ამბიცია გვაქვს გავაკეთოთ ქართული ამაზონი. ვვარაუდობთ,რომ ოთხი წლის თავზე თიბისი ბანკი 10 მილიონამდე ქართველ და უცხოელ მომხმარებელს მოიცავს“ - ამ სიტყვებით დააანონსა 2018 წელს, თიბისი ბანკის გენერალურმა დირექტორმა ვახტანგ ბუცხრიკიძემ ბანკის ონლაინ პლატფორმის Vendoo-ს ამოქმედება.
დიდი გეგმებისა და ამბიციების მიუხედავად დღეს Vendoo.ge ერთ-ერთი რიგითი ონლაინ პლატფორმაა, რომელიც მუდმივი საკადრო ცვლილებებით, მომხმარებლების პასიურობით და კომპანიების მხრიდან ნაკლები ცნობადობით გამოირჩევა.
საქართველოში უმსხვილესი ბანკის ონლაინ პლატფორმის ჩაშვებასთან ერთად, ბაზარზე არსებობდა მოლოდინი, რომ Vendoo ყველა სხვა ლიდერ პლატფორმებს უკან ჩამოიტოვებდა, როგორებიცაა Mymarket.ge და Wishlist.ge. რატომ არ არის აქტიური დღეს ბაზარზე Vendoo და არის თუ არა ამის მიზეზი მაღალი კონკურენცია ელექტრონული ვაჭრობის ბაზარზე? - ამ კითხვებით „კომერსანტმა“ კომპანიის წარმომადგენლობას არაერთხელ მიმართა, თუმცა პასუხი ამ დრომდე არ მიგვიღია.
თიბისის ელექტრონული კომერციის ახალი პლატფორმა, Vendoo.ge 2019 წლის მაისში ამოქმედდა. Vendoo ონლაინ მაღაზია Swoop-ის ბაზაზე შეიქმნა, რომლის 100 პროცენტიანი წილიც თიბისი ჯგუფმა შეისყიდა. Swoop ბაზარზე კარგად ცნობილი, ონლაინ ფასდაკლებების და გაყიდვების კომპანიაა.
საქართველოს ბანკის მიერ აქტიური ინვესტირებით, შვილობილი პლატფორმა EXTRA.GE დინამიური, მსხვილმასშტაბიანი ციფრული სავაჭრო სივრცე უნდა გამხდარიყო პროდუქტის და მომსახურების ფართო არჩევანითა და სრულიად ახალი სავაჭრო გამოცდილებით. მიუხედავად სიახლეებისა და აქტიური მარკეტინგული კამპანიის ბაზრის ლიდერად დღესდღეობით ვერც ეს კომპანია მოიაზრება.
მაშინ, როდესაც პანდემიის გამო, ბიზნესებისთვის ურთულესი პერიოდი დადგა მთელს მსოფლიოში e-commerse პლატფორმების აღმასვლა დაიწყო, მაღალი კონკურენცია და აშკარა შანსი, რომ მათი ბიზნესი შეუცვლელი გახდეს ბანკების სავაჭრო ონლაინ-სივრცეებმა ჯეროვნად ვერ გამოიყენეს.