ციფრული ტექნოლოგიების ეპოქაში ადამიანები ყოველდღიურად ახალ-ახალი გამოწვევების წინაშე დგანან. ხელოვნური ინტელექტი და რობოტები ბევრ რუტინულ და ფიზიკურ სამუშაოს ანაცვლებენ და ადამიანები სამუშაოს გარეშე რჩებიან. როგორც IT აკადემია სტეპის დამფუძნებელმა მაკა მახათაძემ რადიო „კომერსანტის“ ეთერში ლევან კობერიძის გადაცემაში „ბრენდი საქართველო“ განაცხადა, ამ პირობებში აუცილებელია, რომ ადამიანმა ახალ გარემოსთან სწრაფად ადაპტირება, ახალი უნარების გამომუშავება და ახალი პროფესიების დაუფლება შეძლოს.
მისივე თქმით, დღეს ძალიან მნიშვნელოვანია, რომ ახალ ციფრულ სამყაროში ქვეყანამ თავისი ადგილი იპოვოს და თავისი სტრატეგია აირჩიოს.
როგორც მაკა მახათაძემ გადაცემაში საუბრისას აღნიშნა, ამ სფეროში მთავარი პრობლემები კვალიფიციური პედაგოგების დეფიციტი და შესაბამისი საკვალიფიკაციო ჩარჩოების არარსებობაა.
მაკა მახათაძის თქმით, უნდა არსებობდეს სასწავლო პროფესიის სტანდარტები, რისი სწავლის პასუხისმგებლობასაც აიღებს ტრენინგ-ცენტრი და სტუდენტებსაც ამ სტანდარტების მიხედვით მოამზადებს. თუ ქვეყანაში შემოსული საერთაშორისო კომპანიები ადგილზე პროფესიონალებს ვერ იპოვიან, ანუ თუ მათ ადამიანური კაპიტალი მზად არ დახვდებათ, საქართველო შეიძლება შავ სიაში აღმოჩნდეს.
„ახლა ჩვენ ისეთ ერაში ვართ, რომ უნდა მოვამზადოთ ახალი ტექნოლოგიებით აღჭურვილი ახალგაზრდობა, რომ ამ თაობამ ბიზნესში ცვლილებები შეიტანოს, რომელიც ბიზნესის ოპტიმიზირებას შეუწყობს ხელს და მას მეტ ხარისხზე გაიყვანს. ის ბიზნესი, რომელიც ციფრულ-ტრანსფორმაციას არ იყენებს, კონკურენტუნარიანი ვერ იქნება და მოკვდება“, - მაკა მახათაძე.