საჯარო სექტორში დასაქმებული ადამიანების მთლიანი სახელფასო ანაზღაურება 2021 წელს იზრდება. 2021 წლის ბიუჯეტის პროექტის საბოლოო ვერსიის თანახმად, მომდევნო წელს საჯარო სექტორში დასაქმებულების შრომის ანაზღაურებისთვის 1,614,671.1 ათასი ლარია გათვალისწინებული, რაც 60 მილიონი ლარით მეტია 2020 წელთან შედარებით. ეს კიდევ ერთხელ მოწმობს, რომ ქვეყანაში არსებული ეკონომიკური კრიზისის მიუხედავად, მთავრობაში ქამრების შემოჭერის პოლიტიკა კვლავ არააქტუალურია.
არსებული ინფორმაციით, მომდევნო წელს საჯარო სექტორის შრომის ანაზღაურების საერთო ბიუჯეტის ზრდა ძირითადად განპირობებულია 2020 წელს პოლიციასა და ჯარში გაზრდილი შრომის ანაზღაურების სრული წლის დაფინანსებით. ასევე, ბიუჯეტის პროექტში გათვალისწინებულია 2021 წლის იანვრიდან, სტატუსის მქონე მასწავლებლების სახელფასო დანამატის ზრდა 100 ლარით.
აღსანიშნავია, რომ 2021 წელს იგეგმება საჯარო სექტორში დასაქმებულების რაოდენობის ზრდაც. კერძოდ, 2021 წელს საჯარო სექტორში 112 570 დასაქმებული იქნება რაც 2020 წელთან შედარებით, 356-ით მეტია.
გარდა ამისა, მთლიანობაში 2021 წლის ბიუჯეტის პროექტით მთავრობის ასიგნებები 18.4 მილიარდი ლარით განისაზღვრება, რაც ბიუჯეტის რეკორდული მოცულობაა. მთავრობის ხარჯები კი 2020 წელთან შედარებით ჯამში 2.46 მილიარდი ლარით იზრდება.
გაზრდილი ხარჯების დაფინანსების მთავარი წყარო მომდევნო წელსაც ახალი საგარეო ვალის აღება იქნება, რაც 5.27 მილიარდი ლარს გულისხმობს. თუმცა, 2021 წელი ბოლო 10 წლის განმავლობაში იქნება პირველი, როდესაც მთავრობა ახალ შიდა ვალს არ აიღებს, შესაბამისად, მომდევნო წელს ჯამურად არც სახაზინო ვალდებულებების და არც ახალი სახაზინო ობლიგაციების ემისია არ მოხდება.
აღსანიშნავია, რომ 2021 წლის ბიუჯეტი 4.3%-იან ეკონომიკურ ზრდაზე არის დაგეგმილი, ეს ეკონომიკური ზრდის პირველად პროგნოზთან შედარებით 0.7 პროცენტული პუნქტით ნაკლებია, ამიტომ, ზრდის შემცირების გამო, საგადასახადო შემოსავლების გეგმაც პირველად პროექტთან შედარებით შემცირებულია.
2021 წლის ბიუჯეტის პროექტის მიმართულებები ასეთია:
- ჯანდაცვის სამინისტრო - 5.56 მილიარდი ლარი, სამინისტროს დაფინანსება 48 მილიონით იზრდება;
- რეგიონული განვითარებისა და ინფრასტრუქტურის სამინისტრო - 2.42 მილიარდი ლარი, სამინისტროს დაფინანსება 551 მილიონი ლარით იზრდება;
- განათლების, მეცნიერების, კულტურისა და სპორტის სამინისტროს ბიუჯეტი 2020 წელთან შედარებით 264.5 მილიონი ლარით იზრდება და 1.8 მილიარდი ლარით განისაზღვრება;
- გარემოს დაცვისა და სოფლის მეურნეობის სამინისტროს დაფინანსება შეადგენს 463.6 მლნ ლარს, უწყების დაფინანსება 2020 წელთან შედარებით 13 მილიონი ლარით მცირდება;
- ეკონომიკისა და მდგრადი განვითარების სამინისტროს ბიუჯეტი 352 მილიონი ლარით მცირდება და ის 469.8 მილიონი ლარით განისაზღვრება.
- ფინანსთა სამინისტროს ბიუჯეტი 88.9 მილიონ ლარამდე იზრდება, მატება 8 მილიონ ლარია.
- იუსტიციის სამინისტროსთვის გათვალისწინებულია 246.5 მლნ ლარი, რაც 2020 წლის ბიუჯეტთან შედარებით 22 მილიონი ლარით მეტია.
- საგარეო საქმეთა სამინისტროსთვის გათვალისწინებულია 174.2 მლნ ლარი, რაც 2020 წლის ბიუჯეტთან შედარებით 18.2 მილიონი ლარით მეტია.
- თავდაცვის სამინისტროსთვის გათვალისწინებულია 900.0 მლნ ლარი, რაც 2020 წელთან შედარებით 95 მილიონი ლარით მეტია.
2021 წლის სახელმწიფო ბიუჯეტი მეათე მოწვევის პარლამენტმა უნდა დაამტკიცოს.
ნინო თამაზაშვილი
ხელფასი
