დაახლოებით ერთი წელია, რაც ბაზარზე ქართული არაქისის კარაქის მწარმოებელი კომპანია „სნექი“ გამოჩნდა და ის მომხმარებელს არაქისის კარაქს ყოველგვარი დანამატების გარეშე სთავაზობს. კომპანია თავიდან ონლაინ გაყიდვებზე მუშაობდა და ახლა უკვე მეორე მაღაზიის გახსნისთვის ემზადება.
როგორც „კომერსანტთან“ საუბრისას კომპანიის თანადამფუძნებელმა იესე პატიაშვილმა აღნიშნა, მან და მისმა მეგობრებმა ბიზნესი ძალიან მცირე, დაახლოებით ხუთასლარიანი ინვესტიციით დაიწყეს, ლოგოც ფოტოშოპში თვითონვე ააწყვეს და პროდუქტი სოციალურ ქსელში დაარეკლამეს, რასაც მომხმარებლების მხრიდან საკმაოდ მაღალი დაინტერესება მოჰყვა.
“არაქისის კარაქს საკვებ დანამატად ვიყენებდი, რაც საქართველოში მხოლოდ იმპორტით შემოდიოდა, დეფიციტური იყო და ძვირი ღირდა, თავიდან უბრალოდ გავტესტეთ, შესაძლებელი იყო თუ არა ადგილობრივი წარმოება გაგვეკეთებინა, ვფიქრობ გაამართლა.
“სნექი“ საქართველოში წარმოებული პირველი მასობრივად ხელმისაწვდომი არაქისის კარაქია, სხვა კომერციულად და მასობრივად ხელმისაწვდომი მსგავსი პროდუქტი არ მახსენდება, შეიძლება პირადი მოხმარებისთვის ამზადებენ და ვიწრო წრეში ყიდიან.
რაც შეეხება ინვესტიციას, თავიდან თითქმის არანაირი ინვესტიცია არ განგვიხორციელებია, უბრალოდ ბლენდერი შევიძინეთ, ჩვენ თვითონ გავაკეთეთ ეტიკეტი ფოტოშოპში და სოციალურ ქსელში რეკლამა გავუშვით, ალბათ მიზერული 500–ლარიანი ინვესტიცია განვახორციელეთ“, - აღნიშნა იესე პატიაშვილმა.
არაქისის კარაქისთვის მიწის თხილი ინდოეთიდან შემოაქვთ, როგორც პატიაშვილი ამბობს, აღნიშნული პროდუქტი არაგენმოდიფიცირებული და სერტიფიცირებულია და ის არაქისის კარაქის საწარმოებლად დაახლოებით 15 წელია, რაც გამოიყენება. პატიაშვილი ფიქრობს, რომ ქართული არაქისის კარაქი იმპორტირებულს კონკურენციას გაუწევს, რადგან „სნექის“ პროდუქტის ფასი იმპორტირებულთან შედარებით 50%–ით დაბალია, ის შეკვეთის მიღების შემდეგ მზადდება და მომხმარებლებთან იმპორტირებულთან შედარებით უფრო “ფრეში“ მიდის, ამას გარდა იმპორტირებული კარაქი საკმაოდ დეფიციტურია.
„იმპორტირებულთან შედარებით
ჩვენი პროდუქტი 50%–ით იაფია, როგორც ჩვენი მომხმარებლები, სპორტული დანამატების მაღაზიებიდან
და სპორტ დარბაზებიდან გვეუბნებიან, იმპორტირებულ პროდუქტს ძალიან დიდი, დაახლოებით
1-2 თვიანი წყვეტები აქვს და ეს მათ აფერხებს იმაში, რომ თაროები მუდმივად სავსე ჰქონდეთ,
რაც ასევე ქსელური მაღაზიებისთვის დიდი პრობლემაა, ჩვენ შემთხვევაში მოთხოვნის შემდეგ
ხდება დამზადება, ანუ პროდუქტს არ ვასაწყობებთ, შესაბამისად ბევრად უფრო მარტივია ჩვენთვის ვადების კონტროლი. ასევე კომფორტულია სასაწყობე ფართის მხრივაც, საწყობისთვის დიდი ფარის ქირაობა არ გვიწევს და მიწოდების
დროსაც მომხმარებელთან უფრო „ფრეში“ მიდის, რადგან რამდენიმე დღის დამზადებულია. კონკურენტებთან
შედარებით ეს უპირატესობა გვაქვს“, - აღნიშნა იესე პატიაშვილმა.
რაც შეეხება ფიზნესის გაფართოებას, პატიაშვილი ამბობს, რომ მათი მიზანი ჯერ თბილისში, ხოლო შემდეგ მთელ საქართველოში ქსელურ მაღაზიებში შესვლაა. ამ ეტაპზე მომხმარებელი „სნექს“ „შინხოფერის“, ხოლო ახლო მომავალში „ფრესკოს“ მაღაზიებშიც შეხვდება. ასევე მისი შეძენა საკვები დანამატების მაღაზიებსა და სპორტ დარბაზებშია შესაძლებელი. გარდა ამისა, კომპანია “სნექი“ თანამშრომლობს „ვოლტთან“, „გლოვოსთან“ და „ბოლტთან“, როგორც იესე პატიაშვილი ამბობს, „სნექსის“ გაყიდვები საკმაოდ მაღალია.
რაც შეეხება “სნექის“ მაღაზიებს, იესე პატიაშვილი ამბობს, რომ თითო მაღაზიის ინვესტიცია დაახლოებით 10 000 ლარია, რისთვისაც კომპანიამ ბიზნეს სესხით ისარგებლა. ამ ეტაპზე კომპანიას ათი ადამიანი ჰყავს დასაქმებული, არაქისის კარაქი 300 გრამიან და 1 კილოგრამიან შეფუთვებში იყიდება.
თაკო კვაჭანტირაძე