სტარტაპი, რომლის წამოწყების ერთ-ერთი მიზეზიც ქართველი მეფუტკრეების ხელშეწყობაა, ბაზარზე ორშაბათიდან გამოჩნდება. როგორც „კომერსანტთან“ საუბრისას „ზიპის“ დამფუძნებელმა ლუკა სულაბერიძემ აღნიშნა, ბოთლის ვიზუალიც თაფლის დადებითი თვისებების შესანარჩუნებლად შეარჩიეს.

„თაფლიანი წყალი უნიკალური პროდუქტია. თაფლის წყალში გახსნიდან გარკვეული დროის შემდეგ პროდუქტის დადებითი თვისებები იკარგება და მას ორგანიზმისთვის აღარ აქვს მნიშვნელობა. იმისათვის, რომ პროდუქტი არ გაფუჭდეს თავსახურში მოვათავსეთ თაფლი, ქვემოთ კი - წყალი. ერთი გადატრიალებით და თავსახურზე თითის დაჭერით კი თაფლი წყალში ჩაიღვინთება.

ორშაბათიდან უკვე ვიქნებით "სმარტის" ქსელებში. ახლა ბაზრის კვლევას ვაკეთებთ და თუ სტარტაპი გაამართლებს ნელ-ნელა გავფართოვდებით“, - განმარტავს ლუკა სულაბერიძე.

როგორც კომპანიაში აცხადებენ საზოგადოებისგან საკმაოდ მაღალი დაინტერესება წამოვიდა. ამასთან, პროდუქტის უნიკალურობიდან გამომდინარე, ბაზარზე მათ პირდაპირი კონკურენტი არ ჰყავთ.

„ბაზარზე პირდაპირი კონკურენტი არ გვყავს, ჩვენს პროდუქტს არანაირი ქიმიური დანამატი არ  აქვს და 100%-ით ჯანსაღია. ჯერ-ჯერობით ვერც პირდაპირი და ვერც ირიბი სახით კონკურენტებს ვერ ვხედავთ.

ხალხის აზრს როგორც დავაკვირდი ახალი პროდუქტის გამოჩენა ძალიან გაუხარდათ, რადგან ასეთი კონცეფციით თაფლიანი წყალი წარმოდგენილი არ ჰქონდათ. რადგან თაფლიანი წყლის დაყენებას დრო სჭირდება მისი სხვადასხვა ადგილზე მიღების პრობლემა ბევრს ჰქონდა. ჩვენი პროდუქტი კი მათ საშუალებას მისცემს ნებისმიერ დროს, ნებისმიერ ადგილზე  თან ჰქონდეთ თაფლიანი წყალი და თავსახურზე თითის დაჭერით მოახერხებენ მის დამზადებას“, - განმარტავს ლუკა სულაბერიძე.

ქართული ბაზრის ათვისების შემდეგ კომპანია „ზიპი“ პროდუქციის ექსპორტზე გატანასაც გეგმავს.

„ჯერ მხოლოდ ქართულ ბაზარს ვაკვირდებით. ეს იდეა იყო იმის გათვალისწინებით რომ ქართველ მეფუტკრეებს თავიანთი თაფლის კარგად გაყიდვისა და რეალიზების საშუალება ჰქონოდათ. მაგრამ ისეთი გამოხმაურება მოჰყვა პროდუქტის ექსპორტზე გატანითაც დავინტერესდით.

ჩვენ თაფლს გლეხებისგან ვყიდულობთ. ჩავდივართ სოფლებში, ვიღებთ სინჯებს და ვლუქავთ სკას, საიდანაც სინჯს ავიღებთ. შემდეგ თბილისში ლაბორატორიულად მოწმდება, ვბრუნდებით სოფელში და თუ დავრწმუნდით, რომ სკა ისევ დალუქულია და არავინ შეხებია მთლიანად მოგვაქვს ქარხანაში. ბოლოს კი ვასხამთ თაფლიან წყალს.

მინდა აღვნიშნო, რომ თაფლი, როგორც პროდუქტი ექსპორტზე რთულად გასატანია, რადგან სჭირდება ბევრი დამტკიცება და დოკუმენტები. რომელ თაფლსაც ჩვენ მოვიხმართ ევროკავშირის მიერ არის დამტკიცებული, ანუ სერთიფიცირებული თაფლია და მხოლოდ რამდენიმე კომპანიას აქვს ასეთი პროდუქტი. შესაბამისად, ჩვენს პროდუქციასაც არ გაუჭირდება ექსპორტზე გასვლა.„ - ამბობს ლუკა სულაბერიძე

ლუკა სულაბერიძის თქმით, პროექტის საბოლოო საინვესტიციო ბიუჯეტი ჯერ დაზუსტებული არაა, რადგან ბოთლში ჩამოსხმა ახლაც მიმდინარეობს. თუმცა, ბიზნესში რამდენიმე ათასი ერთეული ლარი უკვე ჩადებულია, ხოლო კომპანიაში 20 ადამიანი დაასაქმეს.

ანი ცარციძე