტურიზმის გამოწვევები 2020 წლის II ნახევარში“ თანახმად, ქართველების საზღვარგარეთ მოგზაურობა შეზღუდული იქნება, რაც შიდა ტურიზმს დაეხმარება. როგორც კვლევაშია აღნიშნული, 2019 წელს ქართველმა ტურისტებმა საზღვარგარეთ 2.1 მლრდ ლარი დახარჯეს. ირკვევა, რომ საზღვარგარეთ მოგზაურობისას ქართველებმა ყველაზე მეტი ფული (32.6%) საკვებსა და სასმელზე დახარჯეს; 31.4% მოდის შოპინგზე, 18.3% კი - განთავსების საშუალებებზე.
ნინო თამაზაშვილი