„საქართველოში ერთადერთი სფერო,რომელიც ვითარდებოდა იყო ტურიზმი. გასულ წელს კი სექტორი კრიზისში შევიდა. ამის მიზეზი კი „ქართული ოცნების“ არასწორი სტრატეგიაა.“- ამის შესახებ „ახალი საქართველოს“ ლიდერმა გიორგი ვაშაძემ რადიო „კომერსანტის“ გადაცემა „ცოდნა და წარმატება“ ნანა ტოხვაძესთან ერთად ისაუბრა. მისი თქმით, სფერო,რომელიც დამოუკიდებლად ვითარდებოდა, ჩამოშლის ზღვარზეა.
„დღეს, 20 000 აუთვისებელი ჭარბი ადგილია სასტუმროებში. ხალხმა ბინების გაქირავება დაიწყო, რამაც ტურისტების მხრიდან მოთხოვნა შეამცირა.სწრაფად თუ არ ვუშველეთ კოლაფსს ტურისტულ სექტორში, ადამიანები,რომლებმაც ინვესტიციები ჩადეს სასტუმროების მშენებლობაში, გაბანკროტდებიან და კიდევ ერთი დიდი კლასტერი შეემატება გაჭირვებულ ადამიანებს.
„სტრატეგია აღმაშენებელში“ გაწერილი გვაქვს ამ მიმართულებით ცვლილებები. გვინდა,რომ ათასი ახალი ტურისტული მარშრუტი გაჩნდეს, განსაკუთრებით, აგრო ტურიზმის მიმართულებით. უნდა ვიმუშაოთ ნაკადების მოზიდვაზე,“- აღნიშნავს გიორგი ვაშაძე.
„ახალი საქართველოს“ ლიდერი „თბილისობისა“ და „არტ-გენის“ ფესტივალების ბაზაზე, ღვინისა და ეთნო-კულტურული მსოფლიო ფესტივალების დაარსებაზეც საუბრობს.
„თბილისობა შეგვიძლია ვაქციოთ ღვინის მსოფლიო ფესტივალად. თბილისობა ადგილობრივი ღრეობა არ უნდა იყოს. იგი პირველ რიგში უკავშირდება შემოდგომას, ვაზს და ღვინოს. ასევე გვინდა, ივნისში მსოფლიო ეთნო-კულტურული ფესტივალის დაარსება არტ-გენის ბაზაზე. ტურისტების რაოდენობა 4-5 წელიწადში 25 მილიონამდე უნდა ავიდეს, ოღონდ ინტენსიურად უნდა ვიმუშაოთ. არ უნდა გვქონდეს ჩავარდნები.
ამათი უუნარობისა და კორუმპირებულობის გამო, სექტორი კატასტროფულ დღეშია. ასობით მილიონია ტურისტულ პრომოუშენში დახარჯული, მაგრამ შედეგი არ გვაქვს. ტუირზმი არის ის სფერო, რომელსაც უნდა ვუშველოთ. იგი გადაბმულია წარმოების განვითარებაზე, ტექნოლოგიების განვითარებაზე და სხვა ლოჯისტიკურ კვანძებზე. ეს ჯაჭვი უნდა დავინახოთ. ამოგლეჯილად არ უნდა ვხედავდეთ სფეროებს. „ქართული ოცნების“ პრობლემა ის არის,რომ მათ არ აქვთ ცოდნა და არც ინტერესი, რომ სრული სურათი დაინახონ. „ქართულ ოცნებას“ არ უყვარს ეს ქვეყანა. რომ უყვარდეს ასე უდიერად არ მოექცეოდა სამშობლოს,“- ამბობს გიორგი ვაშაძე.
ნათია კეკენაძე