საქართველოს მეცხრე მოწვევის პარლამენტს უფლებამოსილების ვადა 31 ოქტომბერს ეწურება. ოთხი წლის წინ, 2016 წელს წინასაპარლამენტო არჩევნების დროს, ფრაქციამ „ქართული ოცნება-დემოკრატიული საქართველო“ მოსახლეობას სოციალური კეთილდღეობას და სწრაფ განვითარებას დაპირდა. თუმცა, მმართველობიდან ოთხი წლის შემდეგ მოსახლეობა შიმშილობის ზღვარზეა, ფასების საერთო დონე კი რეკორდულად იზრდება. „კომერსანტი“ დაინტერესდა ამ დროის განმავლობაში რა გააკეთეს მმართველი პარტიის დეპუტატებმა მთავარი დანაპირების - „კეთილდღეობის და სწრაფი განვითარების“ შესასრულებლად, რის გამოც ოთხი წლის წინ ამომრჩევლებს ხმას სთხოვდნენ. როგორ აფასებენ საკუთარ სიტყვას და საქმეს დეპუტატების სავარძლებიდან და რას ეუბნებიან ამომრჩევლებს.
„კომერსანტი“ აგრძელებს სტატიების ციკლს, სახელწოდებით — რა წვლილი შეიტანა ქართველი ხალხის კეთილდღეობასა და სწრაფ განვითარებაში თითოეულმა დეპუტატმა ამ ოთხი წლის განმავლობაში. ამჯერად „კომერსანტი“ „ქართული ოცნების“ პარტიიდან გასულ დეპუტატებს დაუკავშირდა.
დეპუტატი გედევან ფოფხაძე „კომერსანტთან“ საუბრისას აღნიშნავს, რომ „ქართულმა ოცნებამ“ დანაპირები არ შეასრულა და სლოგანი „კეთილდღეობა და სწრაფი განვითარება“ კორუფციამ, ფულის კეთების სურვილმა ჩაანაცვლა.
„რა თქმა უნდა ეს დანაპირები „ქართულმა ოცნებამ“ ვერ შეასრულა. დანაპირები „კეთილდღეობა და სწრაფი განვითარება“ კორუფციამ ჩაანაცვლა. მე ბევრ საკითხში არ ვეთანხმებოდი მათ და სწორედ ეს აღმოჩნდა ჩემი პარტიიდან წამოსვლის მიზეზი, ჩემი შეხედულებების დასაცავად უშიშროებასთან და სხვა პოლიტიკოსებთან დაპირისპირებაც კი მიწევდა. თავიდან კარგად დავიწყეთ, მაგრამ შემდეგ ჩამოყალიბდა პოლიტიკური კლანი, რომელსაც ფულის კეთება სურდათ და ხალხი საერთოდ არ აინტერესებდათ, მათ შორის კახი კალაძე, უჩა მამაცაშვილი და სოსო გოგაძე იყო. მათ არ აინტერესებდათ არჩევნებამდე მიცემული დანაპირები. „ქართული ოცნების“ პოლიტიკური მანდატი, რომელიც ხალხმა მათ უბოძა, კორუმპირებულმა ადამიანებმა მოიპარეს და ხალხის დასაჩაგრათ გამოიყენეს. ამ ყველაფერს რომ არ დავეთანხმე ამიტომ რამდენიმემ დავტოვეთ მათი რიგები, თუმცა სახლში წასვლის ნაცვლად გადავწყვიტეთ მათთვის პასუხი მოგვეთხოვა. ხალხმა „ქართულ ოცნებას“ შეუკვეთა ერთი და მიიღო მეორე, კოალიცია სულ სხვა პირობით მოვიდა და სხვა მოცემულობა მივიღეთ. „ქართულ ოცნებაში“ კრიმინალურმა დაჯგუფებებმა იმძლავრეს და ჩვენც გვითხრეს თუ ასეთი რეფორმები არ მოგვწონდა შეგვეძლო წავსულიყავით“, - განმარტავს გედევან ფოფხაძე.
დეპუტატი მარიამ ჯაში თვლის, რომ „ქართულმა ოცნებამ“ დანაპირების მხოლოდ ნაწილი შეასრულა, მიუხედავად კარგი დასაწყისისა პარტიამ საბოლოოდ ვერ მოახერხა, რომ ხელშესახები ცვლილებების მოტანა თითოეული ოჯახისთვის, სწორედ ასეთი მიდგომა გახდა მისთვის პარტიის დატოვების მიზეზი.
„ქართული ოცნების“ გუნდს რომ ვუერთდებოდი, ეს იყო პერიოდი როცა მთავარი აქცენტი ნამდვილად იყო ოჯახების კეთილდღეობა და მათი პირობების გაუმჯობესება, ამიტომ მე ვარ ამაყი იმით, რაც მაშინ გავატარეთ. 2012 წლიდან პირველი პერიოდი ხალხზე ორიენტირებული პოლიტიკის გატარების პროცესი იყო, მათ შორის ჯანდაცვის ხელმისაწვდომობის პროგრამის კუთხითაც. თუმცა, აშკარაა რომ ეკონომიკის ზრდის პროცესები სათანადოდ ვერ იქნა მიღწეული, იმისათვის რომ ჩვენ შეგვძლებოდა ხელშესახები ცვლილებების მოტანა თითოეული ოჯახისთვის. არც ერთი ქმედითი ინიციატივა ბოლო პერიოდში არ იქნა გადადგმული, სწორედ ეს გახდა იმის მიზეზი, რომ ჩვენ დაგვეტოვებინა ეს გუნდი. საქართველოს აქვს ბევრად მეტი რესურსი, რომ ეკონომიკა გაძლიერდეს და სამართლიანი გახდეს მისი საგადასახადო სისტემა, უფრო ეფექტური გახდეს საშემოსავლო ადმინისტრირება და რაც მთვარია უფრო მეტი აქცენტი გაკეთდეს სოციალური გაუმჯობესებისთვის. ამიტომ ვფიქრობ, რომ ქართულმა ოცნებამ დანაპირების მხოლოდ ნაწილი შეასრულა“, - აცხადებს მარიამ ჯაში.