თბილისის ერთ-ერთი ცნობილი, პრემიუმ კლასის რესტორნის „ქალაქის“ ახალი სიცოცხლე იწყება. ერთ წლიანი პაუზის შემდეგ განახლებული კონცეფციით რესტორანი 24 მაისს გახსენება. ახალი მენეჯმენტი მუშაობას ამბიციური გეგმებით იწყებს. პირველი ნაბიჯი, რომელიც მათ გადადგეს მენიუს ეხება, ევროპული კონცეფციის რესტორანი სრულად ქართულ სამზარეულოზე გადაერთვება. „ქალაქის“ მმართველი ზურა ტალახაძე გვიყვება, რომ სტუმრებს შესაძლებლობა ექნებათ დააგემოვნონ ისეთი კერძები, რომელიც თბილისის არც ერთი რესტორნის მენიუში არ არის.
„ის სიტუაცია, რომელიც პანდემიამდე რესტორან „ქალაქში“ იყო რადიკალურად შევცვალეთ. შევქმენით ახალი მიმართულებით - ქართული, კუთხური სამზარეულოს მიმართულება. მენიუში იქნება ისეთი კერძები, რომლებიც შეიძლება თბილისის არც ერთ რესტორანში არ იყოს. დღევანდელი სიტუაციიდან გამომდინარე არ ჩავთვალეთ საჭიროდ რესტორანში ევროპული სამზარეულო დაგვეტოვებინა. ფასებთან დაკავშირებით გეტყვი, რომ ახალი კონცეფციის მიხედვით გათვლა საშუალო და მაღალ სეგმენტზე გვაქვს. ნებისმიერი ადამიანს, რომელიც გვესტუმრება დავახვედრებთ უგემრიელეს კერძებს და კარგ მომსახურებას. პლუს ამას გვეყოლება ცოცხალი ბენდი, რომელიც ბევრ რესტორანში ფუფუნება გახდა. ჩვენი მიზანია, რომ ყველა მომხმარებელი კმაყოფილი იყოს როგორც მომსახურებით და სამზარეულოთი ასევე ფასებით“, - აცხადებს ზურა ტალახაძე.
ერთადერთი რაც რესტორანში არ შეიცვლება „ქალაქის“ დიზაინია. „კომერსანტის“ კითხვაზე რატომ მიიღეს რესტორანი გახსნის გადაწყვეტილება მაშინ, როცა სტუმართ-მასპინძლობის სექტორი საქართველოში მნიშვნელოვანი გამოწვევების წინაშეა, ზურა ტალახაძე მიიჩნევს, რომ ისეთი რესტორანი როგორიც „ქალაქია“ არ შეიძლება დახურული იყოს.
„ქალაქის“ გახსნის გადაწყვეტილება იმიტომ მივიღეთ, რომ ასეთი რესტორანი დახურული არ უნდა იყოს. ჩვენ კონკურენციაში შესვლას არავისთან არ ვაპირებთ, ქალაქი თვითონ შექმნის ისეთ იმიჯს, რომ სხვა რესტორნები მიბაძავენ. შეიძლება ეს სამ და ოთხ თვეში არ მოხდეს, მაგრამ თუ სიტუაცია გამოსწორდა დიდი შანსია, რომ თბილისში ერთ-ერთი საუკეთესო რესტორანი იყოს. მინდა შევქმნა „ქალაქის“ ახალი სიცოცხლე, ამის შანსი ნამდვილად გვაქვს. დღეს ის სიტუაცია, რომ იყოს რაც პანდემიამდე შანსები გაცილებით დიდი იქნებოდა, თუმცა დღეს რაიმეს პროგნოზირება ცოტა რთულია“, - განაცხადა ზურა ტალახაძემ.
ბაჩო ადამია