საქართველოში რამდენიმე ფარმაცევტული საწარმო ფუნქციონირებს, რომლებიც სხვადასხვა დასახელების მედიკამენტებს უშვებენ. ადგილობრივი წარმოება ქართულ ბაზარზე ფასს ვერ ამცირებს, თუმცა მათ უშუალოდ წარმოებისა და ექსპორტის ხარჯზე, მაინც შეაქვთ ქართულ ეკონომიკაში გარკვეული წვლილი. 2019 წელს ქართული ფარმაცევტული საწარმოების გაყიდვებმა 150 მლნ ლარს გადააჭარბა.

ავერსი ფარმა, როგორც სააფთიაქო ქსელი, 1994 წელს დაარსდა, ავერსი რაციონალი, როგორც ფარმაცევტული საწარმო - 2002 წელს, რომელმაც პირველი პროდუქცია 2005 წელს გამოუშვა. საწარმო, რომლის საერთო ფართი 4500 მ2-ა და სადაც 400-მდე ადამიანი მუშაობს, ISO სერტიფიკატით სარგებლობს. ლაბორატორია, სადაც კვლევები და ანალიზები ტარდება 750 მ2-ა განთავსებული.

ავერსი რაციონალი აბების, კაფსულების, სიროფების, წვეთების, საინექციო ნემსებისა და გელების სახით 200-ზე მეტი დასახელების პროდუქტს უშვებს.
2019 წელს ავერსი რაციონალის შემოსავალმა 33.7 მლნ ლარს მიაღწია, რაც 2018 წლის მაჩვენებელზე 11 მლნ-ით მეტი იყო. ამავე დროს, თუ 2018 წელს კომპანია 3.9 მლნ-იან ზარალზე გავიდა, 2019 წელი 2.4 მლნ-ზე მეტი წმინდა მოგებით დაასრულა.

კიდევ ერთი ფარმაცევტული საწარმო „ჯი ემ პი“ 1999 წელს დაარსდა. საწარმო უშვებს მყარი ფორმის მედიკამენტებს: აბებს, გარსით დაფარულ აბებს, ფხვნილებსა და ჟელატინის კაფსულებს. კომპანია ფლობს უკრაინის GMP მარეგულირებელი ორგანოს ინსპექტირების შედეგად გაცემულ GMP შესაბამისობის სერტიფიკატს, რომელიც ადასტურებს კომპანიის შესაბამისობას ფარმაცევტული ინსპექციების კონვენცია/კოოპერაციის სქემის, ევროკავშირის დირექტივების და მსოფლიო ჯანდაცვის ორგანიზაციის მოთხოვნებთან ჰარმონიზებულ უკრაინის მარეგულირებელი დოკუმენტების მიმდინარე ვერსიებთან.

2019 წელს ჯიემპიმ პსპ-ს სააფთიაქო ქსელში 53.9 მლნ ლარის პროდუქცია გაყიდა, 2018 წელთან შედარებით 4.5 მლნ-ით ნაკლები, თუმცა ამავე დროს ექსპორტის ზრდის ხარჯზე საერთო გაყიდვები 17 მლნ ლარით 123 მლნ-მდე გაზარდა. ყველაზე მეტი - 47 მლნ-ის პროდუქცია ექსპორტზე უზბეკეთში გავიდა, 10 მლნ-ით მეორე ადგილი ყირგიზეთმა დაიკავა, ხუთეულში ასევე მოხვდნენ: სომხეთი, მოლდოვა და ტაჯიკეთი. გაყიდული პროდუქციის თვითღირებულებამ, სარეალიზაციო ფასის მეოთხედზე ცოტა მეტი - 36 მლნ ლარი შეადგინა, გაყიდვების დანახარჯებმა - 46 მლნ ლარი, ხოლო მოგებამ გადასახადების გადახდის შემდეგ - 27.5 მლნ ლარი.

2019 წლის 31 დეკემბრის მდგომარეობით, კომპანიის წილის 100%-ს ფიზიკური პირი ლინა თოფურია ფლობდა.

2019 წლის 31 დეკემბრის მდგომარეობით საქართველოს ჯანდაცვის ჯგუფის ძირითად მიმართულებას სააფთიაქო და ჰოსპიტალური ქსელი წარმოადგენდა.