„პოპულიზმი ტექნოკრატიის მტერია“, - ასე აფსაებს ეროვნული ბანკის პრეზიდენტი ბიზნესმენის, ლაშა პაპაშვილის განცხადებას ეროვნული ვალუტის გაუფასურებასთან დაკავშირებით. კობა გვენეტაძის განცხადებას კომერსანტი უცვლელად გთავაზობთ:
„პოპულიზმი ტექნოკრატიის მტერია. ეროვნულმა ბანკმა სწორი და დროული მიდგომებით არაერთხელ გადაარჩინა ბიზნესი და მოსახლეობა. ისეთი ღონისძიებებით, რომელიც ამ განცხადებაშია ჩამოთვლილი, პანდემიის ფონზე დღეს გაცილებით უარეს მდგომარეობაში აღმოვჩნდებოდით. ეროვნული ბანკი ზუსტად იმიტომ არის დამოუკიდებელი, რომ მსგავს მოწოდებებს არ აჰყვეს.
გონივრული და თანმიმდევრული მიდგომების შენარჩუნებით, რაც საერთაშორისო პარტნიორების მხარდაჭერის გარანტია, ამ შოკსაც გავივლით!
PS ლარი ბოლო ერთ თვეში 2.6 პროცენტით გაუფასურდა და არა „ . . . 20 პროცენტით რამდენიმე დღეში“.
PPS დედოლარიზაციას საქართველოში ალტერნატივა არ აქვს“, - წერს კობა გვენეტაძე.
ცნობისთვის, დღევანდელი ვაჭრობის შედეგად, ლარის კურსი აშშ დოლართან და ევროსთან დაეცა. ეროვნული ბანკის მონაცემებით, ლარის კურსი აშშ დოლართან მიმართებით 0.0272 პუნქტით დაეცა. შედეგად, 31 მარტს, ერთი აშშ დოლარის ოფიციალური ღირებულება 3.4118 ლარი იქნება. ეროვნული ვალუტის კურსი 0.0204 პუნქტით გაუფასურდა ევროსთან მიმართებით. 31 მარტს, ერთი ევრო ოფიციალური კურსით 4.0044 ლარი ეღირება.