კომპლექსი „შენი სახლი ჯიქიაზე“ 28- ე სახლის მშენებლობით  დასრულდება. კომერსანტს კომპანია „არსის“ გენერალურმა დირექტორმა ბესო ოთოროიძემ უთხრა, რომ ამ ეტაპზე ჯიქიას საცხოვრებელ კომპლესში 28-ე სახლის მშენებლობა მიმდინარეობს.

„ჯიქიაზე  გვაქვს 27  საცხოვრებელი კორპუსი, საოფისე  და კომერციული  ფართები, სადაც 1 400 ბინაა და დაახლოებით 3 000 მაცხოვრებელი, 27-ივე  სახლი ექსპლუატაციაშია მიღებული, ახლა მიმდინარეობს კიდევ ერთი კორპუსის მშენებლობა, რითაც ეს კომპლექსი დასრულდება, – ამბობს ბესო ოთოროიძე.

მისივე თქმით, მშენებარე სახლში 1 კვადრატული მეტრი საცხოვრებელი ფართის ფასი 900-1000 დოლარის ექვივალენტია, ხოლო  უკვე  აშენებულში, კვადრატულის მეტრის ფასი მეორად ბაზარზე 1200-1300 დოლარს შეადგეს.

პროექტი ,,შენი სახლი ჯიქიაზე”  ესტონურ–ქართული კომპანიის მიერ ხორციელდება. 2013 წლის სექტემბერში პირველი საცხოვრებელი სახლის მშენებლობა დაიწყო  – ბანკის სესხის გარეშე, ესტონური ინვესტიციით. საცხოვრებელი კომპლექსი მდებარეობს საბურთალოზე, კერძოდ ანა პოლიტკოვსკაიას #3-ში.

სულ აშენებულია და ექსპლუატაციაში მიღებულია 27 საცხოვრებელი სახლი. ტერიტორიის ფართი შეადგენს 5,5 ჰექტარს. კომპლექსი სრულად არის აღჭურვილი სრულყოფილი საუბნო ინფრასტრუქტურით: ფეხბურთის მოედანი, კალათბურთის მოედანი, 7 სკვერი და 2 საბავშვო მოედანი.

თაკო კვაჭანტირაძე