„პანდემიამ ხელი შეუშალა ახალი გუდაურის განვითარების ტემპს, მაგრამ ვეცდებით, რომ პროექტი დარჩენილ 3-4 წელიწადში მთლიანად დავასრულოთ,“ - ამის შესახებ „კომერსანტს“ დეველოპერული კომპანია „რედკოს“ იურისტმა მალხაზ კუნელაურმა განუცხადა.
გუდაურში კომპანია „რედკომ“ მასშტაბური პროექტის „ახალი გუდაურის“ განვითარება 2016 წელს დაიწყო. ზამთრის კურორტის განვითარების გეგმა 500 000 კვ.მ.-ს. მოიცავს ამ მთლიან ტერიტორიაზე კანადური კომპანია „ეკოზაინის“ მიერ მომზადდა განაშენიანების გეგმა. გეგმა მოიცავს ჯამში 26 შენობის მშენებლობას, საიდანაც ნაწილი არის ე.წ. აპარტოტელი ანუ აპარტამენტები და არის ასევე ბრენდული სასტუმროები. ერთერთი ასეთი სასტუმროა 170 ნომრიანი „რედისონი“, რომელიც ამჟამად მშენებლობის პროცესშია.
„26 შენობიდან აშენებული გვაქვს ნახევარი, შესაბამისად ჩვენ დაგეგმილი გვქონდა, რომ ეს პროექტი 2023 , მაქსიმუმ 2024 წლისთვის დაგვესრულებინა.
გუდაურის ეს ლოკაცია მთლიანად პატარა დასასვენებელი ქალაქი იქნება დასრულებული თავისი შიდა გზებით, ინფრასტრუქტურით, საზოგადოებრივი ობიექტებით, კლუბებითა და რესტორნებით. ნაწილი უკვე დასრულებულია და იქ უკვე შიდა ინფრასტრუქტურა, საცურაო აუზები და რესტორნები და პირველ სართულებზე საზოგადოებრივი დანიშნულების ობიექტები უკვე ფუნქციონირებს.
არც ერთი პროექტი არ გაჩერებულა,გუდაურში ყველა მიმდინარე პროექტი შეუფერხებლად მიდის. რაც შეეხება ახალი პროექტების მოცულობებს და რაოდენობებს, ერთი დავიწყო თუ ათი, იმის მიხედვით, გადავწყვეტ თუ რა მოთხოვნა იქნება ბაზარზე,“ - ამბობს „რედკოს“ იურისტი.
როგორ აისახა გუდაურში ბინების გაყიდვებზე პანდემია და „ლოქდაუნი“, „რედკოში“ გვპასუხობენ, რომ ფაქტობრივად ნულამდე დასული გაყიდვების მაჩვენებელი ეტაპობრივ გამოცოცხლებას იწყებს, მიუხედავად იმისა, რომ კომპანიას ფასები არ შეუცირებია.
„იმასთან შედარებით, რაც პანდემიის პერიოდში იყო, როცა ყველა სახლში ვიყავით გამოკეტილი, ახლა ამოძრავდა უძრავი ქონების ბაზარი და გამოცოცხლებაც შეინიშნება.
გვაქვს აქციები, მაგრამ ფასის შემცირების კუთხით რამე ხელშესახები გადაწყვეტილება არ მიგვიღია და ახლა ამას ვერც გააკეთებ. ჩვენ ვართ სრულიად გაყიდვებზე დამოკიდებული, ანუ კაპიტალით ძალიან მცირე ნაწილს ვაშენებთ. ძირითადი დონორი არის გაყიდვები შესაბამისად, როდესაც კომპანია ესე იზრდება და ასეთ პროექტს აკეთებს იქ მარჟის ჩამოწევა შეუძლებელია. მთავარი ფაქტორი რის გამოც ამას ვერ გააკეთებ არის ის, რომ ბაზარზე არც ერთი მიმართულებით არაფერი არ იაფდება, რაც უშუალოდ ამ უძრავი ქონების შექმნას უზრუნველყოფს, ანუ მასალები, დასაქმებულების ხელფასები. პლუს ამას, კიდევ დამატებით ახალი რეგულაციები შემოდის, რომელიც მასალებს აძვირებს და კიდევ გემატება საკანონმდებლო ტვირთი, რომელიც რა თქმა უნდა რომელიც ფასის შემცირების შესაძლებლობას არ მოგცემს,“ - განმარტავს მალხაზ კუნელაური.
2019 წელს „რედკომ“ სამშენებლო სამუშაოების შესრულება სამშენებლო კომპანია „ანაგს“ გადააბარა, რომელიც, მათი თქმით, პასუხისმგებელია „რადისონ ბლუ გუდაურის“ და სხვა პროექტების მშენებლობასა თუ ხარისხზე.
მარიამ მორგოშია