რადიო კომერსანტის გადაცემაში „ეკონომისტის დრო ლევან ქისტაურთან ერთად“ საქართველოს მწარმოებელთა ფედერაციის ხელმძღვანელი, ლევან სილაგავა ბიზნესის გამოწვევებზე საუბრობს და აღნიშნავს,რომ  მთავრობის სტიმულირების გეგმა ბიზნესისთვის უფრო გამჭვირვალე და პროგნოზირებადი უნდა ყოფილიყო.

„ბიზნესი სერიოზული პრობლემების წინაშე დგას. გაწყდა ჯაჭვი და მომხმარებელსა და ბიზნესს ქცევა შეეცვალა. მომხმარებელი წავიდა პირველადი პროდუქციის შესაძენად, შესაბამისად, პროდუქციის ნაწილის გაყიდვა შეჩერდა. ვფიქრობ,რომ პრიორიტეტები უნდა გაწერილიყო იმისა,თუ საით წასულიყო მთლიანობაში ის თანხები,რომელიც საგარეო ვალმა მოგვიტანა. სტიმულირების გეგმა უფრო გამჭვირვალე და პროგნოზირებადი უნდა ყოფილიყო. მოგეხსენებათ რომ ბიზნესს უყვარს პროგნოზირება.

დღეს ბიზნესი შენარჩუნების სტადიაზე იმყოფება და მოლოდინი არ აქვთ იმისა,რომ იმ სიმაღლეებზე ავლენ, რაც მათ ადრე ჰქონდათ.  მოხდა ისე,რომ მათ თავიანთი რესურსების ხარჯზე სცადეს შენარჩუნება. სერიოზული პრობლემები ჰქონდათ სამუშაო ადგილების შენარჩუნების კუთხით. ხდებოდა ხელფასების შემცირება და ფუნდამენტური გადაადგილება. ვისაც ჰქონდა იმის საშუალება,რომ პროდუქცია არ გაეჩერებინა და დაესაწყობებინა, მცირე რაოდენობა შიდა ბაზარზე გამოიტანა. ხშირად ვაწყდებით წარწერებს: „იყიდება“ „ქირავდება“, ეს ნიშნავს რომ იქ, ვიღაც ადრე მუშაობდა და ახლა აღარ მუშაობს, და არც ახალი მოთხოვნა ჩანს,რომ ვიღაცამ იქირაოს და იმუშაოს,“- აღნიშნავს ლევან სილაგავა და ხელისუფლების მხრიდან მცირე, საშუალო და მსხვილი ბიზნესის წარმომადგენლებთან საკონსულტაციო პლატფორმების შექმნის აუცილებლობაზე საუბრობს.

„ჩვენთვის მნიშვნელოვანია,რომ ეკონომიკური გადაწყვეტილებების მიღების პროცესში არსებობდეს პლატფორმა,სადაც ბიზნესის სფეროს ჩართულობა იქნება.  მნიშვნელოვანია ასევე კანონმდებლობის დახვეწა. ჩვენ ინვესტიციებს ველოდებით, რომელმაც არ იცის თავის მხრივ, იქნება თუ არა დაცული. გვჭირდება ბიზნეს დავების გამჭვირვალობა, გადაწყვეტილების მიღების სიჩქარის ზრდა. იმ შემთხვევაში, თუ ინვესტორებს პრობლემა შეექმნებათ, მათ უნდა იცოდნენ თუ როგორ გამოვიდნენ ნაკლებად მტკივნეულად.ბიზნესისითვის არა მხოლოდ მარტივად შესვლა, არამედ რისკის შემთხვევაში ადვილად გამოსვლაც მთავარია. ვისურვებდი,რომ ამ ტიპის პლატფორმებზე მოხდეს ბიზნესის საჭიროებების შესწავლა, და წარმოდგენილი იყვნენ, როგორც მსხვილი, ისე საშუალო და მცირე ბიზნესიც.  საშუალო ფენა გვჭირდება იმისთვის,რომ საზოგადოება სწორად განვითარდეს,“- ამბობს ლევან სილაგავა.

ნათია კეკენაძე