ტურიზმის სექტორი 2020 წელს ქონების გადახასახდისგან სრულად გათავისუფლდება,  სექტორში მომუშავე კომპანიებს კი საშემოსავლო გადასახადები 9 თვით წლის ბოლომდე გადაუვადდებათ“-ამის შესახებ  ტურიზმის ანტიკრიზისული გეგმის პრეზენტაციაზე გიორგი გახარიამ განაცხადა. მისივე განცხადებით, სასტუმრებს, რომელთა ბრუნვა 20 მლნ ლარია სესხის პროცენტის 80%-ს დაუსუბსიდირებს.

მიღებული გადაწყვეტილება სამართლიანად მიაჩნია „სასტუმროებისა და რესტორნების ფედერაციის“ დამფუძნებელ შალვა ალავერდაშვილს. თუმცა, მისი თქმით, 2020 წელი ტურიზმის გადარჩენის წელი იქნება და შარშანდელთან შედარებით სექტორი 75%-იან წაგებას ნახავს.

„ის გადაწყვეტილება რაც მიიღეს, საკმაოდ დადებითია.ფაქტი, რომ ქონების გადასახადისგან განთავისუფლდა ობიექტი, ძალიან კარგია და შვებაა სექტორისთვის.გარდა ამისა, თანადაფინანსება მოხდება სესხის 80%-ით, ესეც ძალიან კარგი ამბავია ტურისზმისთვის.  წლევანდელ წელს დიდი მოლოდინი არ გვაქვს ტურისტების ჭარბი რაოდენობის მიღების. კარგია, რომ მთავარი მესიჯი, თუ როდიდან გაიხსნება საზღვარი და ამოქმედდება სტრატეგიული ობიექტები მივიღეთ. ეს არის  მნიშვნელოვანი,  რადგან უკვე დავიწყებთ მუშაობას საზღვარგარეთის პარტნიორებთან, რომ  სტუმრები მივიღოთ.“-განაცხადა შალვა ალავერდაშვილმა.

„სასტუმროებისა და რესტორნების ფედერაციის“ დამფუძნებელი იმასაც აღნიშნავს, რომ ტურისტულად აქტიური წელი არც ქვეყანაში იქნება, რადგან არც  შიდა ტურიზმისთვის განკუთვნილი ფინანსები აქვს მოსახლეობას.

„ადგილობრივების აქტიურობასაც არ ველოდებით, რადგან უამრავი ადამიანი დარჩა შემოსავლების გარეშე და მათი უპირატესობა იქნება თავიანთ სოფლებში ან კერძო სექტორში დასვენება, სადაც  ის სეგმენტი გადანაწილდება, რომელიც წელს საზღვარგარეთ მოგზაურობას გეგმავდა.“-აღნიშნა ალავერდაშვილმა.

შეგახსენებთ,  რომ ტურიზმის ამოქმედების მეორე ეტაპზე, ეკონომიკისა და მდგრადი განვითარების მინისტრმა ნათია თურნავამაც ისაუბრა.

„კონკრეტულად კი  15 ივნისს შიდა ტურიზმისთვის ბაზრის გახსნა მოხდება. ამ დროისათვის, ჩვენ უკვე გვექნება დამუშავებული უსაფრთხო ტურისტული ზონების კონცეფცია და ასევე იმუშავებენ საპილოტე ზონები. 15 ივნისიდან ადგილობრივი ტურისტი უკვე შეძლებს, ესტუმროს საქართველოში მდებარე სასტუმროებს, რომლებიც აღჭურვილი და გადაწყობილი იქნება უსაფრთხოების წესების შესაბამისად“, - განაცხადა ეკონომიკისა და მდგრადი განვითარების მინისტრმა ნათია თურნავამ მთავრობის ადმინისტრაციაში გამართულ ტურიზმის გახსნის ანტიკრიზისული გეგმის პრეზენტაციაზე. გეგმის წარდგენა პრემიერ-მინისტრის ხელმძღვანელობით მოქმედი უწყებათაშორისი საკოორდინაციო საბჭოს ფარგლებში არსებული ეკონომიკური ჯგუფის სხდომაზე გაიმართა.

ნათია ლომიძე