ჩირის მწარმოებელი კომპანია „ქარელის ხილი“, რომლის პროდუქციაც ბრენდ „ჩიკორის“ ქვეშ გამოდის, მარტის ბოლოს მომხმარებლებს ახალ პროდუქტს, თხილის ასორტს წარუდგენს. მიქსის შემადგენლობაში ნიგოზი, მიწის თხილი, არაქისი და ნუში იქნება.
გაყიდვების ტენდენციებზე და კომპანიის ახალ გეგმებზე საიტი EastFruit ექსპორტის საკითხებში კომპანიის მენეჯერს ანა სოსელიას გაესაუბრა.
-რატომ გადაწყვიტა ჩირის მწარმოებელმა კომპანიამ თხილის მიქსის წარმოება და ეს პროდუქტი რომელ ბაზარზეა გათვლილი?
-100-გრამიან შეფუთვაში დაფასოებული თხილის მიქსი ჩვენი კომპანიის მიერ შემოთავაზებული კიდევ ერთი ჯანსაღი სნეკი იქნება. საქართველოში თხილი ტრადიციულად ძალიან უყვართ, ამიტომაც ვიმედოვნებთ, რომ ახალი პროდუქცია ადგილობრივ მომხმარებლებს მოეწონება.
ამავე დროს ჩვენ ამ პროდუქტის ექსპორტზეც ვფიქრობთ.
-როგორია სადღეისოდ „ქარელის ხილის“ პროდუქციის ასორტიმენტი?
-ესაა ნესვის, საზამთროს, ქლიავის, გარგარის, ხურმის, მანდარინის და ვაშლის ჩირი, ასევე ვაშლის ჩიფსები და ჩირი შოკოლადში. თანაც ეს ყველაფერი ყოველგვარი დანამატების გარეშე. უახლოეს დღეებში, როგორც უკვე ითქვა, ამას თხილის 4 სახეობის მიქსიც დაემატება.
-როგორი იყო თქვენი კომპანიისთვის 2020 წელი, რა გავლენა მოახდინა თქვენს საქმიანობაზე პანდემიამ და როგორია თქვენი მოლოდინები 2021 წელს?
-რა თქმა უნდა, ისევე როგორც ყველა კომპანია მსოფლიოში, პანდემიამ ჩვენც დაგვაზარალა. 2020 წელს პროდუქციის წარმოება ჩვეულ რეჟიმში მიმდინარეობდა, თუმცა გაყიდვების კუთხით, იმის მიუხედავად, რომ 2019 წელთან შედარებით ზრდა გვქონდა, დაგეგმილ მაჩვენებლებზე მაინც ვერ გავედით. ალბათ იმიტომ, რომ ჩირი პირველადი დანიშნულების საქონელი არაა.
ამავე დროს საექსპორტო გეგმები, რამდენიმე თვის დაგვიანებით, მაგრამ მაინც, მთლიანად შესრულდა.
2021 წლის მოლოდინები პოზიტიური გვაქვს, რაც შიდა ბაზარზე გაყიდვების ზრდის წინაპირობებით და საექსპორტო მოთხოვნის მატებითაა განპირობებული. შესაბამისად, ჩვენ 2021 წელს წელიწადში წარმოების 150 ტონამდე გაზრდას ვგეგმავთ.
-თქვენი კომპანიის მიერ წარმოებული პროდუქციისრა პროცენტი და რომელ ქვეყნებში ექსპორტირდება?
-ექსპორტზე ჩვენ პროდუქციის 30%-ს, ძირითადად ლიტვაში, ჩეხეთში, ავსტრიაში, გერმანიაში, პოლონეთში, იაპონიაში და ჩინეთში ვაგზავნით. ჩვენს პროდუქციაზე საექსპორტო მოთხოვნა საკმაოდ მაღალია, იმიტომ, რომ მომხმარებლები სხვადასხვა ქვეყნებში მას კარგად იცნობენ.
ჩვენ უკვე არსებულ პარტნიორებთან თანამშრომლობას ვაგრძელებთ, მათ ახალი ბაზრები ემატებიან.
1 თვის წინ ჩვენ ჩირის პირველი პარტია ისრაელში გავაგზავნეთ, აპრილში კი საცდელი პარტია ყატარში წავა.
-ყველაზე კარგად „ჩიკორის“ ბრენდის რომელი პროდუქტი იყიდება?
-ყველაზე დიდი მოთხოვნა საექსპორტო ბაზრებზე საზამთროს, ნესვის და ხურმის ჩირზეა. ადგილობრივ ბაზარზე ცალსახა ლიდერია შავი ქლიავი.
ხილის გადამამუშავებელი საწარმო „ქარელის ხილი“ 2015 წელს გაიხსნა. 2020 წლის იანვარში კომპანიამ სასურსათო პროდუქციის უსაფრთხოების სერტიფიკატი FSSC 22000 მიიღო.
კომპანია 30 ჰექტარის ხილის ბაღებს ფლობს. საკუთარი წარმოების და ადგილობრივი მოსახლეობისგან შესყიდული ხილისგან კომპანია ჩირის 20 სახეობას აწარმოებს.
east-fruit.com
მოამზადა თენგიზ აბლოთიამ
ქარელის ხილი
