ინოვაციების და ტექნოლოგიების სააგენტოს 100 000-ლარიანი თანადაფინანსების გრანტების პროგრამა, საქართველოში სტარტაპ-ეკოსისტემის შექმნას  ემსახურება.  აღნიშნული პროექტის  ფარგლებში გამარჯვებულმა სტარტაპებმა  შეძლეს და საჭირო დაფინანსება  მოიზიდეს,  როგორც სილიკონ ველიდან,  ასევე  სხვადასხვა  ქვეყნებიდან.

ეკონომიკის  სამინისტროს მიერ  გავრცელებულ ინფორმაციაში წერია, რომ ინოვაციებისა და ტექნოლოგიების სააგენტოს თანადაფინანსების გრანტების პროგრამის  ფარგლებში, რომელიც  მსოფლიო ბანკის ,,ეროვნული ინოვაციების ეკოსისტემის პროექტის“ (GENIE) მხარდაჭერით ხორციელდება, ჯამურად 115 სტარტაპი დაფინანსდა. თითოეულ მათგანს 100 ათას ლარამდე ოდენობის გრანტი გადაეცა. პროგრამის მიზანია საქართველოში საერთაშორისო პოტენციალის მქონე ინოვაციური პროდუქტების და მომსახურების შემუშავება, მათი კომერციალიზაცია და ინოვაციური საწარმოების შექმნის სტიმულირება.

„კომერსანტი“ დაინტერესდა, რამდენად მნიშვნელოვანია საქართველოსთვის სილიკონ ველიდან მიღებული გრატი, რა ხდება იმ შემთხვევაში, როდესაც ქართული სტრატაპი სხვა  ქვეყნის დაფინანსებას იღებს და ხომ არ ტოვებენ Gita-ს მიერ დაფინანსებული სტარტაპები საქართველოს. როგორც ინოვაციებისა და  ტექნოლოგიების სააგენტოს თავჯდომარემ ავთანდილ კასრაძემ გვითხრა, Gita-ს გრანტის მიღების შემდეგ არც  ერთ სტარტაპს საქართველო არ დაუტოვებია და ისინი გლობალურ ინვესტიციას იღებენ. კომპანიის  გაყიდვის  ერთ-ერთი ყველაზე დიდი მაგალითი იყო  სტარტაპი Pulsar,  რომელიც მთლიანად ამერიკულ კომპანიაზე გაიყიდა, თუმცა 30-ივე  თანამშრომელი მუშაობას საქართველოდან აგრძელებს.

„ქართულ სტარტაპებს, რომელსაც ჩვენ ვაფინანსებთ, აქვთ  გლობალური ინვესტიცია, ამის  ყველაზე  დიდი მაგალითი  იყო  Pulsari-ის  შემთხვევა, როდესაც მთლიანად  კომპანია ამერიკულ კომპანიაზე გაიყიდა, თუმცა ეს არ  ნიშნავს, რომ  მთლიანად კომპანია  წავიდა ქვეყნიდან,  რადგან ის  30  თანამშრომელი, რომელიც პულსარს ჰყავს დასაქმებული, სამუშაოდ ამერიკულ კომპანიაში გადავიდა, თუმცა ისინი საქართველოდან მუშაობენ  და  აქ  ცხოვრობენ და პირიქით  ის ამერიკული  კომპანია  შემოვიდა საქართველოში. 

არ არსებობს  ეგეთი შემთხვევა, რომ  სტარტაპი  ადგეს და მეორე ქვეყანაში  თავისი თანამშრომლებით გადავიდეს. ეგეთი მოვლენა არც  ერთ  ქვეყანაში  არ  არსებობს. შეუძლებელი და ეკონომიკურად გაუმართლებელია, რომ  სტარტაპი, რომელსაც ჰყავს  30  თანამშრომელი,  თუ  5 თანამშრომელი, სიტყვაზე სან ფრანცისკოში გადავიდეს სამუშაოდ და  იცხოვროს იქ, სადაც ცხოვრების  უფრო  დიდი  ხარჯებია. პირიქით – რაც  ხდება ხოლმე, როდესაც  სტრატაპი ინტერნაციონალიზაციას აღწევს, მისი ხელმძღვანელი გადადის სილიკონ ველიში იმიტომ, რომ თავისი ბიზნესის  განვითარებისთვის უცხოელ მომხმარებლებთან იმუშაოს და უცხოელი პარტნიორები მოიძიოს, რადგან თუ  საქართველოში სტარტაპს  აქვს იმის  პოტენციალი, რომ  გახდეს მილიონიანი კომპანია, ამერიკაში ეს პოტენციალი მილიარდამდე იზრდება.

სილიკონ ველი  არის ტექნოლოგიური ეკოსისტემის  ცენტრი, ამიტომ  არ  ვფიქრობ, რომ საერთოდ  რამე  დამატებითი  ბერკეტი  ან  დამატებით  შეზღუდვებია დასაწესებელი იმისათვის, რომ ქართული სტარტაპები სხვა  ქვეყანაში არ წავიდეს, რადგან  თუ  ჩვენ  რამეს დავაწესებთ,  ეს  ნიშნავს  იმას,  რომ  სტარტაპს განვითარების შესაძლებლობას  არ  მივცემთ“, -  აღნიშნა ავთანდილ კასრაძემ.

თაკო კვაჭანტირაძე