„იქიდან გამომდინარე, რომ რამდენიმე კვირით ვზღუდავთ საცალო ვაჭრობას, ბაზრობებს, მოლებს, მაღაზიებს და გვესმის, რომ აქ დიდი რაოდენობით ჩვენი მოქალაქეა დასაქმებული, ჩვენ დაწყებული გვაქვს ამ ადამიანების აღრიცხვა იმ კომპანიებთან ერთად, სადაც ისინი არიან დასაქმებულები. ვიღებთ იმ ვალდებულებას, რომ ამ სექტორში დასაქმებულ თითოეულ ადამიანს, რომელსაც გააჩნია სესხი, სახელმწიფო მიეხმარება სესხის გადავადებაში“, - განაცხადა პრემიერ მინისტრმა გიორგი გახარიამ.
როგორც საბანკო ასოცოციაციის პრეზიდენტმა ალექსანდრე ძნელაძემ „კომერსანტთან“ საუბრისას აღნიშნა, საბანკო სექტორი მზად არის, არსებულ გადასახდელებთან მიმართებით მომხმარებლებთან ისაუბროს და სესხების რესტრუქტურიზაცია მოახდინოს. მისი თქმით, თუ ადამიანი სოციალური დახმარების სიებში იქნება, მისთვის ბანკის მხრიდან რესტრუქტურიზაცია შეთავაზებული აუცილებელი იქნება.
„საბანკო სექტორმა რესტრუქტურიზაციებთან დაკავშირებით განაცხადა მზაობა, იმ პირებისთვის, ვინც სოციალური დახმარების პაკეტში მოხვდებიან. დღეის მდგომარეობით მიმდინარობს მუშაობა, რომ პერიოდულად აღნიშნული ინფორმაცია კომერციული ბანკებისთვის ხელმისაწვდომი გახდეს. ამ რესტრუქტურიზაციისთვის პირველ რიგში მომხმარებლებმა რეგისტრაცია უნდა გაიარონ და აღრიცხულები უნდა იყვნენ სახელმწიფოს სოციალური დახმარების სიებში და მხოლოდ ამის შემდეგ მიმართონ კომერციულ ბანკს. ყველა ვინც საჭიროებს და მიმართავს ბანკს რესტრუქტურიზაციისთვის, რა თქმა უნდა მათი განხილვაც მოხდება, მაგრამ დღეისათვის პირველ რიგში მზაობა იმ პირებზე არის ვინც აღნიშნულ სიებში მოხვდებიან. სოციალური დახმარების სიებში თუ იქნება პირი, მისთვის ბანკის მხრიდან რესტრუქტურიზაცია შეთავაზებული იქნება. ეს რესტრუქტურიზაცია სამი თვის ან ცოტა მეტის განმავლობაში გადახდების გადავადებას და გრაფიკის ცვლილებას გულისხმობს“, - განმარტავს ალექსანდრე ძნელაძე.
სახელმწიფოს მხრიდან ბანკებთან სესხების გადავადების საკითხზე შუამდგომლობას მთავრობის პოპულისტურ განცხადებად აფასებს საბანკო პროდუქტების ექსპერტი დავით კიკვიძე. მისი თქმით, ბანკები ამ ნაბიჯს მაინც გადადგამდნენ, რადგან ეს პირველ რიგში მათ ინტერესში შედის, რომ სესხები არ გაუპრობლემდეთ.
„საბანკო სექტორისთვის მიმდინარე ეტაპზე რესტრუქტურიზაციის ალტერნატივა არ არსებობს, იქედან გამომდინარე, რომ ეს თუ არ გაუკეთა მომხმარებელს ორმაგი ხარჯი ექნებათ. ერთი მხრივ მათ მოუწევს კონკრეტულ სესხებზე რეზერვების გაზრდა, შესაბამისად მეტი ფულის დარეზერვება ეროვნულ ბანკში, რაც არც თუ ისე კარგია. მეორე, ნებისმიერ შემთხვევაში სესხის გაპრობლემებას ისევ რესტრუქტურიზაციის გაკეთება ურჩევნიათ. თუმცა, ეს ყველაფერი გრძელვადიან პერსპექტივაში ბანკის ლიკვიდობის შემცირებას გამოიწვევს და ასევე პრეცედენტს გააჩენს მომხმარებლებში რომ მასობრივად დაიწყონ სესხების არგადახდა და ყველას მოუნდება რესტრუქტურიზაციის გაკეთება. თუმცა, ვფიქრობ ბანკი უფრო მეტად იმათზე მოახდენს რესტრუქტურიზაციას, ვისი მიმდინარე, ოფიციალური შემოსავალი ფიზიკურად ვერ უზრუნველყოფს სესხის გადახდას.
გარდა ამისა, მთავრობის განცხადება, რომ მომხმარებლებს ბანკებთან უშუამდგომლებს და თითქოს ერევა ამ პროცესში, ძალიან ფორმალური და პოპულისტური განცხადება მგონია, ეს მაინც ბანკების გადასაწყვეტია. ვფიქრობ, პრემიერის განცხადების მიუხედავად ბანკები ამ ნაბიჯს მაინც გადადგამდნენ, რადგან ეს პირველ რიგში მათ ინტერესში შედის, რომ სესხები არ გაუპრობლემდეთ“, - აცხადებს დავით კიკვიძე.