„ქართულ მოდას აქვს პოტენციალი, საქართველო უფრო სწრაფად გახადოს პოპულარული ვიდრე ღვინოს“ - ამის შესახებ მერსედეს-ბენცის მოდის კვირეულის დამფუძნებელმა და შემოქმედებითმა ხელმძღვანელმა განაცხადა. სოფო ჭყონიამ პირველი არხის ეთერში თქვა, რომ ქართულ ღვინოს და ხაჭაპურს დღეს ქვეყნის მთავარ ელჩად არ განიხილავს. იგი ქვეყნის ელჩად შემოქმედებით ადამიანებს განიხილავს. მერსედეს-ბენცის მოდის კვირეულის დამფუძნებელს მიაჩნია, რომ საქართველოში ხალხი ხელოვანების პოპულარიზაციით უნდა მოვიზიდოთ, რის შემდეგაც დააგემოვნებენ ღვინოს და ნახავენ იმას, რაც ქვეყანას საინტერესო აქვს.
„პანდემიამდე ვიცოდით საით მივდიოდით, პანდემიის პერიოდში ეს გზა ცოტა ამერია, რადგან მთელ მსოფლიოში არავინ იცოდა რას აკეთებდა. მაგრამ მე მჯერა, რომ ქართული მოდა შეიძლება იყოს ეკონომიკის ნაწილი და ქვეყნის საუკეთესო ელჩი. ხშირად ვახსენებთ დემნა გვასალიას, დემნამ მოახერხა ის რაც ვერც ერთმა პოლიტიკოსმა ვერ შეძლო, დღეს საქათველოს შესახებ ძალიან ბევრმა ადამიანმა იცის. ჩვენ მეზობელ ქვეყნებს თუ გადახედავთ ამდენი ნიჭიერი ადამიანი არსად არაა მჯერა რომ მათ უბრალოდ ხელშეწყობა და სწორი მიმართულების მიცემა სჭირდებათ,.ვთვლი, რომ მათ ჩვენი ქვეყნის შეცვლა შეუძლიათ“, - განაცხადა სოფო ჭყონიამ.