,,ახალგაზრდა ფერმერი“ გაფართოებას გეგმავს. თბილისში, ბახტრიონის ქუჩაზე მდებარე ქართული ხილბოსტნეულის მაღაზია ფაქტობრივად მინი აგრო ჰაბის ფუნქციას ითავსებს. როგორც მეწარმე ირაკლი ვაშაყმაძე ,,კომერსანტთან“ საუბარში ამბობს, მაღაზიაში პროდუქციის უმეტესობა ნატურალურია და გეგმავს, მთლიანად ბიო სტანდარტზე გადაერთოს, რითაც ჯანსაღი ცხოვრების დამკვიდრების პროცესში გარკვეული წვლილის შეტანას შეძლებს.
სანამ საკუთარ მაღაზიას გახსნიდა, ირაკლი ვაშაყმაძე ერთ-ერთ სადაზღვევო კომპანიაში მუშაობდა. ამბობს, რომ აგროსექტორის გასაჭირს სწორედ მაშინ გაეცნო და გადაწყვიტა, მიღებული გამოცდილება უკვე საკუთარ ბიზნესად ექცია. წამოიწყო სამეურნეო საქმეც - მცირე მეურნეობები კახეთსა და კრწანისში. ახალგაზრდა ფერმერის 7 წლის წინანდელი ჩანაფიქრი კი სულ ცოტა ხნის წინ განხორციელდა.
დღეს იგი სააგენტოს ,,აწარმოე საქართველოში“ ერთ-ერთი წარმატებული ბენეფიციარია. საკუთარ მეურნეობაში მოყვანილი პროდუქტით ამარაგებს მაღაზიას, ნაწილს კი სხვა ფერმერებისგან ყიდულობს.
,,მაქსიმალურად ვცდილობთ, რომ დახლებზე ორგანული პროდუქტი მოხვდეს. ამისთვის ბევრი შრომა გვიწევს. სარეალიზაციო ხილ-ბოსტნეულის დიდი ნაწილი ადგილობრივია, ბიოლოგიურად სუფთა ნიორი, ბადრიჯანი, კიტრი, პომიდორი და სხვა, რაც ეტაპობრივად შემოდის და მთლიანად იყიდება. ვგეგმავთ, 100%-ით გადავიდეთ ბიოპროდუქციაზე, რაც ჯერჯერობით გამოწვევად რჩება, მაგრამ იმედია, მალე ამასაც შევძლებთ. დღეს სხვა არჩევანი არ გვაქვს. სჯობს, 1 ძირი პომიდვრისგან 10 კილოგრამის ნაცვლად, 2-3 კილოგრამ მოსავალს დავჯერდეთ. სამაგიეროდ, გვეცოდინება, რომ ჩვენი შვილები ჯანსაღ პროდუქტს მიირთმევენ, სხვა ალტერნატივა ჯანსაღი მომავლის უზრუნველსაყოფად არ არსებობს. მაღაზიის მომარაგება მთლიანად ჩემს თავზე ავიღე. ძალიან მნიშვნელოვანია, ხარისხიანი პროდუქტი გვეწყოს დახლებზე, ფასიც ყველა სეგმენტისთვის ხელმისაწვდომია, ყველაფერს ვაკეთებთ, რომ ხელცარიელი არ გავიდეს მყიდველი, შეიძლება რაღაც პროდუქტი ძვირია, მაგრამ იმავე კატეგორიის ხილი ან ბოსტნეული უფრო ხელმისაწვდომ ფასადაც იყიდება, არჩევანი დიდია“, - ამბობს მეწარმე.
რაც შეეხება პანდემიის გავლენას, როგორც ირაკლი ვაშაყმაძე ამბობს, ძირითადად მომხმარებლის მობილობაზე აისახა, ვინაიდან საზოგადოებრივი ტრანსპორტი შეზღუდულია და ხალხიც ნაკლებად გადაადგილდება.
ამ ეტაპზე ,,ახალგაზრდა ფერმერის“ პროდუქციის ყიდვა შესაძლებელია ონლაინ - Wolt, Bolt Food და Glovo საკურიერო მომსახურების მეშვეობითაც.
სააგენტოდან ,,აწარმოე საქართველოში“ ირაკლი ვაშაყმაძემ 30 000 ლარის დაფინანსება მიიღო, რაც მთლიანად მაღაზიის ინვენტარიზაციას მოახმარა. ჯერჯერობით 2 ადამიანია დასაქმებული, თუმცა, როგორც მეწარმე ამბობს, მალე გაფართოებას გეგმავს და კიდევ რამდენიმე კადრის დამატება მოუწევს.
მარი ჩიტაია