„ამერიკის კერძო ინვესტიცია დამოკიდებულია სტაბილურ, დამოუკიდებელ სასამართლო სისტემაზე. კიდევ ბევრი საქმეა გასაკეთებელი – ჩვენი მხარდაჭერა გრძელდება”, — ამის შესახებ აშშ-ის სახელმწიფო მდივანმა მაიკ პომპეომ საქართველოში ვიზიტის შემდეგ საკუთარ სოციალურ ქსელში დაწერა.
აღნიშნული გზავნილიდან, 24 საათში საქართველოს მთავრობამ უცხოური ინვესტიციების მოზიდვისთვის ახალი პროგრამის დაწყება დააანონსა. ინვესტორს, რომელიც საქართველოში 10 მილიონიან ინვესტიციას განახორციელებს და მინიმუმ 150 ადამიანს დაასაქმებს, მთავრობა 1 მლნ ლარიანი გრანტით დაეხმარება. ახალი პროგრამა შეეხება დარგებს, როგორიც არის გადამამუშავებელი ინდუსტრია, ელექტრული ინჟინერიის წარმოება, მანქანათმშენებლობა, მანქანების და მანქანა-დანადგარების და მათი ნაწილების წარმოება, ლოგისტიკა და სასაწყობო მეურნეობა, საჰაერო ხომალდების რემონტი და ტექნიკური მომსახურეობა და ა.შ.
საქართველოს საერთაშორისო ინვესტორთა ასოციაციის თავმჯდომარე ოსმან ჩალიშქან/მჟავანაძე „კომერსანტთან“ საუბრისას ამბობს, რომ ინიციატივა კარგია და შესაძლოა უცხოური ინვესტიციის შემოდინებას საქართველოში ხელი შეუწყოს, თუმცა ამბობს, რომ უცხოელი ინვესტორებისთვის საქართველოში ინვესტიციის განხორციელება ადვილი არ არის, რადგან ისინი რიგ პრობლემებს აწყდებიან.
„კოვიდ პანდემიისგან შექმნილი ვითარება მართლაც რომ ყველასთვის რთულია და მსოფლიო გამოწვევად იქცა. პანდემიამ რთულ მდგომარეობაში ჩააყენა მსოფლიოს და მათ შორის ჩვენი ქვეყნის ეკონომიკაც. საქართველოს მთავრობამ დაამტკიცა უცხოური საინვესტიციო პროექტების ხელშეწყობის სახელმწიფო პროგრამა, რომელსაც სააგენტო „აწარმოე საქართველოში“ განახორციელებს. აღნიშნული მექანიზმი მიმართულია ქვეყანაში უცხოური ინვესტიციების ზრდის ხელშეწყობისკენ, ტექნოლოგიის შემოდინების და ახალი სამუშაო ადგილების შექმნისკენ. რაც ვფიქრობთ, რომ ხელს შეუწყობს ჩვენი ეკონომიკის განვითარებას, ახალი სამუშაო ადგილების შექმნას და მეტი უცხოური ინვესტიციის შემოდინებას საქართველოში.
აღნიშნული გრანტის შესახებ ინფორმაცია მივაწოდეთ საქართველოს საერთაშორისო ინვესტორთა ასოციაციის წევრებს, უცხოეთის სავაჭრო-სამრეწველო პალატებს, ინვესტორებსა და ეკონომიკის სფეროში მომუშავე ადამიანებს. თუმცა, რა თქმა უნდა ადვილი არ არის უცხოელი ინვესტორებისთვის საქართველოში ინვესტიციის განხორციელება, რადგან ისინი რიგ პრობლემებს აწყდებიან, ერთ-ერთი ასეთი პრობლემა არის კვალიფიკაციის მქონე კადრების დეფიციტი, სწორედ ამიტომ, ჩვენ უნდა ვეცადოთ გამოვზარდოთ კადრები, რაც პირდაპირ კავშირშია მუშაობის შესრულებულ ხარისხთან“, - აცხადებს ოსმან ჩალიშქან/მჟავანაძე.
მისი თქმით, მიუხედავად იმისა რომ საქართველო იმპორტდამოკიდებული ქვეყანაა, აუცილებელია ადგილობრივი წარმოების განვითარება და მეტი სამუშაო ადგილების შექმნა, განსაკუთრებით არსებულ ვითარებაში.
„ჩვენი ქვეყანა უმეტესად დამოკიდებულია იმპორტზე, თუმცა გვჭირდება ადგილობრივი წარმოების განვითარება და რესურსების მოზიდვა, რაც პანდემიის პირობებში მკვეთრად აღინიშნა, ადგილობრივი წარმოების გაზრდა ხელს შეუწყობს ქვეყნის ეკონომიკის განვითარებასა და ახალი სამუშაო ადგილების შექმნას.
მზად ვართ, მთავრობასთან და ინვესტორებთან ერთად ხელი შევუწყოთ ქვეყანაში მეტი უცხოური ინვესტიციის შემოდინებას. პანდემიის პირორბებშიც კი უნდა ვეცადოთ ადგილობრივი წარმოების გაზრდა და მეტი სამუშაო ადგილის შექმნა რათა, ჩვენს მოსახლეობას არ მოუწიოს სხვა ქვეყნებში სამუშაოდ წასვლა“, - განმარტავს საქართველოს საერთაშორისო ინვესტორთა ასოციაციის თავმჯდომარე.
ევროპული ბიზნეს ასოციაციის (EBA) თანადამფუძნებელი მარიამ ქუჩულორია „კომერსანტთან“ საუბრისას ამბობს, რომ მთავრობის ინიციატივას მიესალმება, თუმცა თვლის რომ პოლიტიკური სტაბილურობა, დემოკრატიული და არაკორუფციული გარემო ყოველთვის ნებისმიერი ინვესტორისთვის პრიორიტეტია და ამის შემდეგ აქცევენ ყურადღებას სხვა ბენეფიტებს.
„ინვესტორი პირველ რიგში პოლიტიკურ სტაბილურობას უყურებს და რეგიონულ ჭრილში რაც ხდება რა თქმა უნდა აისახება მათ გადაწყვეტილებაზე. დღევანდელ პირობებში, როდესაც პოლიტიკურად ცოტა უცნაურ სიტუაციაა საქართველოში და რეგიონშიც დაძაბულობაა, რთულია ინვესტიციების მოზიდვაზე საუბარი. თუმცა, როცა პანდემიის პირობებში მიდის ბიზნესების გადათამაშება-გადაწყობა, შესაძლოა ინვესტორმა მიიღოს გადაწყვეტილება საქართველოში შემოსვლაზე, მაშინ როდესაც მთავრობა ასეთ პროგრამას სთავაზობს და ეუბნება, რომ თუ აქ ინვესტიციას მოიტანს, გარკვეულ ბენეფიტს მიიღებს, რა თქმა უნდა ეს დადებითი ფაქტია.
თუმცა, პოლიტიკური სტაბილურობა, დემოკრატიული და არაკორუფციული გარემო ყოველთვის ნებისმიერი ინვესტორისთვის პრიორიტეტია, თუ ის მაინც გადადგამს ნაბიჯს და გადაწყვეტს საქართველოში შემოსვლას, მთავრობის ბენეფიტები და ის დამატებითი პირობები რასაც ახლა სთავაზობენ შეიძლება ერთ-ერთი სტიმულიც გახდეს. თუმცა მთავარია, ინვესტორს ვაჩვენოთ დემოკრატიული პროცესები, ის რომ მივყვებით ევროატლანტიკურ მიზნებს და ვახორციელებთ ანტიკრიზისულ ეკონომიკურ გეგმას“, - განმარტავს მარიამ ქუჩულორია.
აღსანიშნავია, რომ საქსტატის მიერ გამოქვეყნებული ანგარიშის თანახმად, 2020 წლის მესამე კვარტალში საქართველოში შემოსული პირდაპირი უცხოური ინვესტიციების მოცულობა 23.6%-ით შემცირდა და მან $302.6 მილიონი დოლარი შეადგინა. ჯამურად, წლის 9 თვეში კი FDI $719 მილიონი დოლარი იყო, რაც 2019 წელთან შედარებით 24%-ით ანუ $228 მილიონი დოლარით ნაკლებია.