„ქართული სატრანსპორტო პერსპექტივები სომხეთ-აზერბაიჯანის შეთანხმებით არანაირად არ იჩრდილება იმიტომ, რომ ეს არის რუსეთის მიერ კონტროლირებადი შეთანხმება, როცა უნდა დაბლოკავს, როცა უნდა გააგრძელებს. ლოჯისტიკაში ერთერთი მთავარი კომპონენტი არის სამარშუტო გზების საიმედოობა და იმას რასაც აკონტორლებს რუსეთი, ის არ არის საიმედო და აქედან გამომდინარე ნებისმიერ წუთში შეიძლება შეიცვალოს, ამიტომ ეკონომიკურად კონკურენტუნარიანი ვერ იქნება,“ - ამის შესახებ „კომერსანტთან“ საერთაშორისო ურთიერთობების ექსპერტმა ბათუ ქუთელიამ ისაუბრა.
კრემლში ვლადიმერ პუტინის, ნიკოლ ფაშინიანისა და ილჰამ ალიევის მოლაპარაკების შედეგად დაიგეგეგმა აღდგეს სატრანსპორტო დერეფანი აზერბაიჯანის ზანგილანის რაიონიდან დასავლეთით, სომხეთის ტერიტორიის გავლით ნახიჩევანის ავტონომიურ რესპუბლიკამდე, რომელსაც სახმელეთო საზღვრის მცირე მონაკვეთი თურქეთთან გააჩნია. ანუ აზერბაიჯანი საქართველოს გვერდის ავლით პირდაპირ სახმელეთო კომუნიკაციას გახსნის თურქეთთან. ხოლო აზერბაიჯანის გავლით სომხეთი საქართველოს გვერდის ავლით სარკინიგზო თუ საავტომობილო გზებით დაუკავშირდება რუსეთს. რას ნიშნავს ეს საქართველოს სატრანსპორტო პოტენციალისთვის? ამასთან დაკავშირებით ბათუ ქუთელია განმარტავს, რომ აქტი, რომელიც რუსეთის ინიციატივით ხორციელდება განწირულია კრახისთვის და საიმედოობის ფაქტორი არ აქვს, საქართველოს კი ამ მხრივ უალტერნატივო გზად რჩება ლოჯისტიკურ ინფრასტრუქტურაში ინტეგრაციის კუთხით ევროპასთან ინტეგრაცია.
„აქ მთავარი საკითხი არის ის, თუ რა ფორმით ხდება ეს ლოგისტიკური თუ ინფრასტრუქტურული ინტეგრაცია. ეს არის რუსეთის მიერ "სამშვიდობო ინიციატივის" ფარგლებში განხორციელებული ზომები. შესაბამისად, ეს აქტი, რომელიც რუსეთის ინიციატივით ხორციელდება თავის შინაარსობრივად განწირულია კრახისთვის იმიტომ, რომ ამას რუსეთი როგორც გეოპოლიტიკურ ბერკეტს ისე იყენებს და არაფერი საერთო ეკონომიკასთან , ინფრასტრუქტურასთან და ტრანსპორტირებასთან არ აქვს.
რაც შეეხება საქართველოს, ამ ფაქტით კიდევ ერთხელ დადასტურდა ის, რომ საქართველოსთვის ლოჯისტიკურ ინფრასტრუქტურაში ინტეგრაციის კუთხით ევროპასთან ინტეგრაცია არის უალტერნატივო. თუ საქართველო იქნება ევროპული ინფრასტრუქტურის ნაწილი, საპორტო-სარკინიგზო, საგზაო და საჰაერო კუთხით, საქართველო უფრო მიმზიდველი და ეკონომიკურად კონკურენტუნარიანი სატრანსპორტო გზა იქნება არა მარტო აზერბაიჯანისთვის ან სომხეთისთვის, არამედ ყველა სხვა სახელმწიფოსთვის, რომელსაც უნდა ევროპულ ან დასავლურ ბაზარზე წვდომა, ან პირიქით, მათ შორის ცენტრალურ აზიასაც ვგულისხმობს.
აქედან გამომდინარე ეს არის საქართველოს სტრატეგიული ამოცანა, რაც კიდევ ერთხელ დადასტურდა სწორედ ამით, რომ არც ერთ შემთხვევაში საქართველო რუსული გეოპოლიტიკური თამაშების ნაწილი არ უნდა გახდეს.
მეორე საკითხი, რომელიც აქ წარმოიშვება არის რუსეთის ინტერესი, რომ საქართველო რამენაირად მისებური სამხრეთ კავკასიური ხედვის ნაწილი გახადოს და საუბარი შეიძლება იყოს მომავალში რუსეთის მიერ ოკუპირებულ აფხაზეთის ტერიტორიაზე რკინიგზის გახსნაზე , იმისათვის, რომ სომხეთთან სატრანზიტო მოძრაობა აღდგეს.
ამ მოცემულობაში , რაც დღეს გვაქვს, ეს საქართველოსთვის, არანაირი სტრატეგიული ინტერესების მატარებელი არ არის ,იმ პირობებში როდესაც რუსეთის სქემის ნაწილი უნდა იყოს.
ამიტომ საქართველოს გზა არის შექმნას საიმედოობა და მერე უკვე ბაზარი დაარეგულირებს თუ რომელს აირჩევს მიმწოდებელი,“ - განმარტავს ბათუ ქუთელია.