„ქართული ოცნების“ დაპირება  საყოველთაო ინტერნეტიზაციის შესახებ ჩავარდნის პირასაა

„ქართული ოცნების“ დაპირება საყოველთაო ინტერნეტიზაციის შესახებ ჩავარდნის პირასაა

access_time2019-05-09 21:37:42

რეზიუმე: ქვეყნის ინტერნეტიზაციის პროექტის (რომლის შედეგადაც 2020 წლისთვის მოსახლეობის 90%-ს უნდა ჰქონდეს ინტერნეტზე წვდომა) განხორციელება 2016 წლის ივლისში ა(ა)იპ „ოუფენ ნეტს“ დაევალა. ორგანიზაციაში აცხადებენ, რომ ამჟამად მიმდინარეობს ინფრასტრუქტურის კომპონენტზე მუშაობა, რომლის ფარგლებშიც, ოპტიკურ-ბოჭკოვანი მაგისტრალების პროექტირება - მშენებლობის მიზნით, გამოცხადებულია სახელმწიფო შესყიდვა, თუმცა, სახელმწიფო შესყიდვების სააგენტოს ვებ-გვერდზე „ოუფენ ნეტის“ მიერ გამოცხადებული მსგავსი შესყიდვა არ იძებნება.


გარდა ამისა, ოპტიკური ქსელის გაყვანა ჯერ არც ერთ სოფელში არ დაწყებულა. „ოუფენ ნეტს“ არ აქვს პასუხი კითხვაზე, მოხერხდება თუ არა 2019 წლის ბოლომდე საქართველოს რომელიმე რეგიონში კაბელის გაყვანა. უცნობია სოფლების ინტერნეტიზაციის დასრულების თარიღიც.



ანალიზი


2016 წლის 8 სექტემბერს, წინასაარჩევნო პერიოდში, „ქართულმა ოცნებამ“ საარჩევნო პროგრამის პრეზენტაცია გამართა. პროგრამაში ერთ-ერთი განსაკუთრებული ადგილი დაეთმო ინფრასტრუქტურულ განვითარებას, რომლის ფარგლებშიც პარტია მოსახლეობას სრულ ინტერნეტიზაციას დაჰპირდა. პროგრამაში აღნიშნულია, რომ „აშენდება 8 000 კილომეტრიანი ინფრასტრუქტურა, რის შედეგადაც დამატებით 800 ათასი ადამიანი მიიღებს ინტერნეტს. შედეგად, ქვეყნის მოსახლეობის 90%-ზე მეტს ექნება ინტერნეტზე წვდომა“. აღნიშნული პროექტი გაწერილია როგორც 2016-2020 წლების სამთავრობო პროგრამაში, ასევე 2018 წლის სახელმწიფო საბიუჯეტო კანონში.


2016 წლის ივლისში მთავრობის სხდომაზე საქართველოში ფართოზოლოვანი, ოპტიკურ-ბოჭკოვანი ინფრასტრუქტურის განვითარების სახელმწიფო პროგრამა დამტკიცდა. „ოუფენ ნეტის“ ვებ-გვერდზე განთავსებული ინფორმაციის თანახმად, პროექტის განსახორციელებლად, საერთაშორისო საქველმოქმედო ფონდ „ქართუს“ ფინანსური მხარდაჭერითა და საქართველოს ეკონომიკის სამინისტროს „ინოვაციებისა და ტექნოლოგიების სააგენტოს“ ინიციატივით შეიქმნა ა(ა)იპ „ოუფენ ნეტი“, რომელსაც აღნიშნული პროექტის განხორციელება დაევალა. პროექტის შედეგად, 2020 წლისთვის მოსახლეობის 90%-ს უნდა ჰქონდეს მინიმუმ 15 MB-იან ინტერნეტზე წვდომა. თუმცა, აღსანიშნავია, რომ საჯარო რეესტრის ეროვნული სააგენტოს ამონაწერისმიხედვით, ა(ა)იპ „ოუფენ ნეტი“ 2015 წლის 21 ივლისს დარეგისტრირდა. ინფორმაცია იმის შესახებ, თუ რას საქმიანობდა ეს უკანასკნელი ინტერნეტიზაციის პროექტის ოფიციალურად დამტკიცებამდე, ინტერნეტსივრცეში არ იძებნება. სახელმწიფო შესყიდვების სააგენტოს ელექტრონულ სისტემაში განთავსებული შესყიდვების თანახმად, „ოუფენ ნეტი“ შესყიდვებს 2015 წლის აგვისტოდან ახორციელებს. პირველი შესყიდვა კვლევასა და განვითარებასთან დაკავშირებულ საკონსულტაციო მომსახურებებთანაა დაკავშირებული, ხოლო ყველა დანარჩენი საოფისე სახისაა (საოფისე მანქანა-დანადგარებისა და აღჭურვილობის, ავეჯის, კომპიუტერული მოწყობილობებისა და აქსესუარების, საყოფაცხოვრებო ტექნიკის შეძენა და სხვა).



2016 წლის სექტემბერში ცნობილი გახდა, რომ ქვეყნის ინტერნეტიზაციის პროექტის პირველი ეტაპის სამუშაოები დაიწყო. „ოუფენ ნეტის“ დირექტორი, ნინო ქუბინიძე, საბანკო სექტორისა და სატელეკომუნიკაციო ოპერატორების წარმომადგენლებს შეხვდა. მხარეებთან კონსულტაციები 2016 წლის 30 სექტემბერს უნდა დასრულებულიყო, რის შემდეგაც, უმოკლეს ვადაში, გამოცხადდებოდა კონკურსი. აღნიშნულის შესახებ გაზეთ „კომერსანტთან“ კომენტარი გააკეთა კომუნიკაციების მარეგულირებელი ეროვნული კომისიის წევრმა, კახა ბექაურმაც. მისი განცხადების თანახმად, პირველ ეტაპზე არსებული ოპერატორებისგან ინფორმაციის მიღება ხდება (თუ რა გეგმები აქვთ მათ კონკრეტულ რეგიონებთან მიმართებით უახლოეს 3 წელიწადში) და სახელმწიფო მხოლოდ იმ ადგილებში შევა, სადაც კერძო ბიზნესი არ იქნება. ბექაურის თქმით, უნდა შექმნილიყო საქართველოს რუკა, რის შემდეგაც „ოუფენ ნეტი“ გამოაცხადებდა ტენდერს სამუშაოების შესრულების შესახებ. ინფორმაცია „ოუფენ ნეტის“ მიერ მსგავსი ტენდერის გამოცხადების შესახებ სახელმწიფო შესყიდვების სააგენტოს ელექტრონულ სისტემაში არ იძებნება. თავად „ოუფენ ნეტის“ ოფიციალურ ვებ-გვერდზეგანთავსებული ინფორმაციის თანახმად, პროგრამით გათვალისწინებული პირველი ეტაპი - ფინანსური ხელშეწყობის კომპონენტი დასრულებულია. ამჟამად მიმდინარეობს მეორე, ანუ ქსელის მშენებლობის კომპონენტზე მუშაობა. თუმცა, აღნიშნული ინფორმაცია 2016 წლის დროინდელია. 2018 წლის 10 მაისს „ოუფენ ნეტის“ ვებ-გვერდზე განთავსებული განცხადების თანახმად, ოპტიკურ-ბოჭკოვანი მაგისტრალების პროექტირება-მშენებლობის მიზნით, ა(ა)იპ „ოუფენ ნეტმა“ სახელმწიფო შესყიდვა გამოაცხადა, რომლის დასრულების ბოლო ვადადაც 2018 წლის 30 მაისი განისაზღვრა. თუმცა, სახელმწიფო შესყიდვების სააგენტოს ელექტრონულ სისტემაში მსგავსი შესყიდვა პროექტის მიმდინარეობის შესახებ უახლესი ცნობები არ არის ხელმისაწვდომი. ვებ-გვერდზე უკანასკნელი სიახლე 2016 წლის 11 ნოემბერს განთავსდა, რომელიც დირექტორ ნინო ქუბინიძის საქართველოს კიბერუსაფრთხოებისა და ინფორმაციული ტექნოლოგიების განვითარების IX რეგიონულ კონფერენციაში მონაწილეობის მიღებას იტყობინება.


ინტერნეტიზაციის პროექტის მიმდინარეობის შესახებ კითხვით ფაქტ-მეტრმა „ოუფენ ნეტს“ ელექტრონული ფოსტის საშუალებით 2018 წლის 7 აგვისტოს მიმართა, თუმცა პასუხი დღემდე არ მიგვიღია. იმავე შინაარსისწერილი ფაქტ-მეტრმა „ოუფენ-ნეტს“ 29 ოქტომბერსაც გაუგზავნა მათივე ვებ-გვერდზე მითითებულ მისამართზე, თუმცა ადრესატამდე ვერ მიაღწია, რის მიზეზადაც ფოსტა არასრულ მისამართს ასახელებს.


საყოველთაო ინტერნეტიზაციის პროექტისა და მისი მიმდინარეობის საკითხს 2018 წლის 18 ივლისსგამოეხმაურა „ახალგაზრდა ფინანსისტთა და ბიზნესმენთა ასოციაცია“, რომელსაც „ოუფენ ნეტში“ უპასუხეს, რომ მიმდინარეობს ინფრასტრუქტურის კომპონენტზე მუშაობა, რომლის ფარგლებშიც, ოპტიკურ-ბოჭკოვანი მაგისტრალების პროექტირება-მშენებლობის მიზნით, გამოცხადებულია სახელმწიფო შესყიდვა. გარდა ამისა, განაცხადეს, რომ ოპტიკური ქსელის გაყვანა ჯერ არც ერთ სოფელში არ დაწყებულა. „ოუფენ ნეტს“ არ გააჩნია პასუხი კითხვაზე, მოხერხდება თუ არა 2019 წლის ბოლომდე საქართველოს რომელიმე რეგიონში კაბელის გაყვანა. უცნობია სოფლების ინტერნეტიზაციის საბოლოო დასრულების თარიღიც. „ოუფენ ნეტში“ ასევე განაცხადეს, რომ ორი წლის განმავლობაში არანაირი თანხები არ დახარჯულა, მხოლოდ გარკვეული პერიოდის შემდეგ იგეგმებოდა 19 050 000 ლარის დახარჯვა ოპტიკურ-ბოჭკოვანი ინფრასტრუქტურის ასაშენებლად ოთხ ლოტზე. პროექტთან დაკავშირებული კითხვით საქართველოს ეკონომიკის სამინისტროს „ნეტგაზეთმაც“ მიმართა, სადაც განაცხადეს, რომ ამ ეტაპზე მუშაობა მოდელის შერჩევაზე მიმდინარეობს, ინფრასტრუქტურული სამუშაოები კი ჯერ არ დაწყებულა. სამინისტროს პრესსამსახურის განცხადების თანახმად, ინფრასტრუქტურის მშენებლობის დაწყების გაჭიანურება საკითხის კომპლექსურობას უკავშირდება, ვინაიდან მასში ჩართულია როგორც სახელმწიფო, ასევე კერძო სექტორი. გარდა ამისა, სამინისტრო არ ასახელებს თანხის ოდენობას, რაც ამ დრომდე პროექტზე გაიხარჯა. აღნიშნული ინფორმაციის თანახმად ნათელია, რომ 2 წლის განმავლობაში „ოუფენ ნეტი“ თანხებს მხოლოდ ხელფასებზე ხარჯავდა.


საყოველთაო ინტერნეტიზაციის პროექტის გარშემო მიმდინარე მოვლენების ანალიზის შედეგად ცხადი ხდება, რომ ის ჩავარდნის პირასაა. თუმცა, ვინაიდან პროექტის შესრულების ბოლო ვადად 2020 წელია დათქმული, ფაქტ-მეტრი ვერდიქტისგან თავს იკავებს და დაპირების შესრულება/შეუსრულებლობის საკითხს მომავალში კიდევ დაუბრუნდება.


factcheck.ge






თავისუფლების მოედანზე სასტუმრო „მონოგრაფი“ დეკემბერში გაიხსნება

თავისუფლების მოედანზე სასტუმრო „მონოგრაფი“ დეკემბერში გაიხსნება
access_time2019-11-12 17:50:48
თავისუფლების მოედანზე  5-ვარსკვლავიანი სასტუმრო “მონოგრაფი“, რომლის გახსნა  აგვისტოში იგეგმებოდა პირველ სტუმარს დეკემბერში მიიღებს.  ამის შესახებ „კომერსანტს“ „მონოგრაფის“ პრესსამსახურში განუცხადეს.სასტუმროს ფასადი კულტურული მემკვიდრეობის ძეგლს წარმოადგენს, რის გამოც სარესტავრაციო სამუშაოების დასრულება გაჭიანურდა. როგორც ცნობილია, სასტუმროში  100 ადამიანი დასაქმდება. პროექტის განმახორციელებელი  დეველოპერული  კომპანია Well House-ია. მაღალი...

გიორგი კერპულაძე-„შემოსავალი რაშიც გვაქვს, იმ ვალუტაში დავზოგოთ“

გიორგი კერპულაძე-„შემოსავალი რაშიც გვაქვს, იმ ვალუტაში დავზოგოთ“
access_time2019-11-12 17:30:57
„ანაბრების არსებობა მნიშვნელოვანია ეკონომიკისთვის. ბანკი ანაბრებს იზიდავს და შემდგომ გასცემს სესხებს, შესაბამისად, რაც უფრო მეტი თანხა იზოგება ლარში, მით უფრო მეტი საშუალებაა,რომ ეკონომიკა დაკრედიტდეს და უცხოეთიდან არ შემოვიტანოთ თანხა,“ - აღნიშნავს რადიო კომერსანტის რუბრიკა ფინანსურ მრჩეველში გიორგი კეპულაძე. მისი ინფორმაციით, არსებობს რამდენიმე ტიპის ანაბარი, მათ შორისაა, ვადიანი ანაბარი, როცა დიდ თანხას ვდებთ ბანკში და მას გარკვეული დროის შემდეგ პროცენტი...

„სპარი“ლოჯისტიკურ ცენტრს აამოქმედებს

„სპარი“ლოჯისტიკურ ცენტრს აამოქმედებს
access_time2019-11-12 16:00:01
„დამოუკიდებელი დილერების სიცოცხლისუნარიანობა დაღმავალ ტრენდს აჩვენებს“-ამის შესახებ „სპარის“ მმართველმა დირექტორმა მირანდა მანჯგალაძემ პირველი არხის გადაცემა „ბიზნესპარტნიორში“ განაცხადა.მისი განმარტებით, ამის გათვალისწინებით, „სპარი“ უბნის მაღაზიის ტიპის ბიზნესებს თავის პირობებს სთავაზობს, რაც ფრანჩიზაში გამოიხატება. „ვყიდით ერთგვარად ბრენდს, მათ შეუძლიათ „სპარის“ ბრენდით ისარგებლონ“, – აცხადებს მანჯგალაძე. მისივე განცხადებით, 2020 წლიდან იგეგმება...

ლალი მოროშკინა: „სიღნაღი დაცლილია, არ შეიძლება სეზონზე ჩურჩხელა 10 ლარი ღირდეს, ხოლო ხაჭაპური 25 ლარი“

ლალი მოროშკინა: „სიღნაღი დაცლილია, არ შეიძლება სეზონზე ჩურჩხელა 10 ლარი ღირდეს, ხოლო ხაჭაპური 25 ლარი“
access_time2019-11-12 15:00:28
ჟურნალისტი და პიარ-ტექნოლოგი ლალი მოროშკინა სიღნაღში ორი სასტუმროს (Sighnaghi Art Hotel და Villa Provance) მფლობელია, რომლებიც განსაკუთრებული პოპულარობით უცხოელ ტურისტებში სარგებლობს. ლალი მოროშკინა წლევანდელი სეზონის ჩავარდნაზე და სიღნაღში არსებულ მძიმე მდგომარეობაზე „კომერსანტს“ ესაუბრა. „რუსეთის მიერ ფრენების შეწყვეტამ და ტურისტული სეზონის დასრულებამ, ძალიან იმოქმედა ჩემს სასტუმროზე და ზოგადად, სიღნაღში არსებულ სასტუმროებზე. რა თქმა უნდა მთავარი პრობლემა არა...

BAG-ის ორგანიზებით, ასოციაციის წევრი კომპანიები შრომის კანონმდელობაში დაგეგმილი ცვლილებების შესახებ იმსჯელებენ

BAG-ის ორგანიზებით, ასოციაციის წევრი კომპანიები შრომის კანონმდელობაში დაგეგმილი ცვლილებების შესახებ იმსჯელებენ
access_time2019-11-12 12:45:38
საქართველოს ბიზნეს ასოციაციის (BAG) ორგანიზებით, ასოციაციის წევრი კომპანიები შრომის კანონმდელობაში დაგეგმილი ცვლილებების განსახილველად დღეს კიდევ ერთხელ შეიკრიბებიან. შეხვედრის ფარგლებში განხილული იქნება, როგორც საკანონმდებლო ცვლილებების მომზადების პროცესი, ასევე ამ ცვლილებებთან დაკავშირებული მთელი რიგი პრობლემატური საკითხები, მათ შორის: ვადიანი შრომითი ხელშეკრულების დადების საფუძვლების შეზღუდვა; სტაჟირების დაქვემდებარება შრომის კოდექსით განსაზღვრული სტანდარტებისადმი;...


მსგავსი სიახლეები

up