წელს კომპანია „ჯორჯიან პროდაქტ რენესანსი“ პოლონეთში, ლიეტუვაში, ლატვიასა და ესტონეთში 10 ტონა პეკანის კაკლის ექსპორტს გეგმავს. როგორც კომპანიის ერთ-ერთი დამფუძნებელი ლევან ბოლქვაძე განმარტავს, პეკანი საქართველოში ნაკლებად პოპულარული კულტურაა, თუმცა დიდი საექსპორტო პოტენციალი აქვს.

„პეკანი საკმაოდ შემოსავლიანი კულტურა და ბიზნესია. იმედი გვაქვს, რომ ხალხი დაინტერესდება და პეკანის კაკლის ფართობებიც გაიზრდება. შესაბამისად, გაიზრდება საექსპორტო პოტენციალიც. ამ ეტაპზე პეკანის ფართობი საქართველოში 15 ჰექტარს არ აღემატება და ძირითადად აბაშის, ხობის, ლაგოდეხისა და ყვარლის რაიონებშია გაშენებული“,- განუცხადა „ბიზნეს ფორმულას“ ბოლქვაძემ.

პეკანი ისევე როგორც თხილი, ძირითადად საკონდიტრო წარმოებაში გამოიყენება და საერთაშორისო ბაზარზე მისი ფასი 7-დან 9 დოლარამდე მერყეობს. მსოფლიოში პეკანის კაკლის მთავარი მწარმოებელი მექსიკაა და როგორც ბოლქვაძე ამბობს, რეგიონში და მთლიანად პოსტსაბჭოთა სივრცეში ამ თვალსაზრისით საქართველოს კონკურენტი არ ჰყავს. მისი თქმით, ამ ეტაპზე საქართველოს მაქსიმუმი 150 ტონა (გაუტეხავი) პეკანის კაკლის წარმოებაა.

businessformula.ge