ქართული სტარტაპი Elven Technologies-ი ავსტრალიის, ამერიკის, იაპონიის და ევროკავშირის  ბაზრებზე გასასვლელად ემზადება.

Elven technologies -ს პროდუქტი მეხანძრის კოსტიუმია, რომელიც სრულიად ცეცხლგაუმტარია და არსებული კოსტიუმებისგან 8-ჯერ უფრო ხანგრძლივად იცავს მაღალი ტემპერატურისგან მეხანძრეს.  

როგორც ”კომერსანტთან” elven technologie-ს დამფუძნებელმა და აღმასრულებელმა დირექტორმა ვამეხ ხერხეულიძემ აღნიშნა, პროტოტიპზე მუშაობა ერთ კვირაში დასრულდება. ამავდროულად, კოსტიუმს გაგრილების სისტემის ახალი ტექნოლოგია ექნება, რომლის ანალოგი დღესდღეობით არ არსებობს. გაგრილების სისტემა მხოლოდ კოსმოსურ კოსტუმებში გამოიყენება, ხოლო მის გაუმჯობესებულ ვარიანტს მეხანძრის კოსტუმში იყენებენ.

კომპანიის დამფუძნებელმა ”კომერსანტთან”  space X - თან და ილონ მასკთან დაკავშირებულ გეგმებზეც ისაუბრა, მისი განცხადებით space X - თან კონტაქტზე გასვლა მარტივი არ არის, თუმცა ამაზე მუშაობენ და სამომავლოდ, მათ მიერ მომზადებული კოსტიუმი მარსზე გაფრენილ პირველ ადამიანს შეიძლება ეცვას.

 ”ჩვენ კონკრეტულად ამ უნიფორმით, რომელიც ცეცხლგამატრია და ყველაზე მაღალი დაცვა აქვს, მაღალდაცვიან უნიფორმებს ვუმიზნებთ და არა დაბალდაცვიანს. მაღალდაცვიანი უნიფორმა დაახლოებით 4000-5000 დოლარი ღირს და ჩვენი რეგიონის ქვეყნებში ამის საშუალება არ არის, რომ 5000 დოლარი ერთ უნიფორმაში გადაიხადონ, რადგან  ახლა 500$ -იან უნიფორმებს ყიდულობენ. შესაბამისად, ჩვენი უნიფორმა ძვირია, მაგრამ ყველაზე ძვირებზე უკეთესია, ამიტომ რეგიონის ბაზარს ვერ ვერგებით.

ეს უნიფორმა გათვლილია მდიდარ ბაზარზე - ავსტრალიის , იაპონიის , ევროკავშირის, ამერიკის ბაზარზე და ა.შ.  ისეთ ბაზარზე, სადაც ზუსტად ვიცით, რომ ამ თანხას იხდიან.

ახლა დავიწყეთ ისეთ უნიფორმაზე მუშაობა, რომელიც მარტივად ასაწყობი იქნება, იაფი დაგვიჯდება და არანაირი დიდი ტექნოლოგიური წინსვლა არ სჭირდება, ადგილობრივ ბაზარსაც ხარისხიანი პროდუქტით მოვამარაგებთ და არა ჩინურით.”- ამბობს ვამეხ ხერხეულიძე.

კომპანიის დამფუძნებელმა სამომავლოდ ნასასთან თანამშრომლობაზეც ისაუბრა და აღნიშნა, რომ ჯერჯერობით კოსმოსთან წლები და მილიონები აშორებს, თუმცა დროს ფული შეამცირებს.

”ახლა სილიკონ ველიდან  ორ ადამიანთან გვაქვს კომუნიკაცია, რომლებსაც შეუძლიათ ხელშეწყობა და ვფიქრობთ, რომ მათ დაწმუნებას ნამდვილად მოვახერხებთ. თუ პირველი უნიფორმები გავყიდეთ, არის ალბათობა იმისა, რომ დეკემბრის ბოლოს, იანვრის დასაწყისში პირველი დიდი შეკვეთა მივიღოთ.

კოსმოსიდან  ჯერ შორს ვართ - ამისთვის 50 მლნ დოლარის და 5 წელი ან 5 მილიარდი და 2 წელი გვაშორებს -  დროს ამოკლებს ფული. მაგრამ მარტო ნასას ერთი კოსმოსური ხომალდი  25 მილიონი დოლარი უჯდება  და წარმოიდგინეთ რა თანხები ჯდება სრულიად ახალი კოსტუმის გამოგონება, შექმნა და გატესტვა.

ძალიან დიდი თანხებზეა საუბარი, როელსაც ჩვენ ასე ინვესტიციით ვერ ავწევთ. ამიტომ ახლა ჩვენი მიზანია, რომ ეს უნიფორმები გავყიდოთ და შემდეგ შემოსული ფული დავაბანდოთ ნასას კოსტიუმის შენებაში და თუ იქამდე პირდაპირი გზა გაიჭრა, შეიძლება მალევე კოსმოსზე მორგებულ კოსტიუმზე გადავიდეთ.”- აღნიშნავს ვამეხ ხერხეულიძე.

რაც შეეხება ინვესტიციას, Elven technologies-ს ამ ეტაპზე , 75 000 $ ინვეტიცია სჭირდება, ვამეხ ხრეულიძე აღნიშნავს, რომ უკვე მოძიებულია 30 000$, რომელსაც ვერ დახარჯავენ, სანამ მთლიან თანხა არ შეგროვდება.

ხერხეულიძე აღნიშნავს, რომ ეს თანხაც უბრალო ადამიანების ინვესტიციებით შეაგროვეს.

 მარიამ მორგოშია