საკარანტინო ზონებად გადაკეთებამ სასტუმროებს კონკურენტული უპირატესობა მისცა. ბევრმა სასტუმრომ ისწავლა, როგორ უნდა მართოს ვირუსის გავრცელების რისკი, - ამის შესახებ სასტუმროებისა და ტურისტული კომპანიების წარმომადგენლებთან შეხვედრაზე პრემიერ-მინისტრმა, გიორგი გახარიამ განაცხადა.
„ტურიზმის მსოფლიო ორგანიზაცია და ჯანდაცვის მსოფლიო ორგანიზაცია ძალიან მალე შეიმუშავებენ კონკრეტულ წესებს, როგორ შეიძლება საერთოდ მოგზაურობის გახსნა. იქ არის რამდენიმე ეტაპი: კონტროლი საზღვარზე, ტრანსპორტი, სასტუმრო. ამ ეტაპებზე კორონავირუსის საწინააღმდეგო უსაფრთხოების ზომები აუცილებლად უნდა იყოს დაცული. რა თქმა უნდა, ყველაზე მნიშვნელოვანი ეტაპი სწორედ სასტუმროა. იმის გამო, რომ რაღაც ეტაპზე მივიღეთ გადაწყვეტილება სასტუმროებში საკარანტინო ზონების განთავსების შესახებ, ახლა ამან გარკვეულ სასტუმროებს კონკურენტული უპირატესობა მისცა. ბევრმა სასტუმრომ ისწავლა, როგორ უნდა მართოს ვირუსის გავრცელების რისკი. საკარანტინო ზონებში ამ სტანდარტების დაცვა უკვე ისწავლეს. მსოფლიოს არც ერთ ქვეყანას პირველივე დღიდან ასეთი გამოცდილება არ ჰქონია. საქართველოს სასტუმრო ინდუსტრიამ კარანტინში გაატარა 25 ათასზე მეტი ადამიანი და ეს ძალიან სერიოზული ციფრია“, - განაცხადა გახარიამ.
imedinews.ge