ხილისა და ბოსტნეულის საექსპორტო კომპანია Frutilia-მ ქართული ატამი და ვაშლატამა ევროპულ ბაზარზე გაიტანა.
როგორც კომპანიის დამფუძნებელმა ვახტანგ ბეჟიტაშვილმა განაცხადა, ქართული ატამითა და ვაშლატამით დატვირთული, პირველი 20 ტონიანი კონტეინერი უკვე პოლონეთის საზღვარზეა. თუმცა, საქართველოს ფიტოსანიტარული სამსახურის მიერ გაცემულ დოკუმენტებში დაშვებული შეცდომების გამო, პოლონელმა იმპორტიორებმა პროდუქციის მიღება ჯერ ვერ შეძლეს.
კომპანიის მხრიდან დაშვებული უზუსტობები დაუყოვნებლივ გამოსწორდა და ამ ეტაპზე პოლონელი მებაჟეები შესწორებულ დოკუმენტს განიხილავენ.
„წლების განმავლობაში ვცდილობდით ევროპულ ბაზარზე პარტნიორების პოვნას, თუმცა გარკვეული მიზეზების გამო ქართული სასოფლო-სამეურნეო პროდუქცია ექსპორტზე ვერ გაგვქონდა. ამდენი წლის შემდეგ პირველი ტვირთი უკვე გავიდა. მართალია, 20 ტონა ბევრი არაა, თუმცა ამ ეტაპზე მთავარი ევროპული ბაზრის ათვისებაა და ცდა არ უნდა შევწყვიტოთ. ჩვენ უკვე მოვამზადეთ მეორე კონტეინერი და პირველი ტვირთის დადასტურების შემდეგ, მზად ვართ მის გასაგზავნად“,- აცხადებს ვახტანგ ბეჟიტაშვილი.
კომპანიის დამფუძნებელი იმედოვნებს, რომ ქართული პროდუქცია დანიშნულების ადგილამდე დროულად მივა და შექმნილი გაურკვევლობა ექსპორტირებული ხილის ხარისხზე უარყოფითად არ აისახება.
Frutilia-ს საექსპორტო ბაზარზე მუშაობის 15 წლიანი გამოცდილება აქვს. მიუხედავად 2014 წლის 27 ივნისს ევროკავშირთან რამდენიმეწლიანი ღრმა და ნაყოფიერი სავაჭრო ხელშეკრულების გაფორმებისა, ამ დრომდე კომპანიას პროდუქცია ექსპორტზე მხოლოდ პოსტსაბჭოთა ქვეყნებში გაჰქონდა. საბოლოოდ, 2020 წელს კომპანიისა და ფაქტობრივად, ქვეყნის ისტორიაში პირველად ქართული ატამი და ვაშლატამა ევროპულ ბაზარზე, კერძოდ პოლონეთში გავიდა.
წყარო east-fruit.com
მოამზადა ანი ცარციძემ