„ქაოსს რომელიც ისედაც არსებობდა კურორტებზე, დაემატება კიდევ ერთი სტრუქტურა, რომელიც რეალურად კიდევ უფრო მეტ ქაოსს შეიტანს კურორტების მართვაში“, - ასე აფასებს პარლამენტის ფრაქცია „დამოუკიდებელი დეპუტატების“ თავმჯდომარის მოადგილე ლევან კობერიძე საკანონმდებლო ინიციატივას, რომლის მიხედვითაც იარსებებს 1 გენერალური მენეჯერი, რომელიც კურორტს სრულად წარმართავს.
ლევან კობერიძე აცხადებს, რომ სტრუქტურა ვერ იქნება ეფექტური და ის სახელმწიფო ბიუჯეტის მფლანგველი კიდევ ერთი ორგანიზაცი იქნება. მისი თქმით, პრემიერ-მინისტრის დავალებით, შეიქმნება კიდევ ერთი დამატებითი სტრუქტურა, სსიპ-ი, რომელშიც მმართველი გუნდის ერთგული ადამიანები დასაქმდებიან.
„განცვიფრებული ვარ ამ გადაწყვეტილებით, აღნიშნული საკანონმდებლო ცვლილებები არანაირ წარმატებულ საერთაშრისო პრაქტიკას არ შეესაბამება და რეალურად ვერ შეძლებს ტურისტულ მიმართულებაზე არსებული პრობლემების მოგვარებას. ეს იქნება ბიუჯეტის მხარჯველი კიდევ ერთი სტრუქტურა. როდესაც პრემიერმა ინიციატივა გააჟღერა იმედი გამიჩნდა, რომ კურორტის მართვის იმ ფორმას აირჩევდნენ, რომელიც ძალიან ბვერ ევროპულ კორორტის მქონე რეგიონში არის მიღებული. ეს არის კერძო და საჯარო სექტორს შორის თანამშრომლობის ფორმატი, მათთვის ეს აპროპირებულია და ფაქტობრივად კურორტების წარმატების რეცეპტია, თავის დროზე მეც ეს ფორმატი მქონდა შეთავაზებული ეკონომიკის სამინსიტროსთვის.“,- აცხადებს ლევან კობერიძე
დეპუტატი „კომერსანტთან“ დეტალურად საუბრობს კურორტების მართვის იმ წარმატებულ მოდელზე, რომელიც მისი თქმით, დასავლეთმა უკვე გამოიყენა. დეპუტატი მზაობას გამოთქვამს, რომ მმართველ გუნდს მართვის სისტემის პრეზენტაცია წარუდგინოს, რათა მისი თქმით, მიღებული არასწორი გადაწყვეტილება შეცვალონ. როგორც კობერიძე აცხადებს, ქვეყანაში არსებობენ გამოცდილი ადამიანები, ვისაც აღნიშნული საკითხის სწორად წარმართვა შეუძლია.
„ეს არის ფორმატი, როდესაც კერძო და საჯარო სექტორები თანამშრომლობენ, იქმნება სპეციალური სუბიექტი, რომელიც არის დაკომპლექტებული როგორც საჯარო სექტორის, ასევე კერძო სექტორის წარმომადგენლებითაც. ბიუჯეტი ყალიბდება ერთის მხრივ, სახელმწიფოს მიერ შევსებული თანხით, მეორეს მხრივ, კერძო სექტორის მიერ გადახდილი მიზნობრივი გადასახადებით.
ფორმირდება ბორდი, რომელსაც გამოაქვს სამოქმედო გეგმა თუ რა სჭირდება კურორტს განვითარებისთვის და ამ გეგმის დამტკიცების შემდეგ უკვე აღმასრულებელი სტრუქტურა აღასრულებს შემუშავებულ გეგმას. იქნება ეს ტურიზმის დეპარტამენტი თუ კერძო სექტორი, მათთვის სავალდებულო იქნება ბორდის გადაწყვეტილების აღსრულება. მიღებებულ გადაწყვეტილებას პოლიტკური სპეკულაციები ვერ გადაწონის. როცა ხელისუფლებას უნდა კორორტზე, ხმების მიღების მიზნით, რაღაც პოპულისტური ნაბიჯის გადადგმა, კერძო სექტორი ამის საშუალებას არ მისცემს, რადგან ბორდში ისიცაა წარმოდგენილი. კერძო სექტორის მხრიდანაც ვერანაირ გადაცდომას ვერ ექნება ადგილი, რადგან საჯარო ინტერესის დამცველად სახელმწიფოს წარმომადგენელი გვევლინება. ამ საკითხზე მაინც დაჯდეს ხელისუფლება და ოპოზიცია, ეკონომიკის კომიტეტში მობრძანდნენ, ნუ ეშინიათ, ნუ ერიდებათ პარლამენტში სიარული, რადგან მათ შორის ოპოზიციასაც საკმაოდ დიდი რესურსის მობილიზება შეუძლია ქვეყანის სწორი განვითარების ხედვის ჩამოყალიბებაში“-აღნიშნავს კობერიძე.
შეგახსენებთ, რომ საკანონმდებლო ცვლილებების შესახებ პრემიერმა გიორგი გახარიამ განაცხადა, რომ ტურისტული ლოკაციებისა და ტურისტული ქალაქების მართვის კუთხით სერიოზული გამოწვევაა. მან ისაუბრა კოორდინაციის პრობლემაზე და მაგალითად, ბაკურიანში და გუდაურში ბოლოს განვითარებული მოვლენები მოიყვანა.
ბაჩო ადამია