საქართველოს მეცხრე მოწვევის პარლამენტს უფლებამოსილების ვადა 31 ოქტომბერს ეწურება. ოთხი წლის წინ, 2016 წელს წინა საპარლამენტო არჩევნების დროს, ფრაქცია „ქართული ოცნება-დემოკრატიული საქართველო“ მოსახლეობას სოციალური კეთილდღეობას და სწრაფ განვითარებას დაპირდა. თუმცა, მმართველობიდან ოთხი წლის შემდეგ მოსახლეობა შიმშილობის ზღვარზეა, საქართველოში ფასების საერთო დონე კი რეკორდულად იზრდება. „კომერსანტი“ დაინტერესდა ამ დროის განმავლობაში რა გააკეთეს მმართველი პარტიის დეპუტატებმა მთავარი დანაპირების - „კეთილდღეობის და სწრაფი განვითარების“ შესასრულებლად, რის გამოც ოთხი წლის წინ ამომრჩევლებს ხმას სთხოვდნენ. როგორ აფასებენ საკუთარ სიტყვას და საქმეს დეპუტატების სავარძლებიდან და რას ეუბნებიან ამომრჩევლებს.
„კომერსანტი“ აგრძელებს სტატიების ციკლს, სახელწოდებით — რა წვლილი შეიტანა ქართველი ხალხის კეთილდღეობასა და სწრაფ განვითარებაში თითოეულმა დეპუტატმა ამ ოთხი წლის განმავლობაში. ამჯერად „კომერსანტი“ „ქართული ოცნების“ პარტიიდან გასულ დეპუტატს დაუკავშირდა.
ზაზა პაპუაშვილი აცხადებს, რომ ქვეყანაში ბევრი რამ იცვლება და მიუხედავად იმისა რომ „ქართულმა ოცნებამ“ წლების წინ ბევრი კარგი რამ ჩაიფიქრა, სხვადასხვა მიზეზების გამო ეს გეგმები ცოტათი შეფერხდა და ტემპი დავარდა.
„სწრაფი განვითარება და კეთილდღეობა ბევრ რამეზეა დამოკიდებული, რამდენი რამ შეიცვალა ბოლო წლების განმავლობაში ჩვენს გარშემო თუნდაც ვალუტასთან დაკავშირებით და ეპიდემიასთან მიმართებაში. პარტიის დაპირებების შემთხვევაშიც ასეა, შეიძლება რაღაც ჩაიფიქრო, მაგრამ სხვადასხვა მიზეზების გამო ეს გეგმები ცოტა შეფერხდეს და ტემპი დავარდეს. დღეს ამ რეალობიდან გამომდინარე უნდა გამოვიდეთ, მთავრობას ან საკუთარ ქვეყანას კი არ უნდა ჩავუსაფრდეთ და ნიში კი არ უნდა მოვუგოთ. კეთილდღეობა და განვითარება რომ გვინდა, კარგია, მაგრამ ეს არის ურთულესი გზა, მითუმეტეს ჩვენს რეგიონში და არსებულ სიტუაციაში.
რეგიონში რომელშიც ჩვენ ვცხოვრობთ არის შიდა გამოწვევები, ეს ერთობლივად ქმნის არც თუ ისე სახარბიელო სურათს, სადაც ბევრი კარგი ქმედება შეიძლება შეყოვნდეს, მაგრამ აქ არ არის საუბარი კურსის შეცვლაზე, ბევრი კარგი რამე კეთდება, მომავალშიც გაკეთდება და დავიმახსოვროთ რომ ცოტა რეალობა დავინახოთ. ზოგიერთი ადამიანი ისე საუბრობს ამ პანდემიაზე, რომ თითქოს ყველაფერი ხელისუფლების ბრალია.
რაც შეეხება კანონპროექტებს, რამდენიმე მათგანს გამოვარჩევდი, რომელიც მნიშვნელოვნად მიმაჩნია, ერთია კონსტიტუცია, შემდეგ კანონი პატიმრებთან დაკავშირებით, არასრულწლოვანთა მართლმსაჯულების კოდექსი და კიდევ სხვა ბევრი სასიკეთო რამ გაკეთდა. იქ არის ასევე დირექტივები, ნატოსთან დაკავშირებული თემები, პარლამენტში მთელი ამ კანონების გადმოლაგება იყო საჭირო, რომ ქვეყანა მომზადებულიყო საპარლამენტო მმართველობის სისტემაზე გადასასვლელად. თუმცა კიდევ ბევრია გასაკეთებელი“, - აცხადებს პაპუაშვილი.