„კომერსანტი“ დაინტერესდა თუ რა გავლენა იქონია კორონავირუსმა ქართულ ლაბორატორიებზე და ესაუბრა „ხარისხის ლაბორატორია-Quality Lab“ დირექტორ ირაკლი ჭკადუას:
„გლობალურმა ლოკდაუნმა არსებითი ზეგავლენა მოახდინა ყველა სექტორზე და გამონაკლისი არც ჩვენი ლაბორატორია იყო, თუმცა არც ერთი დღით არ შეგვიწყვეტია საქმიანობა და კოვიდ-პანდემიის პერიოდში ძირითად ფოკუსირებას ვახდენდით სადისტრიბუციო კომპანიების ჰიგიენური და სანიტარული ნორმების ასევე, შემოსავლების სამსახურის საბაჟო დეპარტამენტის მიერ განხორციელებულ იმპორტირებული პროდუქციის კონტროლზე.
ფაქტიურად შესაძლებელია ითქვას, რომ ფრონტის წინა ხაზზე ვიდექით, ვინაიდან პანდემიის პერიოდში საზოგადოებრივი ჯანმრთელობის დაცვის მნიშვნელოვანი გამოწვევა იყო ასევე ადამიანებისთვის შესაძლო საფრთხის შემცველი ბიოლოგიური აგენტების გამოვლენა სასურსათო პროდუქტში, ასევე ჰიგიენური და სანიტარული ნორმების კონტროლი.
როგორც მოგეხსენებათ, უკანასკნელი რამდენიმე წლის განმავლობაში ჩვენი ლაბორატორიის მიერ ყოველწლიურად ხდებოდა იმ ტიპის ახალი ISO კვლევის მეთოდების დანერგვა-აკრედიტაცია, რასაც სხვა ლაბორატორიები არ ახორციელებდნენ და სამოქმედო სფეროში იმ მაჩვენებლების დამატება, რომლიც ხელს შეუწყობდა მომხმარებლის ჯანმრთელობის დაცვას და ქართული პროდუქციის ექსპორტს.
ამ ეტაპზე აკრედიტაციის რეჟიმშია რამდენიმე მეთოდი, მათ შორის კვლევები გლუტენის შემცველობაზე და სურსათის ვადის განსაზღვრაზე, რომლებიც საქართველოში აქამდე არ ხდებოდა. თუმცა ჯანდაცვის სამინისტროს მიერ უკვე დამტკიცდა „სურსათის ვარგისიანობის ვადის განსაზღვრის, მონიტორინგის და ვალიდაციის“ საზოგადოებრივი ჯანდაცვის გაიდლაინი, რომელიც აბსოლიტურად შეესაბამება ევროპულ და ამერიკულ ანალოგებს და მოგვეცა საშუალება დაგვეწყო მუშაობა აღნიშნული მეთოდების დანერგვაზე, რომელიც აქტიურად მიმდინარეობდა უკანასკნელი რამდენიმე თვის განმავლობაში ჩვენს ევროპელ პარტნიორებთან ერთად. მხოლოდ სურსათის ვადის განსაზღვრაზე სფეროს ვალიდაციის პერიოდში ჩატარდა 5000-მდე კვლევა სხვადასხვა პარამეტრებზე, იყო შრომატევადი და დიდ ფინანსურ დანახარჯებთან დაკავშირებული, თუმცა შედეგი ძალიან მნიშვნელოვანი იქნება ქვეყნისთვის.
კოვიდ-პანდემიის პერიოდში ასევე მონაწილეობა მივიღეთ და წარმატებით გავიარეთ მსოფლიოში განთქმული, ოფიციალურად აკრედიტირებული ბრიტანული ორგანიზაციების Fapas-ის და Fera Science-ის მიერ მოწყობილ, საერთაშორისო პროფესიულ ტესტირება გენმოდიფიცირებული ორგანიზმების თვისობრივ და რაოდენობრივ კვლევაში, რომელიც სხვა ტესტირებებიდან გამორჩეული იყო სირთულით. აღსანიშნავია რომ მსოფლიო მაშტაბით მონაწილე 61 ლაბორატორიიდან მხოლოდ 11-მა ლაბორატორიამ შეძლო სრული შედეგების წარდგენა, რომელთა შორისაც ვიყავით და როგორც თვისობრივ, ასევე რაოდენობრივ კვლევებში „ხარისხის ლაბორატორიამ“ 100% სიზუსტე აჩვენა“.