ქართული მეღვინეობის ტრადიცია 8000 წელზე მეტს ითვლის. საქართველოს, როგორც ღვინის უძველეს კერას, სრულიად დამსახურებულად უწოდებენ „ღვინის სამშობლოს“. მსოფლიო ბაზარზე ქართული ღვინო დღითი დღე უფრო მოთხოვნადი ხდება და მისი ექსპორტიც მკვეთრად არის გაზრდილი. 2021 წლის იანვარ-თებერვლის მონაცემებით, გატანილი პროდუქციის რაოდენობა ისტორიულ მაქსიმუმზეა –ექსპორტირებულია 96 150 065 ბოთლი ღვინო, მიღებული შემოსავალი კი $222 მილიონს აღწევს.
საექსპორტო ბაზრების დივერსიფიკაცია ყოველწლიურად ხდება და ამ მიმართულებით წლების მანძილზე უდიდესი სამუშაო ჩატარდა, თუმცა, საჭიროა ახალი ბაზრების მოძიება. ქართული ღვინისთვის ერთ-ერთი აუთვისებელი და სარფიანი აფრიკის ბაზარია. მას აქ დიდი პოტენციალი აქვს, აფრიკა არის ადგილი, სადაც სამხრეთ აფრიკელმა მეღვინეებმა საფერავიც კი გააშენეს.
არსებობს არაერთი პროექტი, რომლის ფარგლებშიც ხდება ღვინის კომპანიებს შორის თანამშრომლების გაცვლა, გამოცდილების გაზიარება, ბიზნეს კონსულტაციები, პოტენციური ინვესტორების მოძიება და ა.შ. მსგავს პროექტებს სათავეში ღვინის ეროვნული სააგენტო, საქართველოს სავაჭრო-სამრეწველო პალატა და საქართველოსა და აზია-აფრიკის სავაჭრო-სამრეწველო პალატა უდგანან.
სწორედ ასეთ ორგანიზაციებთან კონსულტაციებმა გაუჩინა ქართულ ღვინოში ინვესტირების ინტერესი განელ ბიზნესმენ დანიელ ლატეს. ის დადებითი რეპუტაციისა და მაღალი კვალიფიკაციის მქონე აფრიკელი მეწარმე, საერთაშორისო ინვესტორი და ქველმოქმედია. დანიელ ლატეს მუშაობის დიდი გამოცდილება აქვს როგორც აფრიკის, ისე ინგლისის ბაზარზე.
განელმა ბიზნესმენმა ჩვენთან საუბრისას ხაზი გაუსვა აფრიკის ბაზრის მნიშვნელობას და მისი სამომავლო გეგმები გაგვაცნო:
„აფრიკის ბაზარი ძალიან მნიშვნელოვანი და სერიოზული ბაზარია. ქართულ ღვინოზე აქ დიდი ინტერესია და ამ პროდუქტს დიდი პოტენციალი აქვს აითვისოს აფრიკის ბაზარი და თავისი ნიშა დაიკავოს.
ჩვენ დიდი გეგმები გვაქვს, აქტიურად ვთანამშრომლობთ საქართველოს სავაჭრო-სამრეწველო პალატასთან და ვახორციელებთ მოლაპარაკებებს. მათი ხელშეწყობით განას დედაქალაქ აკრაში სადისტრიბუციო ცენტრის გახსნას ვგეგმავთ, რომლის მეშვეობით განასა და ნიგერიის 200-მილიონიან მოსახლეობაში ქართული ღვინის დისტრიბუციას განვახორციელებთ.
ჩვენ კარგად შევისწავლეთ ქართული ღვინის ბაზარი და ქართული ღვინის წარმოების ნიუანსები. დავიქირავეთ მსოფლიოს წამყვანი საერთაშორისო კონსულტანტები და ვგეგმავთ ინვესტიცია ქართული ღვინის წარმოებაშიც ჩავდოთ. გარკვეულ შეთანხმებას მივაღწიეთ თბილისში, პეტრიაშვილის ქუჩაზე მდებარე ისტორიული ღვინის ქარხანა N1-ის ყიდვაზე, რომელსაც მრავალწლიანი და მრავალფეროვანი ისტორია აქვს. ის ერთ-ერთ საუკეთესო, ტრადიციულ ბრენდს წარმოადგენდა საქართველოში, მაგრამ წლების განმავლობაში დაკარგული ჰქონდა მთავარი ფუნქცია და სავაჭრო ცენტრად იქცა. ჩვენ ქარხნის რეორგანიზაციასა და მოდერნიზაციას მოვახდენთ, აღვჭურავთ ყველა საჭირო თანამედროვე მოწყობილობით და მას პირველად ფუნქციას დავუბრუნებთ. ამ ეტაპზე, ჩვენი გათვლებით, 7 მლნ. ბოთლი საექსპორტო ღვინის წარმოებას შევძლებთ, რისთვისაც მანავის რეგიონში 300 ჰექტარი მიწის ყიდვა და ვენახის გაშენება-მოვლა გვაქვს დაგეგმილი“.
NS