მთავრობა უცხოური ინვესტიციების მოზიდვისთვის ახალ პროგრამას იწყებს. ინვესტორს, რომელიც 10 მილიონიან ინვესტიციას განახორციელებს და მინიმუმ 150 ადამიანს დაასაქმებს, მთავრობა 1 მლნ ლარიანი გრანტით დაეხმარება. ახალი პროგრამა შეეხება დარგებს, როგორიც არის გადამამუშავებელი ინდუსტრია, ელექტრული ინჟინერიის წარმოება, მანქანათმშენებლობა, მანქანების და მანქანადანადგარების და მათი ნაწილების წარმოება, ლოგისტიკა და სასაწყობო მეურნეობა, საჰაერო ხომალდების რემონტი და ტექნიკური მომსახურეობა და ა.შ.

ევროპული ბიზნეს ასოციაციის (EBA) თანადამფუძნებელი მარიამ ქუჩულორია „კომერსანტთან“ საუბრისას ამბობს, რომ მთავრობის ინიციატივას მიესალმება, თუმცა თვლის რომ პოლიტიკური სტაბილურობა, დემოკრატიული და არაკორუფციული გარემო ყოველთვის ნებისმიერი ინვესტორისთვის პრიორიტეტია და ამის შემდეგ აქცევენ ყურადღებას სხვა ბენეფიტებს.

„ინვესტორი პირველ რიგში პოლიტიკურ სტაბილურობას უყურებს და რეგიონულ ჭრილში რაც ხდება რა თქმა უნდა აისახება მათ გადაწყვეტილებაზე. დღევანდელ პირობებში, როდესაც პოლიტიკურად ცოტა უცნაურ სიტუაციაა საქართველოში და რეგიონშიც დაძაბულობაა, რთულია ინვესტიციების მოზიდვაზე საუბარი. თუმცა, როცა პანდემიის პირობებში მიდის ბიზნესების გადათამაშება-გადაწყობა, შესაძლოა ინვესტორმა მიიღოს გადაწყვეტილება საქართველოში შემოსვლაზე, მაშინ როდესაც მთავრობა ასეთ პროგრამას სთავაზობს და ეუბნება, რომ თუ აქ ინვესტიციას მოიტანს, გარკვეულ ბენეფიტს მიიღებს, რა თქმა უნდა ეს დადებითი ფაქტია. მთავრობამ პირობაც ჩადო, რომ უნდა მოხდეს კადრების დასაქმება და გადამზადება, ინვესტორს ხელს ძირითადად კვალიფიციური კადრების არარსებობა უშლის, ამიტომ ეს ორმაგია სარგებელია, ინვესტორი მოახდენს გადამზადებას, ჩვენ შემთხვევაში კი ეს გადამზადებული კადრები თუნდაც მისი გასვლის შემდეგ ქვეყანაში დარჩება, ამიტომ ეს კარგი კომპონენტია.

თუმცა, პოლიტიკური სტაბილურობა, დემოკრატიული და არაკორუფციული გარემო ყოველთვის ნებისმიერი ინვესტორისთვის პრიორიტეტია, თუ ის მაინც გადადგამს ნაბიჯს და გადაწყვეტს საქართველოში შემოსვლას, მთავრობის ბენეფიტები და ის დამატებითი პირობები რასაც ახლა სთავაზობენ შეიძლება ერთ-ერთი სტიმულიც გახდეს. თუმცა მთავარია, ინვესტორს ვაჩვენოთ დემოკრატიული პროცესები, ის რომ მივყვებით ევროატლანტიკურ მიზნებს და ვახორციელებთ ანტიკრიზისულ ეკონომიკურ გეგმას“, - განმარტავს მარიამ ქუჩულორია.

„ეკონომიკური ტრანსფორმაციის ცენტრის“ პრეზიდენტი რამაზ გერლიანი მიიჩნევს, რომ ახალი პროგრამა აუცილებლად გამჭვირვალე და თანმიმდევრული უნდა იყოს. გარდა ამისა, გერლიანი თვლის, რომ თანხის და დარგების დაკონკრეტება არასწორია, მითუმეტეს მაშინ, როდესაც მთლიანად საინვესტიციო გარემო უნდა შეიცვალოს და სხვა ზოგადი ნაბიჯები უნდა გადაიდგას.

„წამახალისებელი გადაწყვეტილებები, სტიმულის წარმომშობია, თუმცა თუ ეკონომიკურ მდგომარეობას და არსებულ სიტუაციას გავითვალისწინებთ, ამას დიდი შედეგი არ ექნება. მითუმეტეს როდესაც სახელმწიფოს არ აქვს ამის საკმარისი რესურსი და არ არსებობს მაკონტროლებელი ორგანო, რომელიც ინვესტირების პროცესს გააკონტროლებს. მნიშვნელოვანია რა ჩაითვლება ინვესტირებად, რამდენად სწორად არის დაგეგმილი და ვინ გააკონტროლებს მას. გარდა ამისა, რატომ უნდა ჩავაყენოთ უკეთეს მდგომარეობაში 10 მლნ. ლარის შემომტანი ინვესტორი, მაგალითად 5 მლნ.-ის შემომტანთან შედარებით, ეს არ არის სწორი მიდგომა. ასეთი წერტილოვანი მიდგომა მაფიქრებინებს, რომ სხვა დინებებს ექნება ადგილი და მითუმეტეს რა მოლოდინიც აქვთ არ ექნება ის ეფექტი.

რაც შეეხება დარგების დაკონკრეტებას, თუ ამ სფეროებში პირობები ხელსაყრელია, ჩვენ მას ისედაც მოვიზიდავთ. გარკვეულწილად შეიძლება ვიფიქროთ, რომ ვიღაცა აპირებს ისედაც ინვესტირებას და ამ ბენეფიტსაც გამოიყენებს, ასეთი შთაბეჭდილება მრჩება. დარგების მიხედვიც და თანხის დაკონკრეტების მხრივაც ასე გამოყოფა არასწორია. არ მესმის რატომ ხდება ამის გაკეთება საჭირო, როდესაც მთლიანად საინვესტიციო გარემო უნდა შეცვალო და სხვა ზოგადი ნაბიჯები უნდა გადადგა“, - განაცხადა რამაზ გერლიანმა.

აღსანიშნავია, რომ პროგრამაში ჩართვის სურვილის შემთხვევაში, მეწარმე სუბიექტი განაცხადის ფორმით მიმართავს სააგენტოს „აწარმოე საქართველოში, რომელსაც ურთავს შესაბამისი საინვესტიციო პროექტის ბიზნესგეგმას. სააგენტოსა და ინვესტორს შორის ფორმდება შესაბამისი ხელშეკრულება, რომლითაც ინვესტორი იღებს საინვესტიციო ვალდებულებას და იწყებს პროექტის განხორციელებას, რომლის მაქსიმალური ვადა 39 კვირას შეადგენს.

ნინო თამაზაშვილი