„პანდემიამდე ავიაკომპანია Myway რეგულარულ მიმოსვლებს თელავივის მიმართულებით ასრულებდა, ასევე გვქონდა ჩარტერული რეისები სხვადასხვა ქვეყანაში. ანტიკრიზისული გეგმის წარდგენისას მთავრობამ განაცხადა, რომ საქართველოსთვის ტურისტულად საინტერესო ქვეყნებთან აღდგება საჰაერო მიმოსვლა, ამიტომაც იმედს ვიტოვებთ, რომ ისრაელი ამ ჩამონათვალში იქნება, რადგან ამ ქვეყნიდან ტურისტების შემოდინების საკმაოდ მზარდი სტატისტიკა გვაქვს ბოლო წლებში.“- ამის შესახებ „კომერსანტს“ ავიაკომპანია Myway-ს საზოგადოებასთან ურთიერთობის სამსახურში განუცხადეს.
ქართული ავიაკომპანია Myway Airlines-ი თელავივის მიმართულებით ფრენებს კვირაში სამჯერ ახორციელებდა. პანდემიის გამო შეჩერებული ფრენებით მიყენებული ზარალის შესახებ ზუსტი ინფორმაცია კი მოგვიანებით გახდება ცნობილი. Myway Airlines-ის საზოგადოებასთან ურთიერთობის მენეჯერი თამარ ქობულაშვილი აცხადებს, რომ მონაცემები ამ ეტაპზე მერყევია, რადგან არის გაუქმებული და ჯერ კიდევ შენარჩუნებული ჯავშნები, შესაბამისად ზარალის დათვლის პროცესი ჯერ არ დასრულებულა.
ფრენების აღდგენის შემდეგ, კომპანია უახლოეს მომავალში ახალი მიმართულებების დამატებას და ტურისტების ახლო აღმოსავლეთის ქვეყნებიდან ჩამოყვანას გეგმავს, კომპანიაში აღნიშნავენ, რომ ამ საკითხზე მოლაპარაკებები უკვე მიმდინარეობს.
„ფრენების აღდგენის შემდეგ ეტაპად განვიხილავთ ახალი მიმართულებების დამატებასაც. შემუშავებული გვაქვს გეგმა და როგორც კი გვექნება შესაბამისი ნებართვები, ჩვენ გვექნება შესაძლებლობა, რომ საქართველოში ტურისტები ახლო აღმოსავლეთის ქვეყნებიდანაც ჩამოვიყვანოთ.
რაც შეეხება უსაფრთხოების ნორმებს, ავიაკომპანია მუშაობს ახლი რეგულაციების დანერგვაზე. ამჟამად ველოდებით საავიაციო ხელისუფლებისგან შესაბამის გაიდლაინებს, რომელთაც გავითვალისწინებთ ავიარეისების შესრულებისას. თუმცა ვიცით, რომ მგზავრებისა და ეკიპაჟისთვის სავალდებულო გახდება ნიღბებისა და დამცავი საშუალებების ტარება (პირბადე, სათვალე / დამცავი ფარი, ხელთათმანი). ყოველი რეისის შესრულების შემდეგ ხომალდს ჩაუტარდება დეზინფექცია.ჩვენ უკვე გვაქვს რთულ პერიოდში ფრენის გამოცდილება, რადგან სამი სპეციალური რეისი შევასრულეთ საქართველოს მოქალაქეების ჩინეთიდან, ბულგარეთიდან და ავსტრიიდან დასაბრუნებლად.“ - განმარტავს თამარ ქობულაშვილი.
რაც შეეხება ბილეთების ფასის გაძვირების შესახებ საყოველთაო პროგნოზებს, კომპანიაში აცხადებენ, რომ ამაზე საუბარი ნაადრევია.
„ბილეთების ფასის გაძვირებისა თუ ფასის შენარჩუნების საკითხი კვლევის საგანია და გარკვეული მაშინ იქნება, როცა რეგულაციები დაწესდება, ამ ეტაპზე ნებისმიერი დასკვნა ნაადრევი იქნება. ბუნებრივია, გვინდა რომ ფასი შენარჩუნდეს და მუდმივი მომხმარებელი ჩვენთან დარჩეს. მთავრობის მხრიდან გაკეთდა განცხადება, რომ ხელისუფლება აპირებს სუბსიდიის გამოყოფას ერთერთ ქართულ კერძო კომპანიაზე, მაგრამ არ ვფიქრობთ, რომ მხოლოდ ერთ კოპანიაზე იზრუნებს სახელმწიფო, რადგანაც ქვეყანაში ორი ავიაკომპანია ოპერირებს და იმედია Myway-ც გათვალისწინებული იქნება ამ დახმარების პროგრამაში.“ - აღნიშნა თამარ ქობულაშვილმა.
მარიამ მორგოშია