ქართული ბრენდი „Nair ნაირი“, რომელიც წინდებს, თასმებს და მაისურებს განსხვავებული და ორიგინალური დიზაინით ამზადებს პანდემიის მიუხედავად, ექსპორტზე გასვლას გეგმავს.
რა გამოწვევების წინაშე დადგა კომპანია პანდემიის პერიოდში და რა სიახლეებს უნდა ველოდოთ სექტემბრიდან, ამის შესახებ „კომერსანტს“„Nair ნაირის“ კრეატიული დირექტორი გიორგი ხერგიანი ესაუბრა.
„პანდემიამ საკმაოდ მძიმედ იმოქმედა ჩვენს გაყიდვებზე. მოგვიწია მოლში სტენდის დახურვა, თვენახევარი შეჩერებული გვქონდა ონლაინ გაყიდვებიც. ადამიანებს ძალიან გაუჭირდათ და თასმებზე, წინდებსა და მაისურებზე ფიქრისთვის, დრო და ფინანსები არც ჰქონდათ. ვგეგმავდით ექსპორტს, თუმცა, ამ კუთხითაც შევფერხდით. ამ ეტაპზე, სტენდი არ გვაქვს, ჩვენი თასმების შეძენა რამდენიმე ადგილზე არის შესაძლებელი, რაც შეეხება მაისურებს და წინდებს, ისინი ონლაინ იყიდება“, - ამბობს გიორგი ხერგიანი.
კომპანიას ექსპორტთან დაკავშირებული მოლაპარაკებები აზერბაიჯანთან და გერმანიასთან აქვს დაწყებული. მოლაპარაკებების თანახმად, ბერლინში თასმებისა და წინდების გაყიდვა აგვისტოში უნდა დაწყებულიყო.
„აზერბაიჯანში, ბაქოში ვაპირებდით პროდუქციის ექსპორტზე გატანას, თუმცა იქაც მძიმე სიტუაციაა, იგივე მდგომარეობაა ბერლინშიც, პროცესი კორონას გამო ჭიანურდება და ველოდებით სიტუაციის დასტაბილურებას. პანდემიის პერიოდში სტენდზე ვინც მუშაობდა, მხოლოდ იმ თანამშრომლების შემცირება მოგვიწია. გუნდის დანარჩენი წევრები ისევ ერთად ვართ. გაყიდვები შედარებით შემცირებულია, ამ ეტაპზე რეკლამაც გაჩერებული გვაქვს, მძიმე პერიოდია პანდემიის კუთხით და ჩვენც ვცდილობთ, რომ დავისვენოთ, დაცლილია ქალაქი და ხალხი დასვენებაზეა ორიენტირებული. სექტემბრიდან კომუნიკაციას ინტენსიურად გავაგრძელებთ“,- განაცხადა ხერგიანმა.
კომპანია „Nair ნაირი“ წინდებს საქართველოში აწარმოებს, მაისურები და თასმები კი ჩინეთიდან ჩამოდის, ადგილზე კი მათი დიზაინი მზადდება, აქვე იფუთება და საბოლოო პროდუქტის სახე ეძლევა.
„ბაზარზე, დაახლოებით, სამი წელია ვართ, აქტიურად კი ბოლო ერთი წელი. ჩვენს სამომავლო გეგმებში ახალი პროდუქციის დამატება შედის, თუ რომელი - ჯერ არ გვსურს გახმოვანება, აქტიურად ვმუშაობთ ექსპორტზე. ქართულ ბაზარზე, ვფიქრობთ,რომ მეტნაკლებად გავითქვით სახელი და არის დიდი დაინტერესებაც. განვითარება კი სწორედ ექსპორტით წარმოგვიდგენია,“- აღნიშნავს გიორგი ხერგიანი.
თაკო კვაჭანტირაძე