„მალე, უნდა ველოდოთ შემდეგი „მონოგრაფების“ გახსნას  სხვადასხვა  ქალაქებში. პირველ ეტაპზე საქართველოს მასშტაბით განვავითარებთ სასტუმროების ქსელს, ხოლო შემდგომში ვიფიქრებთ საზღვარგარეთაც,“ – „კომერსანტს“ ამის შესახებ „მონოგრაფის“ მფლობელმა ანტონ ობოლაშვილმა ინტერვიუში განუცხადა.

„მონოგრაფი“ თავისუფლების მოედანზე ბუტიკური „ლაქშერის“ ტიპის სასტუმროა, სადაც ერთიანდება 36 ნომერი, ტერასა, რესტორანი „სომინი“. სასტუმრო მიმდინარე წლის თებერვალში პანდემიამდე გაიხსნა.  როგორც ანტონ ობოლაშვილი განმარტავს, ეს არის ქართული ბრენდი ქართული ინვესტიციით, რომლის განვითარება გლობალური სიტუაციის დარეგულირების შემდეგ საზღვარგარეთაც იგეგმება.

„მონოგრაფი“ და იქვე ქართული რესტორანი „სომინი“ ცოტა ხნის წინ გავხსენით. „სომინი“ ბევრს უცხოური სიტყვა ჰგონია, მაგრამ მომდინარეობს მესხური სიტყვიდან - ასე უწოდებენ ქვის თონეში ტრადიციული მეთოდით გამომცხვარ მესხურ პურს. ამ რესტორნის მეშვეობით, მეტი წვლილი გვინდა შევიტანოთ მესხური სამზარეულოს პოპულარიზაციაში.

„მონოგრაფი“ არის ქართული ბრენდი, სრულიად ქართული ინვესტირებით და ბოლო დროს მთელი ქვეყნის ერთერთი ყველაზე წარმატებული პროექტია.   ველოდებით ახალ „მონოგრაფებს“, მთავარია პანდემია დავამარცხოთ, ტურისტი შემოვიდეს.  კი, არის შიდა ტურიზმის სტიმულირება ქვეყანაში, მაგრამ ეს არ არის საკმარისი სწრაფი განვითარებისთვის,“ - განმარტავს ბიზნესმენი.

ამჟამად, სასტუმროს მენეჯმენტში ჩართულია შვეიცარული საკონსულტაციო კომპანია „დევპორტი“ და მისი წარმომადგენელი მანუელ ლოხერი. „მონოგრაფის“  გუნდი სწორედ  კომპანიასთან ერთად მუშაობს მიმდინარე და სამომავლო პროექტებზე.

ანტონ ობოლაშვილი ამჟამად ბიზნესების პარალელურად სამცხე-ჯავახეთის რეგიონში „ქართული ოცნების“ მაჟორიტარობის კანდიდატია.

„კომერსანტის“ ექსკლუზური ინტერვიუ ანტონ ობოლაშვილთან შეგიძლიათ იხილოთ ლინკზე.

მარიამ მორგოშია