,,პროგრესის ცენტრის" ინიციატივით კოალიცია ,,ექსპერტები განათლების რეფორმისთვის" ჩამოყალიბდა. კოალიციის მიზანია განათლების სფეროში კომპეტენტური პირებისა და ექსპერტების მიერ განათლების პრობლემების ინვენტარიზაცია, იდენტიფიცირება და პრობლემის გადაჭრის მექანიზმებზე მუშაობა.

კოალიციის წევრები არიან: პოლიტოლოგი - ლევან ლორთქიფანიძე, პროფესორი - ცირა ბარამიძე, პროფესორი - ცირა ბარბაქაძე, თბილისის სახელმწიფო უნივერსიტეტის დოქტორანტი - გიგი ბერიძე, ,,პროგრსის ცენტრის“ თავმჯდომარე- ელენე ელბაქიძე და პოლიტიკის მეცნიერების მაგისტრი - მაკა ტოხიშვილი.

როგორც ,,პროგრესის ცენტრის“ ხელმძღვანელი ელენე ელბაქიძე აცხადებს, ,,როგორც ცნობილია, ჩვენი განათლების სისტემის ხარისხი ვერ აკმაყოფილებს ევროპული განათლების კრიტერიუმებს. ჩვენი ახალგაზრდები იმსახურებენ უკეთეს განათლებას. ამიტომ გადავწყვიტეთ ამ კოალიციის შექმნა, რომლის პროექტის მიზანია, ხელი შევუწყოთ განათლების სისტემის ტრანსფორმირებას და დავაახლოვოთ ევროპულ სტანდარტებთან.“

,,ვფიქრობ, ძირეული რეფორმები უნდა განხორციელდეს საგანმანათლებლო სისტემაში, ვინაიდან დროა კოორდინირებულად ვიმოქმედოთ საგანმანათლებლო რეფორმის ცვლილებისთვის,“ - აცხადებს მაკა ტოხიშვილი - პროექტის კოორდინატორი.

პროფესორი ცირა ბარბაქაძის თქმით, მას კოალიცია ესახება, როგორც ინსტრუმენტი, რომელიც მოიძიებს, დააგროვებს და ორგანიზებულად გამოხატავს განათლებაში დაგროვილ პრობლემებს. როგორც ბარბაქაძე აღნიშნავს, ეს იქნება წერტილოვანი დარტყმები, რომელიც ააფეთქებს სხვადასხვა სეგმენტს და ამის შემდეგ შედეგებიც დაიდება.

,,ვთვლი, რომ ექპერტთა ჯგუფი, რომელიც დღეს ჩამოყალიბდა, იქნება ერთ-ერთი ის ცენტრი, საიდანაც შესაძლებელი გახდება განათლების პრობლემებზე დიალოგის დაწყება და ვთვლი, რომ განათლების შესახებ აუცილებელი არის მუდმივი მსჯელობა საზოგადოებასა და სახელმწიფოს შორის“,- აღნიშნავს გიგი ბერიძე - თბილისის სახელმწიფო უნივერსიტეტის დოქტორანტი.

,,პროგრესის ცენტრი“, განათლების სისტემაში არსებული პრობლემებიდან გამომდინარე, სტუდენტთა კოალიციის ჩამოყალიბებასაც გეგმავს.