2020 წელს 774 300 ლარით დაფინანსდა 5 კომპანია, რომელთა მესაკუთრეებსა და დირექტორებს „ქართული ოცნებისთვის“ და სალომე ზურაბიშვილისთვის 610 000 ლარი აქვთ შეწირული. ამის შესახებ ინფორმაციას „ფლანგვის დეტექტორი“ ავრცელებს. არასამთავრობო ორგანიზაციის კვლევით, 93 ათასი ლარით დაფინანსდა ოცნების ყოფილი მაჟორიტარის, ზაქარია ქუცნაშვილის ძმის კომპანია შპს „ბაზალტ ფაიბერი“. მათი ინფორმაციით, ივერი ქუცნაშვილი კომპანიაში არაპირდაპირ წილებს ფლობს. კონკრეტულად კი, კომპანიის ბაზალტ ფაიბერის 7.5% მესაკუთრე შპს „გოლდენ ფლიის კაპიტალია“, რომლის 33.4% წილის მესაკუთრე ასევე ივერი ქუცნაშვილია.
„ფლანგვის დეტექტორის“ ცნობით, „აწარმოე საქართველოში“ პროგრამის ფარგლებში 2019 წელს ინდუსტრიული განვითარების მიმართულებით, რომელიც სასტუმრო და საწარმოების განვითარებას მოიცავს, 281 პროექტი დააფინანსა, საერთო ჯამში 22 331 323 ლარით. მკვლევრები აღნიშნავენ, რომ ბენეფიციარებს შორის ხშირად ხვდებიან ქართული ოცნების მაღალჩინოსნების კომპანიებს ან თავად ქართულ ოცნების შემომწირველებსა და მათ კომპანიებს.
„ფლანგვის დეტექტორმა“ შეისწავლა 2020 წელს ინდუსტრიული ნაწილის ფარგლებში დაფინანსებული კომპანიები. დაფინანსებულ კომპანიებს შორის 6 კომპანია აღმოჩნდა ქართულ ოცნებასთან დაკავშირებული. 5 კომპანიის შემთხვევაში მესაკუთრეები ქართული ოცნების შემომწირველები არიან, 1 კომპანიის შემთხვევაში კი კომპანიის ერთ-ერთი მესაკუთრე პარლამენტის ყოფილი დეპუტატის, ზაქარია ქუცნაშვილის ძმაა.
საერთო ჯამში 2020 წელს 774 300 ლარით დაფინანსდა 5 კომპანია, რომელთა მესაკუთრეებმა სხვადასხვა დროს ქართულ ოცნებასა და ოცნების მიერ მხარდაჭერილ პრეზიდენტობის კანდიდატს სალომე ზურაბიშვილს საერთო ჯამში 610 000 ლარი შესწირეს. მათ შორის ქართულ ოცნებას - 525 000 ლარი, ხოლო სალომე ზურაბიშვილს - 85 000 ლარი“, - ნათქვამია კვლევაში.
არასამთავრობო ორგანიზაციის ინფორმაციით, შემომწირველებს შორის ყველაზე დიდი დაფინანსება 2020 წელს შპს Construction Service-მა და შპს „შატო კვირიკემ“ მიიღეს.
„შპს Construction Service-მა დაფინანსების სახით აწარმოე საქართველოსაგან 449 306 ლარი მიიღო. კომპანიის 55% წილის მესაკუთრეფ გიორგი გაბუნია, 2016 წელს მან ქართულ ოცნებას 55 000 ლარი შესწირა. კომპანიის 40% მესაკუთრეა შპს „ქისთოუნ ქონსთრაქშენ“, რომლის ერთ-ერთი მესაკუთრე გივი კუბლაშვილია, მან ქართულ ოცნებას 2020 წელს 60 000 ლარი შესწირა. გარდა აწარმოე საქართველოდან მიღებული დაფინანსებისა, კომპანია ტენდერებში მონაწილეობითაც იღებს თანხებს ბიუჯეტიდან. კომპანიას 2013-2021 წლებში 83 200 871 ლარის ღირებულების ტენდერი აქვს მოგებული. ხოლო გამარტივებული შესყიდვის სახით მიღებული აქვს 664 313 ლარი.
რაც შეეხება შპს „შატო კვირიკეს“, „აწარმოე საქართველომ“ 2020 წელს კომპანია 181 430 ლარით დააფინანსა. კომპანიის 100% წილის მესაკუთრე გიორგი ჭყონიაა. მან 2016, 2017, 2021 წლებში ქართულ ოცნებას ჯამში 180 000 ლარი შესწირა, ხოლო 2018 წელს სალომე ზურაბიშვილს 60 000 ლარი. კომპანიის დირექტორმა გია ქათამაძემ ქართულ ოცნებას 2017, 2020, 2021 წლებში 115 000 ლარი შესწირა, ხოლო 2018 წელს სალომე ზურაბიშვილს – 5 000 ლარი“, - აცხადებენ „ფლანგვის დეტექტორში“.
მკვლევრები აღნიშნავენ, რომ თავად შპს „შატო კვირიკეს“ ტენდერებში მონაწილეობა არ უფიქსირდება, თუმცა კომპანია, მათივე ინფორმაციით, სახელმწიფო შესყიდვებში აქტიურად მონაწილეობს და იმარჯვებს გიორგი ჭყონიას მეორე კომპანია შპს „გზა“. კვლევაში ვკითხულობთ, რომ მიუხედავად იმისა რომ კომპანია 2005 წელს დაარსდა, ტენდერებში მონაწილეობას მხოლოდ 2011 წლიდან იწყებს. 2011-2021 წლებში კომპანიამ 101 151 958 ლარის ღირებულების 74 ტენდერში გაიმარჯვა. 29 შემთხვევაში კომპანიას კონკურენტი საერთოდ არ ჰყოლია, ამ გზით მან 46 239 913 ლარის ხელშეკრულებები გააფორმა. ფლანგვის დეტექტორის ინფორმაციით, შპს „გზას“ ასევე უფიქსირდება გამარტივებული შესყიდვები, რაც უკონკურენტო გარემოში, პირდაპირი შესყიდვის წესით, კომპანიასთან ხელშეკრულების გაფორმებას გულისხმობს. 2012-2021 წლებში შპს „გზას“ სახელმწიფოს სხვადასხვა ორგანოებმა 29 გამარტივებული შესყიდვის შედეგად 9 589 167 ლარი გადასცეს.
შეგახსენებთ, რომ სსიპ „აწარმოე საქართველოში“ სახელმწიფო უწყებაა, რომლის ფარგლებში ყოველწლიურად სხვადასხვა პროექტების დაფინანსება ხდება.