„კრიზისული მენეჯმენტისთვის ჯამში და არა პოსტკრიზისულ ეკონომიკურ აღდგენაზე, ქვეყანა დახარჯავს 3 მლრდ 500 მლნ ლარს. აღნიშნულიდან მოქალაქეზე ზრუნვასა და მათ სოციალურ დახმარებაზე დაიხარჯება 1 მლრდ 35 მლნ ლარი, ეკონომიკაზე ზრუნვასა და მეწარმეობის მხარდაჭერაზე 2 მლრდ 110 მლნ ლარი, ხოლო ჯანდაცვის სისტემის გაძლიერებასა და პანდემიასთან ბრძოლაში 350 მლნ ლარი“, - ამის შესახებ საქართველოს პრემიერ-მინისტრმა გიორგი გახარიამ ანტიკრიზისული ეკონომიკური გეგმის წარდგენისას, უწყებათაშორის საკოორდინაციო საბჭოსთან არსებული ანტიკრიზისული ეკონომიკური ჯგუფის სხდომაზე განაცხადა.

პოლიტოლოგი გია ხუხაშვილი „კომერსანტთან“ საუბრისას აღნიშნავს, რომ პრემიერ-მინისტრის მიერ წარმოდგენილი გეგმა სოციალური დანიშნულებისაა და მას ეკონომიკის სტიმულირებასთან საერთო არაფერი აქვს. მისივე თქმით, ეკონომიკის სტიმულირებად მხოლოდ დღგ-ს დაბრუნების და საშემოსავლო გადასახადის სუბსიდირების ნაწილი შეიძლება მივიჩნიოთ.

„პრემიერისგან რა გეგმაც მოვისმინეთ ძირითადად, სოციალური დანიშნულებისაა და ამას ეკონომიკის სტიმულირებასთან სუსტი კავშირი აქვს. ეკონომიკური სტიმულირების დარქმევა ამ ყველაფერზე დიდი გადაჭარბება იქნება. ეკონომიკასთან კავშირი აქვს ერთადერთი საშემოსავლო გადასახადის სუბსიდირებას თუ კომპანიები შეინარჩუნებენ სამუშაო ადგილებს. ტექნიკური დახმარებაა დღგ-ს ავტომაური დაბრუნებაც, რაც ისედაც კანონში არის გაწერილი და ვისაც ეკუთვნის უნდა დაუბრუნდეს. დანარჩენი ყველაფერი ეს არის წმინდა წყლის სოციალური მოქმედებები, ამ თანხების ეკონომიკასთან მიბმა ბევრად უკეთესად შეიძლებოდა და ეს ხელისუფლებამ არ გააკეთა.

ეჭვი მაქვს, რომ ამის მიზეზი არჩევნებია, მხედველობაში მაქვს უმუშევრების 6 თვის განმავლობაში 200 ლარით დაფინანსება, ამ თანხების ხარჯვა ბიზნესთან ერთად აზრიანი პროექტი გახდებოდა, მაგრამ მთავრობა ამას არ აკეთებს რადგან ურჩევნია, რომ არჩევნების წინ ამომრჩეველს პირდაპირ ხელიდან-ხელში თვითონ მისცეს ფული და ამით საარჩევნოდ ხმები მიიღოს. ეს ყველაფერი ცოტაა, მაგრამ მეტი რა შეუძლია ამ ჩვენ ბიუჯეტს. განსაკუთრებით ტრაგიკომიკურად გამოიყურებოდა პენსიების 20-25 ლარით გაზრდა, რადგან ჩვენ გვაქვს ძალიან მაღალი ინფლაცია და სამომხმარებლო კალათა დაახლოებით 20%-ით გაიზარდა, ამ დროს კი ასეთ მატებას რომ გთავაზობენ, საკმაოდ ცინიკურად ჟღერს, ისეც მომავალი წლიდან. რაც დღეს მოვისმინეთ ამას ეკონომიკასთან არანაირი კავშირი არ აქვს, ეს წმინდა წყლის სოციალური პაკეტია, მაგრამ რა უნდა მოვთხოვოთ მაშინ, როდესაც მთავრობაში სხედან ისეთი ადამიანები, რომლებიც სოციალურ და ეკონომიკურ პაკეტებს შორის დიდ განსხვავებას ვერ ხედავენ“, - განმარტავს გია ხუხაშვილი.

ნინო თამაზაშვილი