ერთ ჯგუფში შემავალმა ვაშლის მწარმოებლებმა Tiriphoni Gardens, Kvarkhiti Agro და AgroGori-მ 2020 წელს, კარგი მოსავლის მიუხედავად, თავიანთი პროდუქციის ექსპორტი ვერ დაიწყეს - ამის მიზეზი შესაბამისი შეფუთვის არარსებობა გახდა. თუმცა, ეს არაა ერთადერთი პრობლემა, რომელიც ჯგუფის წინაშე 2020 წელს იდგა. საიტი EastFruit ჯგუფის დირექტორს ზურაბ გოჯიაშვილს გაესაუბრა.
- როგორი იყო ამ სეზონში მოსავალი თქვენს ბაღებში?
მოსავალი მოსალოდნელზე კარგი - 1160 ტონა იყო. მაგრამ ამის მიუხედავად, ვერ ვიტყვი, რომ სეზონით კმაყოფილები ვართ. ბევრი პრობლემა გვქონდა, რეალიზაციის კუთხით, და არა მხოლოდ. გასულ წელს ჩვენ რამდენიმე მომგებიანი საექსპორტო შემოთავაზება გვქონდა - ახლო აღმოსავლეთიდან, ინდოეთიდან, ინდონეზიიდან, ტაილანდიდან, კოლუმბიიდან და რუსეთიდან. თუმცა, ვერც ერთ ამ ქვეყანაში ექსპორტზე ვერ გავედით, რადგანაც საზღვაო გზით ტრანსპორტირებისთვის აუცილებელი ყუთები ვერ ვიშოვეთ. ეს სპეციალური შეფუთვაა - გოფრირებული მუყაოს ყუთები, სადაც ყველა ვაშლი ცალ-ცალკე ინახება, იმისთვის, რომ ერთმა ან ორმა გაფუჭებულმა ვაშლმა დანარჩენები არ გააფუჭოს. საქართველოში ასეთი ყუთები არ იწარმოება, თუმცა, არის ინფორმაცია, რომ ერთ-ერთ საწარმოში შესაბამისი ტექნოლოგიები ინერგება და ეს საკითხი უახლოეს თვეებში გადაწყდება.
რა შეეხება იმპორტის, თურქეთში მინიმალური შესასყიდი რაოდენობა 500 000 ყუთია, რაც 9000 ტონაზეა გათვლილი, ჩვენი მოსავალი კი თითქმის 8-ჯერ ნაკლებია.შეფუთვის პრობლემამ ჩვენი პროდუქტის შესაბამის დონეზე წარდგენაში ადგილობრივ ბაზარზეც ხელი შეგვიშალა. 2020 წელს ჩვენ საკუთარი ბრენდი „გორჯი“ დავარეგისტრირეთ, და მისი ცნობადობის ზრდისთვის, ჩვენ სტიკერების დაკვრა არა მხოლოდ მთლიანად ყუთზე, არამედ თითეულ ვაშლზე გვინდოდა, ისე, როგორც ეს განვითარებულ ქვეყნებში ხდება. მაგრამ ტექნიკური პრობლემების გამო ეს ვერ მოხერხდა, ამიტომაც ჩვენი ვაშლი დღეს საქართველოში ჩვეულებრივად, ამოსაცნობი ნიშნის გარეშე იყიდება. ეს კი ბაზარზე დამკვიდრებას და საკუთარი ნიშის დაკავებას ხელს უშლის.
- გამოდის, რომ ბრენდირება გაყიდვებში დიდად ვერ დაგეხმარათ?
ბრენდირება თავისთავად ძალიან მომგებიანია და ის შედეგებს აუცილებლად გამოიღებს, თუმცა მხოლოდ იმის შემდეგ, რაც შეფუთვის საკითხს გადავწყვეტთ. ჩვენ გვსურს, რომ გვიცნობდნენ, როგორც საქართველოში, ასევე უცხოეთში.
- დღეს თქვენი პროდუქცია სად იყიდება?
ჩვენი მუდმივი პარტნიორები არიან სავაჭრო ქსელები „ნიკორა“ და „აგროჰაბი“, კიდევ რამდენიმე კომპანია, რომელიც პროდუქციას ბითუმად ყიდულობს, შემდეგ კი მის დისტრიბუციას ახორციელებს.ჩვენ გრძელვადიანი ვალდებულებები გვაქვს, გაწერილი განრიგი, სეზონზე დამოკიდებული ფასები, და ა.შ.
- როგორია მოთხოვნა?
მთლიანობაში დიდი მოთხოვნაა და ვაშლი კარგად იყიდება. ამ ეტაპზე ჩვენს მაცივარში შესანახად მხოლოდ 350 ტონა დარჩა, მოსავლის ძირითადი ნაწილი უკვე გაიყიდა. ჩვენ ძალიან კარგი მაცივარი გვაქვს, მაგრამ პანდემიის გამო ის დაგვიანებით, მხოლოდ ამა წლის ოქტომბერში ამუშავდა, რის გამოც მოსავლის პირველი 400 კილოგრამის სასწრაფოდ გაყიდვა მოგვიწია. თუმცა, მომავალ სეზონში ეს პრობლემა არ გვექნება და გაყიდვების უკეთესად დაგეგმვას შევძლებთ. ამ ეტაპზე ჩვენი მთავარი ამოცანაა შეფუთვის პრობლემის გადაწყვეტა და საექსპორტო ბაზრებზე გასვლა.
კომპანიები Tiriphoni Gardens, Kvarkhiti Agro და AgroGori ჯამურად გორის მუნიციპალიტეტში 31 ჰექტარის ბაღებს ფლობენ.
წყარო: east-fruit.com
ზურაბ გოჯიაშვილი
