ქართულმა კომპანიამ GlenBerries- მა, ახალი და გაყინული ხილისა და ბოსტნეულის პროდუქტების მწარმოებელმა, სექტემბერში მიიღო შეკვეთა, რომ მომდევნო ექვსი თვის განმავლობაში შეერთებულ შტატებს 1080 ტონა გაყინული ქაშერული ბოსტნეულის სალათი მიეწოდოს. ქართული კომპანია GlenBerries-ის დირექტორი რაფაილ მაღალაშვილი ამერიკულ შეკვეთაზე და სამომავლო გეგმებზე east-fruit.com-თან ინტერვიუში საუბრობს.
-იყენებს თუ არა თქვენი კომპანია ამერიკული შეკვეთის შესასრულებლად მხოლოდ ქართულ ნედლეულს?
-60% ადგილობრივია, ხოლო 40% - იმპორტირებული, ძირითადად თურქეთიდან. კერძოდ, სალათის შემადგენლობაში სტაფილო, ბროკოლი, ფერადი კომბოსტო და 3 ნაირსახეობის ტკბილი წიწაკა შედის. სწორედ მწვანე და ყვითელი წიწაკა იმპორტირებულია, რადგანაც საქართველოში შესაბამისი ხარისხის პროდუქტი ვერ ვიშოვეთ. ყველაფერი დანარჩენი - ჩვენი მოყვანილია.
არსებული შეკვეთის თანახმად, შტატებში სალათის 2 პარტია უნდა გავაგზავნოთ, თითო 540 ტონა. რაოდენობიდან გამომდინარე გვიწევს ბოსტნეულის გლეხებისგან შესყიდვა. ჩვენ ვეძებთ ფერმერებს, ვისთანაც გრძელვადიანი თანამშრომლობა შესაძლებელი იქნება, თანაც გარკვეული საერთაშორისო სტანდარტების დაცვით.
-მიწის რა ნაკვეთებს ფლობს კომპანია და გეგმავთ თუ არა გაფართოვებას?
-სადღეისოდ ყველა ჩვენი ნაკვეთი ქარელის რაიონში მდებარეობს. ბოსტნეული 5,5 ჰექტარზე მოგვყავს, სათბურებში და მწერებისგან დამცავი ბადეებით. წლის ბოლომდე ამ ფართობის 8 ჰექტარამდე გაზრდას ვგეგმავთ. კიდევ 11 ჰექტარზე კენკროვანი კულტურებია დარგული, ამჟამად ამას კიდევ 7 ჰექტარს ვუმატებთ. კიდევ 25 ჰექტარი შტატებთან და ისრაელთან თანამშრომლობისთვის გვჭირდება მომავალო წლისთვის.
გარდა ამის, ჩვენ კიდევ 300 ჰექტარის აღება გვინდა სხვადასხვა ხილ-ბოსტნეულის მოსაყვანად. ჩვენი პარტნიორები მზად არიან პროექტში 61 მლნ. დოლარის ჩადებისთვის, თუმცა, პრობლემა იმაშია, რომ შესაფერისი მიწა დღემდე ვერ მოვიძიეთ. თვეების მანძილზე მთავრობას დახმარებას ვთხოვდით, მაგალითად, სახელმწიფოს ბალანსზე მყოფი მიწების იჯარით აღების უფლებას. თუმცა, არავინ არც ხელს გვიშლის, მაგრამ არც გვეხმარება.
მოთხოვნა გაყინულ პროდუქტებზე სწრაფად იზრდება, მაგრამ ჩვენ შეკვეთებზე უარის თქმა გვიწევს იმის გამო, რომ ნედლეული არ გვყოფნის.
-თქვენი ინვესტორები ებრაელები არიან?
დიახ. შტატებში მილიონობით ებრაელი ცხოვრობს და მათ შესაფერისი კვება სჭირდებათ. ადრე ჩინელებთან მუშაობდნენ, დღეს კი ალტერნატიულ მიმართულებებს ეძებენ. მათ შორის საქართველოსაც. ჩვენ ეს აუცილებლად უნდა გამოვიყენოთ.
-როგორია თქვენ აზრით ქართული ხილ-ბოსტნეულის ხარისხი?
-მთლიანი მასა რომ შევაფასოთ, ძალიან ბევრი უხარისხოა, თანაც ძალიან ძვირი. ეს ცუდია, იმიტომ რომ საქართველო კონკურენტუნარიანი უნდა იყოს. ვფიქრობ, სანამ წარმოება არ გაიზრდება, ფასებიც არ დაეცემა.
-რამდენია ბიზნესში ჩადებული ინვესტიციები?
-ჩვენ ავაშენეთ სამაცივრე მეურნეობა, რომელიც 3 მლნ. დოლარი დაჯდა. ბოსტნეულის და კენკრას მოყვანაში კიდევ 800 000 დოლარი დაიხარჯა. ასევე 2020 წლის ბოლოსთვის ჩვენ ხახვის და ნიორის გადამამუშავებელი ქარხანა აშენდება. საწარმო უკვე აშენებულია და მდებარეობს აეროპორტთან.
პროექტი მთავრობის დახმარებით ხორციელდება, და მისი ძირითადი პროდუქცია დაფასოებული ხახვი და ნიორი, რომელიც ამერიკაში და ისრაელში ძალიან მოთხოვნადია. აქვე კარტოფილის ჩიფსების წარმოება დაიწყება.
east-fruit.com
თენგიზ აბლოთია