ქართული კომპანია „სიო“ საქართველოში წარმოებულ ერთჯერად პირბადეებს ექსპორტზე დუბაისა და აზერბაიჯანში გაიტანს. ამის შესახებ „კომერსანტს“ კომპანიის დამფუძნებელი გიორგი გოგეშვილმა ესაუბრა.
გიორგი გოგეშვილის თქმით, თუკი სხვადასხვა ობიექტები ხელსახოცებით და ანტისეპტიკური ხსნარებით არის უზრუნველყოფილი, კარგი იქნებოდა არსებობდეს ერთჯერადი პირბადე, რომელიც მომხმარებელს ადგილზე დახვდება, ეს ერთის მხრივ ბიზნესისთვისაც კარგია, რათა პირბადის არქონის გამო არ დაკარგავს მომხმარებელს და თვითონ მომხმარებლების კომფორტისთვისაც. სწორედ აქედან გაჩნდა ბიზნესის წარმოების იდეაც, რომელმაც ძალიან გაამართლა.
„მეგობართან ერთად მივირთმევდი ბურგერს და ვიფიქრე, თუ არსებობს ხელსახოცი რომლსაც ობიექტი უზრუნველყოფს რატომ არ შეიძლება პირბადეც იყოს ასეთი, თუ შესასვლეში ანტისეპტიკს ასხამს, ხელთათმანს და ტუალეტის ქაღალდს ითვალისწინებს, პირბადესაც უნდა ითვალისწინებდეს. ვფიქრობდით, რა შეიძლება იყოს ყველაზე მარტივი და იაფი ვარიანტი, ამოვიღეთ რეზინები, რკინები და მარტივი ფორმით მივიღეთ დიზაინი“, — განმარტავს გიორგი გოგეშვილი.
მიუხედავად იმისა, რომ საქართველოში არაერთი ობიექტი უკვე სარგებლობს „სიოს“ პროდუქციის, კომპანიის დამფუძნებელი ამბობს, რომ უფრო დიდი დაინტერესება მაინც ექსპორტზეა.
„ყველაზე დიდი დაინტერესება მაინც ექსპორტზეა და ძირითადად ამ მიმართულებით ვმუშაობთ, რამდენიმე სადისტრიბუციო კომპანიამ დუბაიში და აზერბაიჯანში გატანა შემოგვთავაზა. რაც შეეხება საქართველოს ბაზარს, მოთხოვნამ ჩვენ მოლოდინს გადააჭარბა, ასეთ გამოხმაურებას არ ველოდით. ვფიქრობდით, რომ ბაზარზე უფრო ნელ-ნელა შემოვიდოდით. ამ ეტაპზე ჩვენი პროდუქცია მიეწოდება „ფირინს“, რესტორან „ქვევრს“, „ფიატისა და ჯიპის“ ცენტრს, რესტორან „ფუნიკულიორს“, სილამაზის სალონ „დალალებში“ და აუდიტორულ კომპანია BDO-ს“, — განაცხადა გიორგი გოგეშვილმა.
კომპანია „სიოსთვის“ ტრანსპორტი პრიორიტეტულია, ამიტომ იმ შემთხვევაში თუ რომელიმე სატრანსპორტო კომპანია თანამშროლობისთვის მზადყოფნას გამოთქვამს, კომპანია „სიო“ მზად არის რომ პროდუქცია სიმბოლურ ფასად შესთავაზოს.
აღსანიშნავია, რომ სიოს წარმოებული პირბადეები 100% ეკომეგობრულია და ბიო დეგრადირებადი მასალისგან მზადდება. 1 შეკვრაში 160 ცალი პირბადეა და 25 ლარი ღირს. კომპანიის საწარმო თბილისში მდებარეობს, მას ამ ეტაპზე 10 ადამიანი ყავს დასაქმებული.
თაკო კვაჭანტირაძე