გარემოს დაცვისა და სოფლის მეურნეობის სამინისტროს ინფორმაციით, 1–ლი აგვისტოდან 12 სექტემბრის ჩათვლით საქართველოდან ექსპორტზე 5.5 ათასი ტონა თხილი გავიდა. ექსპორტირებული თხილის ღირებულებამ $24.3 მლნ შეადგინა. გასული წლის ანალოგიურ პერიოდთან შედარებით, წელს თხილის ექსპორტის მოცულობა 27%-ით (1.2 ათასი ტონა) გაიზარდა.

ქართული თხილის ექსპორტზე წამყვანი პოზიცია ევროკავშირის ბაზრებს უჭირავთ. მათ შორის პირველ ადგილზეა იტალია, სადაც ამ დროისთვის 2 790 ტონა თხილია ექსპორტირებული. 

როგორც უწყებაში განმარტავენ,  გერმანია ექსპორტში რიგით მეორე ქვეყანაა, სადაც მიმდინარე სეზონზე 747 ტონა თხილია გადაზიდული, ესპანეთის შემთხვევაში ეს მაჩვენებელი 354 ტონას შეადგენს.

დანარჩენი პოზიციები ასე ნაწილდება: ჩეხეთი (220 ტონა), პოლონეთი (168 ტონა), ლიეტუვა (110 ტონა), ლატვია (66 ტონა), საფრანგეთი (65 ტონა), ესტონეთი (44 ტონა), ბულგარეთი (22 ტონა), ბელგია (20 ტონა).

გარემოს დაცვისა და სოფლის მეურნეობის სამინისტროს ინფორმაციით, ქართული თხილი ექსპორტზე ასევე გადის სომხეთში (354 ტონა), უკრაინაში (138 ტონა), რუსეთში (82 ტონა), ერაყში (72 ტონა), ბელარუსში (71 ტონა), ჩინეთში (52 ტონა), არაბეთის გაერთიანებულ საამიროებში (40 ტონა), მექსიკაში (28 ტონა), არგენტინაში (26 ტონა), დიდ ბრიტანეთში (22 ტონა), თურქეთში (22 ტონა) და უზბეკეთში (22 ტონა).