ყოველდღიური მოხმარების საგნებისა და თავის მოვლის საშუალებების ყველაზე მსხვილი სადისტრიბუციო კომპანიის,  „შარმ ტრეიდინგის“  დირექტორის,  ვახტანგ საძაგლიშვილის თქმით,  დეკემბრიდან ფასები ლარის კურსის მაჩვენებლის შესაბამისად გაიზრდება.

„ნოემბერში ფასების ზრდა არ არის მოსალოდნელი, ვინაიდან გვაქვს მარაგები, პროდუქცია უკვე შეძენილია, ამიტომ ფასები დეკემბრამდე არ გაიზრდება, თუ რაღაც საოცრება არ მოხდა.  ლარის გაუფასურების მოლოდინი გვქონდა და შესაბამისად, მოვემზადეთ კიდეც ამისთვის. 2020 წელი დაგეგმილი იყო 3.3 მაჩვენებელზე, თუმცა კურსი 3.8-ზეც იყო ასული და 3.2-ზეც ჩამოსული.  ეროვნული ბანკი, ცხადია, თავის სიმაღლეზე ვერ დგას. ერთი თვის განმავლობაში ლარი ასეთი ცვალებადი არ უნდა ყოფილიყო. თუმცა, რას ვიზამთ? - ამას შეგუებულები ვართ, ჩვენც ფეხს ვუწყობთ,“- ამბობს ვახტანგ საძაგლიშვილი.

მისი თქმით, კომპანიას რამდენიმე მილიონი (ლარის/დოლარის არ აკონკრეტებს) ზარალი მიადგა. ამ ეტაპზე, „შარმ ტრეიდინგს“ უკვე დაწყებული აქვს შემდეგი წლისთვის მზადება. ვახტანგ საძაგლიშვილს ეროვნული ბანკის სამომავლო პოლიტიკასთან დაკავშირებით მოლოდინები არ აქვს და აცხადებს,რომ კომპანია თავად გაუმკლავდება პრობლემებს.

„არ მაქვს არც დადებითი და არც უარყოფითი მოლოდინები. ჩვენ თავზე ვართ დამოკიდებული და ვფიქრობთ,რომ ჩვენივე ძალებით უნდა გავუმკლავდეთ იმ სირთულეებს, რაც გველოდება,“- ამბობს ვახტანგ საძაგლიშვილი.

“შარმ ტრეიდინგი” საქართველოში ერთ-ერთი წამყვან სადისტრიბუციო კომპანიას წარმოადგენს,რომელიც დისტრიბუციას უწევს ისეთ პოპულარულ ბრენდებს, როგორებიცაა:Unilever, Henkel, Schwarzkopf&Henkel, Eczacibasi, Tchibo, SCA, Carlsberg, 3M და სხვა. კომპანიამ დისტრიბუციის გარდა, ბიზნესი სხვა მიმართულებებითაც განავითარა და დღეისათვის თავის ჯგუფში ისეთ დიდ პროექტებს აერთიანებს როგორიცაა: შ.პ.ს. „ბი ემ სი შარმი“ , ს.ს „ლელო“ და შ.პ.ს „იალონი“